Voorgraads

Verken ons voorgraadse programme.

Voorgraadse Programme

Vou alles toe

AgriWetenskappe

10 programme

B in Datawetenskap

Vir mense wat van rekenaars en wiskunde hou en om inligting deur data-analise te ontdek, gee die program B in Datawetenskap (BDatSci) deeglike onderbou in alle aspekte van die datalewensiklus. Die datalewensiklus behels data-insameling, -prosessering, -analise en -visualisering. Bykomend hiertoe en om jou nog beter voor te berei vir die industrie, kies jy een van agt fokusareas (of strome). Só verwerf jy kundigheid in die toepassing van datawetenskap in ’n spesifieke gebied of spesialiseer jy in ’n sekere aspek van datawetenskap.

BAgric in Agribesigheidsbestuur

Studente wat hierdie driejarige program in agribesigheidsbestuur volg, kan geleenthede aangryp as produksie-, bemarking-, aankope- en algemene bestuurders in organisasies wat landbou-insette verskaf, landbouverwerking doen en landbou-in- en -uitvoere doen. Handelsbanke en ander finansiële instellings bied ook opsies vir landbou-ekonome. Dié werk behels o.a. lewensvatbaarheidstudies en die opstel en evaluasie van sakeplanne en kontantvloeibeplanning.

BAgric in Landbouproduksie en -bestuur: Elsenburg

Die BAgric-program in toegepaste landbouproduksie en -bestuur is praktykgerig, maar verskaf terselfdertyd wetenskaplike kennis om te voorsien in die behoeftes en uitdagings van die moderne landbou. Daar word gefokus op die ekonomiese en tegniese bestuur van kommersiële boerderye en landbouverwante produksiestelsels. Hierdie program word in samewerking met Elsenburg Landbouopleidingsinstituut aangebied. Studente woon op Elsenburgkampus, waar hulle ook ál hulle opleiding ontvang. Vir verdere inligting, kontak Elsenburg direk by 021 808 5451.

BSc in Bewaringsekologie

Wil jy eendag in jou werk die wêreld se bewaringsuitdagings aanpak? Hierdie unieke program, met nadruk op sosiaal-ekologiese sisteme, rus jou toe vir 'n groot verskeidenheid loopbane in bewaringsekologie. Jy kan kies tussen loopbane in omgewing-impakassessering en -monitering (landelik en varswater), restourasie-ekologie, wildplaasbestuur, ekotoerisme, gemeenskap-gebaseerde natuurlike hulpbronbestuur en omgewingsbewuste, volhoubare produksie in landbou en bosbou (insluitend organiese plantbestuur), bewaringsbeplanning en navorsing in bewaringsbiologie. Die vierjarige program skop af met modules in Biologie, Chemie, Geo-omgewingswetenskap, Rekenaarvaardigheid en Wiskunde. In jou tweede jaar bestudeer jy vakke wat te make het met natuurbewaring, biodiversiteit en toegepaste wetenskappe, soos Geografiese Inligtingelsels (GIS), Biometrie en Mikrobiologie, en in jou derde jaar word aandag geskenk aan Bewaringsekologie, Biodiversiteit en Ekologie, en jy kan Grondkunde, Omgewingsosiologie of Genetika kies. In jou vierde jaar integreer jy al hierdie kennis en word daar op die groot en brandende kwessies in natuurbewaring gefokus. Boonop kry jy van die begin af eerstehandse ervaring in ons praktiese klasse. In jou vierde jaar het jy 'n keuse om jou eie, omvattende bewaringsplan vir 'n wildplaas, 'n wildreservaat of 'n natuurgebied op te stel of om 'n navorsingsprojek oor 'n voorafbepaalde bewaringsaak te lei. Jy kan ook uit spesialisonderwerpe soos insekbewaringsbiologie kies. As gevolg van die uitwissingskrisis is sulke gespesialiseerde kundigheid deesdae wêreldwyd al hoe meer in aanvraag.

BSc in Bosbou (Bosbou- en Houtwetenskappe) (BScBosb)

Bosbou- en Natuurlikehulpbronwetenskappe: Hierdie rigting handel oor bosse, woude, plantasies en ander boom-gebaseerde landgebruikstelsels. Die studieprogram stel jou bekend aan die hele bosbou- en houtprodukte-waardeketting, soos die kweek en inoesting van bome, die bestuur van plantasies en sosio-ekonomiese en bewaringsaspekte. Die program skop af met modules in Biologie, Chemie, Geo-omgewingswetenskap, Rekenaarvaardigheid en Wiskunde saam met 'n module in Boskunde. Vanaf die tweede studiejaar bestudeer jy die basiese toegepaste wetenskappe soos Grondkunde en Biometrie en in die derde en vierde studiejaar neem jy verskeie modules in Boskunde wat uitloop op 'n oorkoepelende bosbou-bestuursplan. Hout- en Houtprodukkunde: Hierdie rigting is 'n kombinasie van houtprodukkunde en ingenieursmodules. Kennis van houtprodukkunde word gekombineer met modules soos Sterkteleer, Gehaltebestuur, Bedryfsergonomie, Omgewingsingenieurswese en Ondernemingsontwerp om 'n graad te skep wat gesogte leiers vir die houtprodukte-omgewing oplewer. Aangesien daar 'n tekort aan opgeleide kundiges in hierdie studieveld is, is baie beurse beskikbaar: 'n groot persentasie van ons voorgraadse studente ontvang volle beurse! Studente wat hierdie program voltooi, volg meestal loopbane as bosboukundige of houtkundige bestuurders. Daar is ook geleenthede as omgewingsbeplanners, konsultante, kontrakteurs, entrepreneurs, voorligters en navorsers.

