Spraakterapeut en Universiteit Stellenbosch (US) alumna, Qhawekazi Mazelani, is onlangs as die nuwe Mej Suid-Afrika gekroon. Nou is sy op 'n missie om van Suid-Afrika se grootste uitdagings aan te pak.

Net nadat sy op Saterdag 25 Oktober as die 67ste Mej SA gekroon is, het die voormalige Matie (24), wat van Oos-Londen afkomstig is, haar toewyding beklemtoon om die gapings in opvoeding in die land te oorbrug deur inklusiewe onderrig te bevorder, en gesê dat dit "net die begin" is van haar reis van impak regoor die land.

Kort na haar oorwinning het Mazaleni dit duidelik gemaak dat sy haar termyn op vrouebemagtiging, jeugwerkloosheid en burgerlike betrokkenheid sal fokus. "Ek gaan 'n nalatenskap van verandering skep," het sy aan jubelende skares gesê nadat sy by die SunBet Arena in Tshwane gekroon is.

Dr Berna Gerber, Afdelingshoof: Spraak-Taalterapie aan die US se Fakulteit Geneeskunde en Gesondheidswetenskappe (FGGW), het Mazaleni se kroning as "wonderlike nuus" beskryf.

Mazaleni, wat tans haar Meestersgraad in Spraak-Taalpatologie met 'n fokus op Outisme aan die Universiteit van Pretoria doen, is gretig om haar nuwe platform te gebruik om voorspraak te maak vir meer inklusiewe spraakterapiedienste.

Op haar LinkedIn-platform meld sy haar passie vir spraakterapie en hoe dit "wetenskap met uitdrukking kombineer". Sy is onwrikbaar dat kinders toegang moet hê tot die ondersteuning wat hulle benodig, "ongeag hul kulturele en taalkundige agtergronde".

“In my matriekjaar het ek loopbaannavorsing gedoen en 'n groot gaping in die toeganklikheid en beskikbaarheid van spraakterapiedienste in ons land gevind as gevolg van die oorvloed tale wat ons het en die gaping in gelykheid. Ek is gretig om hulpbronne te skep om dié gaping aan te spreek.”

Mazaleni, wat tans in Randburg woon, praat isiXhosa, Engels en Afrikaans en leer Sepedi en isiZulu. As 'n sterk voorstander van die krag van multikulturele storievertelling, is sy die outeur van 'n selfgepubliseerde kinderboek in isiXhosa genaamd Amasele Amdaka, wat daarop gemik is om kinders te help om te leer lees en skryf.

Mazaleni, die jongste van drie dogters, het in Gonubie, Oos-Londen, grootgeword. Haar ma, wat Sotho is, het as 'n klerk by die Departement van Onderwys gewerk, en haar isiXhosa-pa is 'n bestuurder by Eskom. Sy het by Beaconhurst Hoërskool skool gegaan, waar sy die eerste keer aan skoonheidskompetisies begin deelneem het. Dit was in die Oos-Kaap waar sy sê haar sterk gemeenskapsgevoel ontwikkel het.

Sy het haar Baccalaureusgraad in Spraak-Taalterapie aan die US in 2023 voltooi, voordat sy by die Universiteit van Pretoria ingeskryf het vir 'n Meestersgraad in Spraak-Taalpatologie. Sy het nog altyd ʼn balans gehandhaaf tussen haar studies en modelloopbaan. Haar suster, Homba Mazaleni (25), 'n sportwetenskaplike, het in 2023 in die top vyf in die Mej SA-kompetisie geëindig, wat die susters die eerstes maak om so 'n prestasie in die kompetisie te behaal.

Mazaleni se doelwitte sluit in om uiteindelik aan onderwysbeleid te werk, met die hoop om vaardigheidsopleiding en werkskepping in landelike gebiede te bou. Sy hoop ook om programme wat op vroue en die jeug gemik is, te bevorder. Sy is ook vasbeslote om die wydverspreide gevoel van hopeloosheid onder die jeug te verbreek, en om meisies en jong vroue in Suid-Afrika aan te moedig om "te waag om te droom".

Mazaleni, wat verlede jaar haar eerste halfmarathon gehardloop het, hekel haar eie klere, lees tans Paulo Coelho se The Alchemist vir die vierde keer en luister na Isitifiketi deur Jabulile Majola “op herhaal”. In 'n onderhoud het sy gesê sy glo skoonheidskompetisies is goed vir selfontwikkeling en persoonlike groei, asook om 'n geleentheid te skep om 'n impak op die samelewing te maak.

In 'n land met 'n tekort aan rolmodelle uit hul eie gemeenskappe, kan jong vroue hulself sien in skoonheidskompetisies, en hierdie verteenwoordiging gee hulle toestemming om te droom, het sy in een onderhoud gesê.

Dr Gerber van die US het gesê: “Ons is ongelooflik trots op Qhawekazi se prestasie en diep geïnspireer deur haar voortgesette voorspraak vir die spraak-taalterapieberoep, onderwys en kontekstueel relevante intervensie vir mense met gestremdhede.

“Qhawekazi se prestasie weerspieël so mooi die gehalte en omvang van ons gegradueerdes se impak, en ons is verheug om hierdie oomblik as 'n Afdeling, Departement en Fakulteit te vier.”