Blessed Muyanga het gegradueer met 'n baccalaureusgraad in wetenskap. Sy benarde situasie tydens sy studies het 'n fondsinsamelingsveldtog aan die gang gesit wat meer as R180 000 vir behoeftige wetenskapstudente ingesamel het. Eerstejaardosent dr. Marietjie Lutz het die Wheels of Opportunity-inisiatief begin toe sy besef het dat Muyanga een van vele studente met finansiële uitdagings was.

Handré Muller het met ’n meestersgraad in die fisiologiese wetenskappe aan die Universiteit Stellenbosch gegradueer. ’n Skooluitreikbesoek deur US-akademici het haar passie vir wetenskap aangewakker en haar op ’n pad na navorsing geplaas. Haar prestasies toon die krag van mentorskap, deursettingsvermoë en die langtermyn-impak van belegging in jong intellekte.

Die tweelingsusters Clio en KD Sass gradueer op dieselfde dag aan die Universiteit Stellenbosch, dekades nadat hulle ma se studies deur apartheid ontwrig is. Hulle ma, wat aan kanker gesterf het toe hulle baie klein was, is vir anti-apartheidsaktivisme aangehou en gedwing om haar mediese graad te laat vaar voordat sy later ʼn BSc in dieetkunde voltooi het. Vir die susters eer hulle mylpaal hulle ouers se opofferings en hulle ma se nalatenskap van veerkragtigheid.

Al is haar planne dalk vertraag, het Caitlin Leigh Sampson teenspoed oorkom om cum laude te gradueer. Sy gradueer net drie weke nadat sy geboorte geskenk het. Sampson hoop om haar twee seuns te inspireer om hulle nie deur hindernisse in die nastrewing van hulle drome te laat onderkry nie.

Casey-Lee Anthony het in Kimberley grootgeword, maar het gedroom om eendag ʼn tydskrifredakteur in New York te word. Sy het in 2021 die eerste keer vir ʼn honneursgraad in joernalistiek aan die US aansoek gedoen, maar is nie gekeur nie. Dié vasberade aspirant-joernalis het volhard, praktiese media-ervaring opgedoen en toe by die US se Joernalistiekklas van 2025 aangesluit wat vandeesweek gradueer.

Prof Abdulrazak Gurnah het die graad Doktor in die Letterkunde (DLitt), honoris causa, ontvang. Vereer vir verryking van wêreldliteratuur met stories wat kulture verbind en ons gedeelde menslikheid openbaar. Hy beklemtoon hoe die geesteswetenskappe ons help om moeilike tye te hanteer.

Verwerf doktorsgraad in Afrikaans en Nederlands. Moes verskeie uitdagings oorkom op haar pad na sukses. Wil help om gemeenskappe soos Atlantis ʼn stem te gee.

Dr Elana Ryklief, ’n NNS-beurhouer, het met ’n PhD in Engelse Studie aan die US gegradueer en die graad in net drie jaar voltooi. Haar navorsing put uit haar geleefde ervaring as ’n transgender vrou om oorheersende narratiewe oor geslagsoorgang en verteenwoordiging uit te daag. Sy het in Steenberg grootgeword en is die eerste bruin transgender vrou uit die gemeenskap wat ’n PhD van die Universiteit se Departement Engels verwerf het.

Sunelle Hanekom, 'n jare lange personeellid by die Stellenbosch Besigheidskool, het vandeesweek haar MPhil-graad in Wetenskap- en Tegnologiestudie ontvang. Nadat sy haar loopbaan as tikster en PA begin het, het sy later in haar lewe na formele studie teruggekeer en haar meestersgraad met vlieënde vaandels geslaag. Sy het gedurende die laaste maande van haar studie deur diep waters gegaan nadat haar man 'n beroerte gehad het, maar sy het deurgedruk.

Wat as ’n stokperdjie begin het om pyn te hanteer, het in ’n akademiese reis ontwikkel. Om met ’n chroniese siekte te leef, het Annie de Villiers daartoe gelei om troos in voëlkyk te vind. Sy het wyd gereis om die sogenaamde “kraanvoël-evangelie” oor die belangrikheid van ons nasionale voël as ’n historiese ikoon te deel.