BSc in Voedselwetenskap

Indien jy oor probleemoplossingsvaardighede en kreatiewe vermoëns beskik en 'n sterk belangstelling het in die wetenskap van voedsel, is dit die program vir jou! Hierdie vierjarige program lei studente op om rou materiale te omskep in die innoverende, veilige, voedsame en smaaklike voedselprodukte beskikbaar in supermarkte. Jy word geleer om kennis van die fundamentele wetenskappe soos chemie, biochemie, fisika, wiskunde en mikrobiologie toe te pas in voedselprosessering, -preservering, -verpakking en -produkontwikkeling. Tydens die studiejare is daar noue kontak met die Suid-Afrikaanse voedselindustrie deur gereelde fabrieksbesoeke en verpligte praktykopleiding. Hierdeur maak jy kennis met 'n wye verskeidenheid aspekte van die voedselwetenskapstudierigting. Studente wat die graad BScVoedselwet verwerf, kan aangestel word as innoverende produkontwikkelaars, of as bestuurders van verskeie afdelings in voedselmaatskappye, soos produksie, produkontwikkeling, kwaliteitskontrole, navorsing en ontwikkeling, en tegnies. Hulle kan ook as navorsers by tersiêre- en navorsingsinstitute werk of entrepreneurs word en, nadat ondervinding opgedoen is, konsultante vir die voedselbedryf. Stellenbosch Universiteit se voedselwetenskaplikes is wêreldwyd gesog.

BScAgric in Diereproduksiestelsels

Hierdie program integreer kennis van die ekologie, biochemie, fisiologie, voeding, teling, produksie en produkkwaliteit van veeproduksiestelsels. Dit dek ook die bestuur van veeproduksiestelsels vir verhoogde produksie en produksie-doeltreffendheid op 'n omgewingsvriendelike en ekonomies doeltreffende manier. In die breër bedryfsveld van diereproduksiestelsels is daar 'n keuse van studierigtings: jy kan suiwer veekundige wetenskappe neem of jy kan veekundige wetenskappe volgens jou belangstelling kombineer met onder andere agronomie, akwakultuur, bewaringsekologie of landbou-ekonomie. As jy een van hierdie rigtings volg, word jy voorberei vir 'n loopbaan as konsultant, entrepreneur, bestuurder, tegnikus, voorligter of produksiebestuurder in veekunde en in veekundeverwante bedrywe (soos dierevoeding, vleiskunde, dierefisiologie, diere-reproduksie en diereteling) of in die akwakultuurbedryf of as vee- of wildboer.

BScAgric in Landbou-ekonomie

Hierdie vierjarige program vestig vaardighede in die gebruik van landbou-ekonomiese en -bestuurstegnieke onder voornemende landbou-ekonome en bestuurskundiges in die openbare en privaat sektor. Die program bied 'n keuse uit die volgende studierigtings: landbou-ekonomiese analise, landbou-ekonomiese analise en -bestuur, landbou-ekonomiese analise en bestuur met voedselwetenskap, en landbou-ekonomie met voedselwetenskap (voedselverwerkingsbestuur).

BScAgric in Plant- en Grondwetenskappe

Die vierjarige program in plant- en grondwetenskappe dek opleiding in akkerbou-, weidings- en groentegewasse, aromatiese plante, sagtevrugte, sitrus, snyblomme en wingerd. Kennis van biochemie, grondkunde, landbou-ekonomie, genetika, entomologie, nematologie, plantpatologie, biometrie en gewasproduksie word geïntegreer tot 'n sinvolle geheel.

BScAgric in Wingerd- en Wynkunde

Hierdie program dek die studierigting wynproduksiestelsels en leer jou van die wingerdstok, sy struktuur en hoe om die plant wetenskaplik te manipuleer. So leer jy om, in harmonie met die omgewing, volhoubare wingerde te ontwikkel wat gebruik kan word om unieke wyne te produseer. Verder doen jy deeglike kennis op van die chemiese en biologiese prosesse wat by die maak van wyn- en brandewynprodukte betrokke is. Studente spandeer 'n groot gedeelte van hul graad in diensleer en internskappe. Só kry hulle vroeg reeds werksondervinding, blootstelling aan die industrie en kennis oor hulle uitgesoekte professionele werksomgewing. Studente in dié rigting word voorberei vir 'n betrekking in die wyn- en verwante industrieë onder andere as wynmakers, wingerdkundiges, wingerdtelers, wynanaliste, produksiebestuurders, bemarkers, tegnici, konsultante of as entrepreneurs.

Lettere en Sosiale Wetenskappe

16 programme

B in Datawetenskap

B in Maatskaplike Werk

Hierdie vierjarige program rus jou toe met die nodige kennis, vaardighede en begrip om probleme wat in die wisselwerking tussen mense en hulle omgewing ontstaan, met 'n positiewe houding te benader en om die betrokkenes te bemagtig om hulle uitdagings selfstandig te hanteer. Die kwalifikasie lei tot 'n verskeidenheid beroepsmoontlikhede in staatsdepartemente op nasionale, provinsiale en plaaslike owerheidsvlakke, asook vrywillige welsynsorganisasies en nieregeringsorganisasies wat maatskaplike werkers in diens neem.

B in Musiek (BMus)

Hierdie vierjarige program bied jou akademiese en uitvoerende musiekopleiding. Praktiese onderrig word aangebied in klavier en alle moderne orkesinstrumente, asook sang, orrel, blokfluit, klavesimbel, kitaar en koordirigering. Daar is ruim geleentheid vir groepmusiek-beoefening, bv. die US Simfonieorkes, die Collegium Musicum, die Stellenbosch Simfoniese Blasers, Konsubrass, kore en talle kleiner ensembles.

BA (Regsgeleerdheid)

Die BA (Regsgeleerdheid)-graad alleen stel jou nie in staat om as regspraktisyn te praktiseer nie - daarvoor moet jy ook die LLB-graad verwerf. Die driejarige BA (Regsgeleerdheid) bied egter 'n tweeledige voordeel. Dit verryk jou insig in menslike gedrag en sosiale kwessies en dit bied ook 'n uitstekende basis vir 'n meer gevorderde studie in die regte. Juis daarom ontvang jy met 'n BA (Regsgeleerdheid) vrystelling van die eerste twee jaar van die vierjarige LLB-program. Indien jy 'n regspraktisyn wil word, kan jy dán by die LLB-program se laaste twee jaar inskakel en aan die einde van jou vyfde jaar as student 'n LLB as tweede baccalaureusgraad verwerf.

