Toegangskaartjies en aankomstyd
Aankomstyd
Die Coetzenburg-sentrum se deure sal 'n uur voor die aanvang van die plegtigheid open. Jy én jou gaste word vriendelik versoek om niks later nie as 30 minute voordat die plegtigheid begin, reeds julle sitplekke in te neem.
Alle graduandi moet direk na die Coetzenburg-sentrum gaan. Maak seker dat jy jou gehuurde akademiese drag by jou het. Jou toegangskaartjie sal jou toegekende sitpleknommer insluit, en jy sal jou aankondigingskaart op jou sitplek vind.
Toegangskaartjies vir gaste
Die Coetzenburg-sentrum se populasiesertifikaat bepaal die maksimum aantal mense wat op enige gegewe tydstip in die lokaal toegelaat word. Aangesien dit 'n wetlike vereiste is, kan die Universiteit slegs 'n vasgestelde aantal gastekaartjies per graduandus uitreik:
- Voorgraadse en honneursgraduandi: twee gaste
- Meestersgrade: drie gaste
- Doktorsgrade: vier gaste
Aangesien ons geen bykomende kaartjies kan uitreik nie, nooi ons familie en vriende uit om die plegtighede aanlyn by www.su.ac.za/streaming te volg.
Kaartjieskedule
Jou toegangskaartjies (jou eie en jou gastekaartjies) sal vanaf Donderdag, 19 Maart 2026 per e-pos aan jou amptelike @sun.ac.za-adres gestuur word. Jy kan verwag om jou kaartjies een of twee dae voor jou plegtigheid te ontvang.
As jy nie die e-pos nie ontvang nie, kan jy steeds jou kaartjies op die dag van jou plegtigheid by die inligtingskiosk by die Coetzenburg-sentrum afhaal. Maak asseblief seker dat julle genoeg tyd het om die kaartjies af te haal en betyds (minstens 30 minute voordat die plegtigheid begin) julle sitplekke kan inneem.
Indien jy aangedui het dat jy in absentia gaan gradueer, sal jy steeds jou kaartjies per e-pos ontvang vir ingeval jy van plan sou verander.
Kaartjies kan gedruk of op selfone gestoor word en moet by die deur getoon word. Let daarop dat hierdie reëling vir graduandi én gaste geld.
‘Kaartjiehandel' is verbode
Indien jy nie jou gradeplegtigheid gaan bywoon nie, mag jy nie jou kaartjies verkoop, of aan 'n ander graduandus of gas oordra nie. Dit is streng verbode. Deur dit te doen, stel jy jou ingevolge die Kode vir Studentedissipline aan dissiplinêre stappe bloot, en die bykomende kaartjies kan gekanselleer word.
Lokaaletiket
Kom ons werk saam om te verseker dat al ons graduandi en gaste die beste moontlike ervaring het:
1. Wees asseblief betyds. Mense wat laat aankom, selfs diegene met toegangskaartjies, kan toegang tot die lokaal geweier word.
2. Gun al ons graduandi (en hulle gaste) die geleentheid om hul prestasies te vier deur tot aan die einde van die plegtigheid te bly sit.
3. Slegs ongegeurde water word in die lokaal toegelaat; geen kos of ander drankies nie.
4. Gradeplegtighede is lank en kan vermoeiend vir voorskoolse kinders wees. Ons moedig julle aan om alternatiewe reëlings te tref vir die versorging van klein kindertjies. Indien dit nie moontlik is nie, onthou asseblief dat elke persoon wat die lokaal binnekom, insluitende kleuters, 'n kaartjie moet hê.
5. Indien jy beplan om 'n privaat fotograaf in die lokaal in te bring, moet hulle ook 'n toegangskaartjie hê wat uit jou toegekende aantal gastekaartjies sal moet kom. Ons vra vriendelik dat privaat fotograwe daarop bedag sal wees om nie afbreuk te doen aan die verrigtinge of amptelike fotograwe in die uitvoering van hulle pligte sal steur nie.
6. Gaste wat sonder kaartjies by die Coetzenburg-sentrum opdaag, sal in twee oorlooplokale in die Sportwetenskapgebou (nr 9 op die parkeerkaart), direk agter die Coetzenburg-sentrum, gehuisves word, waar hulle die plegtigheid via die regstreekse stroomuitsending sal kan volg.
Indien jy enige verdere vrae het, stuur gerus 'n e-pos aan ons by [email protected].