BA in Drama- en Teaterstudie

Die opleiding in hierdie driejarige program lewer goed ingeligte, kreatiewe en goed toegeruste teaterpraktisyns en navorsers wat 'n sinvolle bydrae in die teaterbedryf en aanverwante terreine kan maak.

BA in Geesteswetenskappe

Die BA in Geesteswetenskappe is 'n driejarige program wat jou leer om akademies veelsydig en buigsaam te wees en om in 'n groot verskeidenheid beroepe aktuele probleme in Suid-Afrika op te los of te hanteer. Met verdere opleiding kan jy beroepe soos onderwyser (Nagraadse Onderwyssertifikaat), sielkundige, taalwerker (Honneurs en MA in Vertaling), joernalis (BPhil in Joernalistiek) en stadsbeplanner oorweeg.

BA in Internasionale Studie

In die bestek van drie jaar ontwikkel jy 'n omvattende begrip vir die kompleksiteit van politieke, kulturele en ekonomiese interaksie oor nasionale grense. Só raak jy sensitief vir die rol wat identiteitsvraagstukke in die wêreld speel en word jy voorberei om 'n ingeligte en kritiese wêreldburger te wees. Hierdie opleiding skep vir jou verskeie moontlike werkgeleenthede soos die diplomatieke diens; die internasionale kantore van die Departemente van Arbeid, Handel en Nywerheid, en Verdediging; die Internasionale Afdeling van die Parlement; die Nasionale Intelligensieagentskap; die toerismebedryf; internasionale telekommunikasie; internasionale joernalistiek; internasionale navorsingsinstansies; openbare skakelwerk; regionale en landwye instansies wat handel en investering bevorder (bv. WESGRO); die hoofkantore en streekkantore van internasionale organisasies soos die VN, AU en die Wêreldhandelsorganisasie, Amnesty International, die World Economic Forum; internasionale hulporganisasies soos Save the Children en OXFAM; multinasionale ondernemings; en die uitvoer- en invoerbedryf. Dié graad is 'n voorvereiste vir nagraadse programme in Politieke Wetenskap en Internasionale Studie aangesien sommige van hierdie instellings ook nagraadse kwalifikasies verkies.

BA in Menslike Hulpbronbestuur

Hierdie driejarige program berei jou voor op 'n loopbaan in die bestuur van menslike hulpbronne in organisasies, 'n vermoë waaraan daar tans 'n besondere behoefte in Suid-Afrika is. Jy sal leer om: mense se gedrag, veral in beroepsverband, te verstaan; mense se werks- en lewensomstandighede te verbeter; die Suid-Afrikaanse werkomgewing te verstaan en loopbaangeleenthede te identifiseer; duidelik en sinvol met mense te kommunikeer; menslike hulpbronbeplanning, werwing en keuring professioneel te doen; en arbeidsverhoudingsprobleme te hanteer.

BA in Musiek

Die BA-program in Musiek bied akademiese en uitvoerende musiekopleiding wat praktiese onderrig in klavier en in alle moderne orkesinstrumente behels, asook in sang, orrel, blokfluit, klavesimbel, kitaar en koordirigering. Daar is ruim geleentheid vir groepmusiek-beoefening, byvoorbeeld in die Universiteit Stellenbosch Simfonieorkes, die Collegium Musicum, die Stellenbosch Simfoniese Blasers, Konsubrass, kore en talle kleiner ensembles.

BA in Ontwikkeling en Omgewing

Die driejarige BA-program in Ontwikkeling en Omgewing leer jou hoe gemeenskappe werk, die prosesse van ontwikkeling en die natuurlike omgewing. Dit lei jou tot begrip van die wisselwerking tussen gemeenskappe, sosio-ekonomiese ontwikkelingsprosesse en die natuurlike omgewing, en die gevolge daarvan. Die program kweek basiese en bestuursvaardighede vir ondernemers en ook vir beroepe soos bestuurders, beplanners en administrateurs in die openbare en privaat sektors en in nasionale en plaaslike owerhede. Loopbane is moontlik in beroepsvelde soos gemeenskapsontwikkeling, bevolkingsontwikkeling, stads- en streekbeplanning, toerismebeplanning en -bestuur, hulpbronbeplanning en -bestuur en omgewingsbeplanning en -bestuur.

Datawetenskap en Rekenaardenke

2 programme

B in Datawetenskap

BIng (Elektries en Elektronies) (Data-ingenieurswese)

Data-ingenieurswese bevat alle take wat benodig word om data beskikbaar te stel vir analise, kennisontdekking en besluitnemingsprosesse. Die belangrikste taak van die data-ingenieur is om 'n organisasie se data-pypleidingstelsels te ontwikkel en in stand te hou, en algoritmes te implementeer om data na 'n bruikbare formaat vir analise te omskep. Die take van 'n data-ingenieur sluit in die insameling van data, die stoor van data, die sinchronisasie van data, transformasie van data, die skoonmaak van data, die bestuur van data en die ontwikkeling van data-modelle.

Ekonomiese en Bestuurswetenskappe

13 programme

B in Datawetenskap

BCom (Aktuariële Wetenskap)

Hierdie program is die eerste stap in die opleiding van aktuarisse. Aktuarisse kan beskryf word as onafhanklike vakkundiges wat finansiële risiko's en onvoorsiene gebeurlikhede kan ontleed en in 'n model weergee. Hulle kan die risiko's opweeg en die resultate in finansiële terme verduidelik. Hierdie werk het direk te doen met die bestuur van bates en laste (soos beleggings en lenings) en die gepaardgaande risiko's.

BCom (Bedryfsielkunde)

Hierdie program lei jou op vir 'n loopbaan in die bestuur van menslike hulpbronne in organisasies. Deur die BCom (Bedryfsielkunde) op te volg met 'n HonsBCom (Bedryfsielkunde) en die ses maande lange BPsig-ekwivalensieprogram, en dan 'n professionele raadseksamen suksesvol af te lê, kan jy statutêr registreer by die Health Professions Council of South Africa (HPCSA) as psigometris (in onafhanklike praktyk). Na voltooiing van die MCom (Bedryfsielkunde)-program, 'n 12 maande internskap en die aflegging van die professionele raadseksamen vir bedryfsielkundiges kan jy statutêr registreer by die HPCSA as Bedryfsielkundige.

BCom (Bestuursrekeningkunde)

Dié program help jou om eendag te kwalifiseer as 'n geoktrooieerde bestuursrekenmeester. Met hierdie kwalifikasie kan jy as 'n bestuursrekenmeester of as 'n finansiële bestuurder werk. As bestuursrekenmeester sal jy byvoorbeeld betrokke wees by kostestudies oor die ontwikkeling van nuwe produkte en deelneem aan besluite oor nuwe investeringsmoontlikhede.

BCom (Bestuurswetenskappe)

Hierdie is die graadprogram vir studente wat op 'n loopbaan in 'n bestuursveld wil fokus. Die BCom (Bestuurswetenskappe) bied 'n verskeidenheid modules aan waaruit studente vrylik kan kies. Dit is ook moontlik om in hierdie program op 'n spesifieke area van kundigheid te fokus, wat ons 'n fokusarea noem. Die fokusarea wat jy kies, sal jou uiteindelike loopbaan bepaal.

BCom (Ekonomiese Wetenskappe)

Hierdie program fokus amper net op studierigtings in ekonomie. Omdat statistiek vir die ontwikkeling van hoëvlak- ekonomiese ontleding belangrik is, is Statistiek of Wiskundige Statistiek vereiste vakke in hierdie program. As jy daarin belangstel om byvoorbeeld as 'n ekonomiese of finansiële analis of konsultant te werk, is hierdie die program vir jou!

BCom (Finansiële Rekeningkunde)

Hierdie program is gerig op studente wat die geoktrooieerde rekenmeesterskwalifikasie (GR) wil behaal, maar nie voorgraads vir BRek studeer het nie. By suksesvolle voltooiing van dié program kan jy 'n oorbruggingsjaar volg, waarna jy aansoek kan doen vir toelating tot die HonsBRek-program. Daar is nog 'n opsie: direk nadat jy die graad BCom (Finansiële Rekeningkunde) behaal het, kan jy vir die program HonsBCom (Bestuursrekeningkunde) inskryf. Dié program is gerig op die kwalifikasie van geoktrooieerde bestuursrekenmeester (CIMA). Vir verdere inligting oor die opleiding van geoktrooieerde rekenmeesters en geoktrooieerde bestuursrekenmeesters, kyk onder BRek en BCom (Bestuursrekeningkunde) onderskeidelik.

BCom (Internasionale Besigheid)

Hierdie vierjarige program is 'n baanbreker in voorgraadse besigheidsopleiding! Ons studente slaan munt uit 'n verrykte ervaring deur interaksie met internasionale studente en die wêreldmark. Só rus ons hulle toe om rolspelers in die internasionale kennisekonomie te wees.

BCom (Regsgeleerdheid)

Die BCom (Regsgeleerdheid)-graad alleen stel jou nie in staat om as regspraktisyn te werk nie - jy moet ook eers die LLB-graad verwerf. Die driejarige BCom (Regsgeleerdheid) verskaf egter 'n deeglike agtergrond in die ekonomiese wetenskappe wat jou voorberei vir 'n loopbaan in die sakewêreld of in kommersiële reg en lê ook 'n deeglike basis vir 'n meer gevorderde regstudie. Trouens, beskik 'n mens reeds oor die BCom (Regsgeleerdheid), is jy geregtig op vrystelling van die eerste twee jaar van die vierjarige LLB-program. Indien jy 'n regspraktisyn wil word, kan jy dán by die LLB-program se laaste twee jaar inskakel en aan die einde van jou vyfde jaar as student 'n LLB as tweede baccalaureusgraad verwerf.

BCom (Wiskundige Wetenskappe)

Indien jy belangstel om 'n finansiële risikobestuurder of portefeuljebestuurder te word, of om kwantitatiewe oplossings vir bestuursprobleme te vind, raai ons jou aan om hierdie program te volg.

Opvoedkunde

3 programme

BEd (Foundation Phase Education)

Die BEd (Grondslagfase) lei hoofsaaklik onderwysers vir die Grondslagfase (graad R tot 3) op en stel hulle in staat om leerders vir die eiesoortige eise van ons tyd voor te berei. Maar jy ontwikkel ook vaardighede wat verskeie ander beroepsmoontlikhede vir jou kan ontsluit, soos kommunikasiekundige, gemeenskapsontwikkelaar, skakelbeampte en beroepe wat op kliëntediens, bemarking en verkope gerig is. Jy kan verder studeer in Grondslagfase-onderrig (HonsBEd (Grondslagfase-onderrig)). Daarna kan jy spesialiseer in kurrikulumontwikkeling, skoolbestuur of opvoedingsbeleid (MEd). Of met nagraadse opleiding kan jy 'n leerondersteuningsonderwyser (HonsBEd en MEd in Opvoedkundige Ondersteuning) of 'n opvoedkundige sielkundige (MEd (Psig)) word. Jy kan selfs spesialiseer in kurrikulumontwikkeling, skoolbestuur, of opvoedkundige beleid.

BEd (Intermediêrefaseonderrig)

Hierdie vierjarige BEd-program lei jou op om onderwys aan leerders in die Intermediêre Fase te gee in twee intermediêre skoolvakke en twee tale. Die program dek die teorie en praktyk van al die leerprogramme van graad 4 tot 7. Jy kan spesialiseer in kurrikulumontwikkeling, skoolbestuur of opvoedingsbeleid deur op te volg met 'n HonsBEd en 'n MEd-program in een van die onderskeie rigtings. Of, met verdere nagraadse opleiding kan jy 'n leerondersteuningsonderwyser (HonsBEd en MEd in Opvoedkundige Ondersteuning) of 'n opvoedkundige sielkundige (MEd (Psig) in Opvoedkundige Sielkunde) word. Jy kan selfs spesialiseer in kurrikulumontwikkeling, skoolbestuur of opvoedkundige beleid.

Nagraadse Onderwyssertifikaat (NOS)

Jy kan jou ook as hoërskoolonderwyser bekwaam deur eers 'n graad uit 'n ander fakulteit te verwerf en daarna in te skryf vir ons eenjarige Nagraadse Onderwyssertifikaat (NOS). Twee van die vakke (een tot op minstens tweedejaarsvlak en een tot op derdejaarsvlak) van so 'n voorgraadse program moet só gekies word dat jy minstens twee toepaslike skoolvakke kan onderrig. Vir die verskillende skoolvakonderrigmodules se vereistes, bestudeer die Fakulteit Opvoedkunde se jaarboek onder NOS. Hierdie program is gefokus op die opleiding van hoërskoolopvoeders vir veral die Verdere Onderwys- en Opleidingsfase (VOO). Die Fakulteit beveel ten sterkste aan dat jy minstens twee skoolvakonderrigmodules neem, aangesien dit jou loopbaanvooruitsigte aansienlik verbeter as jy twee skoolvakke kan onderrig. Indien jy egter net aan die toelatingsvereistes van een in plaas van twee skoolvakke se onderrigmodules voldoen, moet dié vak 'n hoofvak in jou voorgraadse of honneurskwalifikasie wees. Jy moet dan ook die 20-krediet Gevorderde Studie-module in jou spesifieke vakspesialiteit neem. Dit is nie ? uitgemaakte saak dat al die Gevorderde Studie-modules in ? betrokke jaar aangebied kan word nie, aangesien dit afhang van beskikbare personeel. Alle voornemende studente wat vir toelating tot die NOS aansoek doen, doen twee weke lank observasie aan die begin van die skooljaar voordat hul toegelaat word om vir hierdie program te registreer. Hierdie observasie eindig met die inlewering van ? verslag wat 10% vir jou finale Praktieseleer-punt tel. Al die nodige dokumentasie in hierdie verband sal voor die einde van die voorafgaande jaar aan voornemende studente verskaf word.

Ingenieurswese

7 programme

BIng (Bedryfs)

Die bedryfsingenieur se dagtaak bestaan uit 'n groot verskeidenheid skeppende bedrywighede, veral in die moderne vervaardigings- en dienstebedryf. Die hoofvertakkings van bedryfsingenieurswese is vervaardigingstegnologie en operasionele stelselontwerp. Dit omvat belangrike fasette wat in die moderne industriële en dienste-omgewing van besondere belang is, soos gehalteversekering, ingenieursekonomie, operasionele navorsing, ergonomie en inligtingstegnologie.

BIng (Chemies)

Chemiese ingenieurswese is gemoeid met die grootskaalse bedryf van prosesse waardeur verskeie gebruikersmateriale geproduseer word, soos chemikalieë, farmaseutiese middels, kunsmis, brandstowwe, metale en ander materiale. Chemiese ingenieurswese is ook gemoeid met prosesse waar afvloeisels en afvalmateriaal verwerk en herwin word. Die prosesse wissel van eenvoudige fisiese skeidings, soos distillasie, verdamping, droging of filtrasie, tot ingewikkelde chemiese sinteses.

BIng (Elektries en Elektronies)

Elektriese ingenieurs is verantwoordelik die opwekking, transmissie en omsetting van elektriese energie (ook hernieubare energiebronne) in bedrywe soos elektrisiteitsvoorsiening, fabrieke en chemiese aanlegte, myne, munisipaliteite, spoorweë en hawens. Elektroniese ingenieurs spesialiseer in die beheer van elektriese en meganiese robotiese stelsels, veral ingeboude beheerders; die inwin, verwerking en verspreiding van inligting deur rekenaar- en kommunikasienetwerke soos selfoonnetwerke, Wi-Fi en mobiele datanetwerke; en die ontwerp van rekenaars en groot programmatuurstelsels.

BIng (Elektries en Elektronies) (Data-ingenieurswese)

BIng (Meganies)

Meganiese ingenieurswese word gekenmerk deur die beweging en oordraging van energie, soos byvoorbeeld in voertuie, vliegtuie, vaartuie, missiele, verkoelingstelsels, kragstasies en enjins, maar sluit ook in masjiene wat in alle vertakkings van die ekonomie gebruik word, onder andere prosesaanlegte en vervaardigingsnywerhede.

BIng (Megatronies)

Megatroniese ingenieurswese is 'n kombinasie van presisie-meganiese ingenieurswese, elektronika en rekenaarstelsels. 'n Tipiese megatroniese stelsel word gekenmerk deur 'n noue integrasie van meganiese onderdele, elektroniese sensore, meganiese en elektriese aktueerders en rekenaarbeheerders. Voorbeelde van megatroniese stelsels sluit in: elektroniese enjinbeheerstelsels, robotstelsels, en geoutomatiseerde monteerlyne.

BIng (Siviel)

Siviele ingenieurs is verantwoordelik vir groot, permanente werke soos besproeiingskemas, brûe, damme, hawens, kanale, lughawens, paaie en strate, pypleidings, rioleringstelsels, spoorweë, strukture van verskeie tipes en struktuurfondamente, stormwaterstelsels, tonnels, torings, watervoorsieningskemas en verskeie tipes swaar konstruksiewerk. Deur hul werk, verbeter, bewaar en herskep hulle die omgewing, en voorsien die fasiliteite wat 'n doeltreffende gemeenskapslewe benodig.

Regsgeleerdheid

5 programme

BA (Regsgeleerdheid)

BCom (Regsgeleerdheid)

BRekLLB

Die BRek LLB bied aan studente die kans om op 'n geïntegreerde manier binne vyf jaar die leerplanne van die LLB-program én die BRek-program te voltooi. Studente wat hierdie programme gelyktydig volg, word aan sowel die noodsaaklike vertakkings van die regswetenskap as aan die grondslae van finansiële rekeningkunde, bestuursrekeningkunde, belasting en ouditkunde bekendgestel. Na verdere beroepsgerigte opleiding kan hierdie studente dus kwalifiseer as geoktrooieerde rekenmeesters en/of as regspraktisyns. Die BRek LLB is 'n interfakultêre program wat beteken dat jy modules by die Fakulteit Regsgeleerheid en by die Fakulteit Ekonomiese en Bestuurswetenskappe neem.

LLB (driejarig)

Die driejarige LLB-program is in 1999 ingestel vir nagraadse studente wat hul eerste baccalaureusgraad op 'n ander gebied as die regte behaal het, met 'n gemiddelde van 60% in hul finale jaar van die betrokke baccalaureusgraad. Die program stel studente bekend aan al die vertakkings van die regswetenskap wat vir 'n loopbaan as regspraktisyn en ander verwante loopbane noodsaaklik is. Net soos die vierjarige LLB, stel hierdie program jou in staat om 'n loopbaan in die regte te volg, soos advokaat of prokureur, nadat jy die vereiste beroepsopleiding ondergaan het en die toepaslike toelatingseksamen geslaag het.

LLB (vierjarig)

Hierdie program is daarop gemik om, oor vier jaar, aan studente 'n deeglike insig te gee in al die vertakkings van die regswetenskap wat vir 'n loopbaan in die regte en verskeie ander verwante beroepe noodsaaklik is. Voordat die regsberoep hulle egter formeel tot sy geledere as regspraktisyn sal toelaat, moet LLB-gegradueerdes ook die vereiste beroepsopleiding ondergaan en die toepaslike toelatingseksamen suksesvol aflê.

Geneeskunde en Gesondheidswetenskappe

6 programme

B in Arbeidsterapie

Arbeidsterapie is 'n dinamiese en opwindende beroep. Hierdie program rus jou toe met kennis en vaardighede om kliënte van alle ouderdomsgroepe met ontwikkelingsagterstande, verskillende siektetoestande en funksionele beperkings te assesseer en effektiewe intervensies daar te stel. Aktiwiteite word as behandelingsmedium gebruik. Die behandelingsprogramme word ontwerp vir aanwending in tuisomgewings en gemeenskappe om optimale deelname van die persoon of persone aan die aktiwiteite van die daaglikse lewe te verkry. Hierdie behandelingsprogramme rehabiliteer en voorkom funksionele probleme, en bevorder die algehele gesondheidstoestand van persone. As arbeidsterapeut sal jy jou kliënte holisties benader met inagneming van die fisiese, sielkundige, sosiale en emosionele aspekte. Jy lewer insette op alle areas van hul daaglikse funksionering - wat selfsorg, werk en vryetydsbesteding insluit. Wat kinders betref is dit hulle 'werk' om te speel en daarom bestaan hulle behandelingsprogramme uit spel- en skoolverwante aktiwiteite. Indirekte arbeidsterapiedienste sluit onder andere in raad wat jy aan onderwysers, werkgewers, gesinslede en versorgers kan gee waardeur hulle kan bydra om persone se deelname aan die aktiwiteite van die lewe te verbeter, en die bestuur van aktiwiteitsprogramme wat vir groepe persone in fasiliteite en die gemeenskap aangebied word om gesonde lewenstyle te bevorder.

B in Spraak-Taal-en Gehoorterapie

Hierdie program lei spraak-taalterapeute op met die toepaslike kennis en vaardighede om persone met kommunikasieafwykings te kan hanteer. Jy word toegerus om die volgende professionele funksies te vervul: die voorkoming, identifisering, evaluering, diagnosering en behandeling van kommunikasieafwykings; kliënt- en gesinsgesentreerde berading; die begeleiding, onderrig en opleiding van ander kundiges of relevante lekepersone; konsultasie en navorsing op die gebied van kommunikasieafwykings; en die bestuur van programme voorsien deur spraak-taalterapeute aan kliënte met kommunikasieafwykings in gesondheids-, opvoedkundige en privaat kontekste. Ten einde die bogenoemde funksies optimaal in die veeltalige Suid-Afrikaanse konteks te kan verrig, word van studente verwag om vaardigheid te ontwikkel in ten minste twee tale, asook Gebaretaal.

B in Verpleegkunde

Die B-graadprogram in Verpleegkunde onderrig en begelei studente om 'n professionele verpleegkundige en verloskundige te word. Deur middel van leerervarings op kampus, met gemeenskappe en in verskeie gesondheidsorginrigtings, sal studente die gedragswyses, vaardighede en bevoegdhede ontwikkel wat hulle nodig het om leiers te word wat waarde heg aan diversiteit en wat deeglike oorweging en innovasie na hul versorgingspraktyk in die verpleegkunde bring. Jy sal leer om vorm te gee aan persoongesentreerde, holistiese, eietydse, bewysgebaseerde praktykvoering en hulpbronsensitiewe versorgingspraktyk om sodoende die gesondheidsorg en welstand van individue, groepe en gemeenskappe te ondersteun. Verpleegkundige versorgingspraktyk wissel vanaf noodsaaklike sorgaktiwiteite wat op die oog af eenvoudig lyk tot komplekse, soms hoogs tegniese, versorgingsaktiwiteite – wat ook al nodig is om mense te ondersteun sodat hulle in hulle selfversorgingsbehoeftes kan voorsien, gesond kan bly of word, en welstand kan ervaar. Verpleegkundiges werk saam met hulle gesondheidsorgkollegas oor 'n groot verskeidenheid kontekste heen om veilige, persoongesentreerde gehaltesorg te verskaf aan mense, gesinne en gemeenskappe met veelvuldige en verskillende selfversorgingsbehoeftes oor die lewensduur.

BSc in Dieetkunde

Hierdie program lei dieetkundiges op, wat oor die wetenskaplike kennis, vaardighede en gesindhede beskik om selfstandig te kan funksioneer op die gebied van terapeutiese voeding, gemeenskapsvoeding en voedseldiensbestuur.

BSc in Fisioterapie

Die doel van die BSc Fisioterapie-program is om ’n professionele gesondheidswerker op te lei wat toegewyd met mense werk en wat hul kliënte se vermoë om te beweeg en te funksioneer kan optimaliseer dwarsdeur hul lewensduur. Fisioterapeute werk in die gesondheidsarenas van bevordering, voorkoming, behandeling of intervensie en rehabilitasie, en werk in verskeie areas, naamlik kardiorespiratoriesefunksionering, ortopedie, neurologie, pediatrie, vrouegesondheid, bejaardes en in sport. Fisioterapeute werk onafhanklik en in spanne om die doelwitte hierbo genoem te bereik.

MBChB

Die MBChB-leerplan vir die opleiding van dokters vir internskap in Suid-Afrika het 'n intensiewe vernuwingsproses vanaf August 2017 deurloop. Dis die derde groot hersiening sedert die program in 1956 ingestel is. Die nuwe leerplan, wat deur die Gesondheidsberoeperaad van Suid-Afrika geakkrediteer is, is in 2022 vir die eerste keer met die inname van eerstejaars in werking gestel. Gebou op die sterkpunte van die vorige leeplan, lê die nuwe leeplan ‘n vaste fondament met ‘n deeglike begrip van die menslike liggaam in sy geheel neer voor studente met die behandeling daarvan begin. Studente kry vroeg in hul opleiding al met pasiënte te doen. Die nuwe leerplan fokus op holistiese sorg, insluitend die gesondheid en welwees van pasiënte en dokters. Die benaderingsverskuiwing na studentgesentreerde leer werk ‘n meer gebalanseerde en student-vriendelike leeplan in die hand. Die onderrigmetodes is leergesentreerd en maak gebruik van gevorderde multimediategnologie. 'n Klem op navorsing ontwikkel lewenslange, interngedrewe leervaardighede. Hierdie kritieke bekwaamheid verseker dat praktisyns by bly met nuwe ontwikkelings in gneeskunde en pasiënte met gemak met bewysgebaseerde geneeskunde kan behandel. Dokters wat by die Universiteit Stellenbosch afstudeer sal oor die kennis, vaardighede en gesindhede beskik om gedurende die twee internskapjare die beskikbare geleenthede optimaal te benut. Na afloop daarvan kan hulle selfstandig in die primêre gesondheidsektor funksioneer en het hulle die vermoë en insig verwerf om persoonlik en professioneel te kan ontwikkel.

Natuurwetenskappe

12 programme

B in Datawetenskap

BSc in Aardwetenskap

Hierdie program bied twee strome waaruit jy een kies: Toegepaste Aardwetenskap Geo-omgewingswetenskap Die twee strome maak meer loopbaangeleenthede moontlik. Daarom is die eerste jaar van albei strome dieselfde, maar verskil van die modules vanaf die tweede jaar.

BSc in Biodiversiteit en Ekologie

Hierdie BSc-graadprogram verskaf 'n breë opleiding in Plant- en Dierkunde. Dit fokus op die diversiteit, oorsprong en funksie van organismes in verhouding tot hul omgewing. Dit bied 'n konseptuele oorsig oor ekologie, evolusie, dier- en plantvorme en funksies, biologiese veranderinge op 'n globale skaal (klimaatsverandering, indringerspesies, besoedeling en antropogeniese faktore) en herstelmeganismes (toepassings). Beide terrestriële en mariene konsepte word gedek. Die program verskaf ook toepaslike generiese en wetenskaplike vaardighede, onder meer in gesproke en geskrewe kommunikasie, numeriese en statistiese tegnieke, navorsingsmetodologie, probleemoplossing, die evaluasie en sintetisering van wetenskaplike inligting, asook rekenaarvaardighede.

BSc in Chemie

Hierdie program bied drie strome waarvan jy een kies: Chemie en Polimeerwetenskap Chemiese Biologie of Toegepaste en Volhoubare Chemie Chemie met Chemiese Ingenieurswese Die vier strome se eerste studiejaar stem grootliks ooreen, maar Biologie is 'n verpligte eerstejaarsvak vir die stroom Chemiese Biologie.

BSc in Fisika

Hierdie program lewer afgeronde fisiese natuurwetenskaplikes met die nodige tegniese en gerigte wetenskaplike vaardighede om fisikaverwante probleme in die industrie of op navorsings- en ontwikkelingsvlak aan te pak, te fokus op die onderwys en tersiêre onderrig van wetenskap en tegnologie, of verdere nagraadse studie en intensiewe navorsing voort te sit. Die program bied drie strome waaruit jy een kies: Laserfisika (Fisiese), Laserfisika (Biologiese) Teoretiese Fisika

BSc in GeoInformatika

Toegepaste wetenskaplike beroepe soos omgewingskonsultante, beroepe in die mynbousektor en ingenieursfirmas gebruik toenemend geografiese inligtingstegnologie om ruimtelike inligting digitaal vas te lê, te manipuleer, te ontleed, te modelleer en kartografies voor te stel. Hierdie program is gerig op die teoretiese, metodologiese en praktiese aspekte van geoinformatika. Die tweede en derde jaar fokus op die vakke Geografiese Inligtingstegnologie en Rekenaarwetenskap of Sosio-Informatika en word aangevul met gepaste keusemodules. Só verwerf jy die kennis van en insig in die wetenskaplike grondslae van geoinformatika in terme van ruimtelike inligting, rekenaarvaardighede, geografiese inligtingstegnologie en karteringsvaardighede. Met hierdie vaardighede sal jy kan help om geografiese inligtingstelsels (GIS), aardwaarneming (afstandwaarneming) en globaleposisioneringstelsels (GPS) effektief in die onderskeie professionele rigtings en vakgebiede te ontwikkel en toe te pas. As GIS-spesialis en inligtingkundige kan jy 'n loopbaan op die volgende terreine of by die volgende instansies volg: omgewingskonsultante; beplannings- en ingenieursfirmas; programmatuurontwikkeling- en rekenaarkonsultasiefirmas; alle vlakke van die regering gemoeid met hulpbron- en infrastruktuurbestuur; agentskappe betrokke by natuurlikehulpbronontwikkeling en by menslike-ontwikkelingsprogramme; eksplorasie van minerale en mynwese; bemarking; nutsmaatskappye en diensverskaffers. Jy kan ook by tersiêre opleidingsinstansies as dosent en/of navorser werk.

BSc in Menslike Lewenswetenskappe

Hierdie BSc-graadprogram vorm die basis van jou opleiding in 'n rigting met fisiologie as fokus en die klem op liggaamsfunksionering op verskillende vlakke. Die program bied twee strome waaruit jy een kies: Biologie Biologie met Sielkunde Stroom: Biologie Fisiologie in kombinasie met Biochemie en Genetika, waar jy leer van fisiologiese sisteme en organe tot op molekulêre vlak, vorm die breë vakkundige basis van hierdie stroom. Jy ontwikkel eksperimentele en gerigte wetenskaplike vaardighede wat lei tot loopbaanmoontlikhede in eksperimentele en toegepaste fisiologiese dienste binne die privaat en openbare sektore of akademiese omgewing. Hierdie stroom lei tot 'n honneursprogram in Fisiologiese Wetenskappe en, met die volg van toepaslike keusemodules, ook tot honneursprogramme in Biochemie, in Genetika of in Anatomie. Stroom: Biologie met Sielkunde In hierdie stroom, wat gebaseer is op Fisiologie in kombinasie met Sielkunde, bestudeer jy die interaksie tussen die mens se psigiese en fisiologiese prosesse. Jy leer ook vaardighede aan in laboratorium- en eksperimentele tegnieke, toetsing van fisiologiese parameters en evaluering van sielkundige funksionering. Die opleiding bied loopbaanmoontlikhede in die privaat of openbare sektore, of akademiese omgewing. Hierdie stroom lei tot 'n honneursprogram in Sielkunde. Indien jy as hoërskoolonderwyser wil kwalifiseer nadat jy 'n BSc-graad verwerf het, kan jy die Nagraadse Onderwyssertifikaat (NOS) in die Fakulteit Opvoedkunde volg. Maak egter seker dat jy jou graadprogram se vakke so kies dat jy twee skoolvakke kan aanbied. Afhangende van jou voorgraadse vakkombinasie, sou jy die volgende skoolvakke kon aanbied: Lewenswetenskappe, Natuurwetenskappe, Wiskundige Geletterdheid en Lewensoriëntering.

BSc in Molekulêre Biologie en Biotegnologie

Hierdie BSc-graadprogram vorm die basis vir 'n loopbaan as molekulêre selbioloog en biotegnoloog in die privaat, openbare of akademiese sektor. Mikrobioloë, biochemici, genetici en biotegnoloë is soos speurders wat ontrafel presies hoe mikroskopiese klein selle, soos menslike selle of giste, bakterieë, fungi en virusse werk en hoe dit van toepassing is op die mens, die diere- en die planteryk. Hulle gebruik dan hierdie kennis om siektevrye gewasse, nuwe medisynes of toetse vir siektes te ontwikkel, of te bepaal watter ensieme of bakterieë nuttig in industrieë soos die mynbousektor gebruik kan word, of in die ontwikkeling van biobrandstof. Hulle kennis word ook aangewend in afvalwaterbestuur en die watersuiweringsektor. Die program gee jou 'n breë, vakkundige agtergrond om die werking van enige lewende organisme op molekulêre vlak te verstaan. Saam met hierdie teoretiese opleiding doen jy baie laboratoriumwerk, wat jou eksperimentele en gerigte wetenskaplike vaardighede ontwikkel. Afhangend van jou voorgraadse vakkombinasie, kan hierdie stroom lei tot 'n honneursprogram in Biochemie, Genetika, Plantbiotegnologie of Mikrobiologie.

BSc in Rekenaarwetenskap

Die BSc in Rekenaarwetenskap-program rus jou toe met ’n uitgebreide kennis van rekenaarwetenskap, insluitend programmering, rekenaarstelsels, databasisse, netwerke, bedryfstelsels en gelyklopende programmering. Na afloop van die driejarige program sal jy verder kan studeer met die oog op ’n beroep in die industrie as programmeerder of in verskeie ander sagteware-, data- en tegnologieverwante rolle. 'n Graad in Rekenaarwetenskapgraad is ’n internasionale kwalifikasie waarmee jy vir nasionale of internasionale maatskappye sal kan werk of navorsing doen. ’n Verskeidenheid maatskappye maak van tegniese rekenaarspesialiste gebruik – van finansiële instellings wat sekuriteit moet waarborg tot maatskappye wat mobiele oplossings vir selfone ontwikkel. As jy ’n belangstelling in die besigheidswêreld het, kan jy ook as entrepreneur ’n eie besigheid begin wat rekenaaroplossings verskaf, of as onafhanklike konsultant of kontrakteur werk.

BSc in Sportwetenskap

Die fokus van hierdie program is 'die mens in beweging'. Dit word bestudeer vanuit 'n fisiologiese, biomeganiese, sielkundige, motoriese, filosofiese, sosiologiese en ekonomiese perspektief. Die inhoud van die program sluit die volgende in: toegepaste anatomie, toegepaste biomeganika, motoriese leer, sportsielkunde, sportetiek, sportbeserings, programontwikkeling, aangepaste bewegingsprogramme, en die fiksheidsbedryf. Hierbenewens volg jy ook, onder andere, Biochemie en Fisiologie.

Teologie

2 programme

BDiv (Baccalaureus in Godgeleerdheid)

Die vierjarige BDiv-graad bied voorgraadse opleiding in kerklike bediening, spesifiek vir predikante.

BTh (Baccalaureus in Teologie)

Die BTh-graad is 'n drie-jarige program wat mense veral as jeugwerkers, dienswerkers, beraders en gemeenskapswerkers oplei.