Die Universiteit Stellenbosch Botaniese Tuin (SUBG) sal amptelik sy eerste permanente kunsversameling, die James & Shirley Sherwood Botaniese Kunsversameling, in Mei 2026 bekendstel. Die versameling sal in die histories belangrike SUBG-kantoorgebou gehuisves word, waar die kunswerke van talle top Suid-Afrikaanse botaniese kunstenaars uitgestal sal word.

Die versameling vang die skoonheid en diversiteit van Suid-Afrika se flora vas, terwyl dit aandag vestig op plante wat toenemend in gevaar is. Deur die kombinasie van kuns, wetenskap en bewaring, poog die projek om die verbintenis met die Kaap se uitsonderlike planterfenis te verdiep, plaaslike botaniese kunskapasiteit te versterk en groter bewustheid van die dringende behoefte aan plantbewaring te inspireer.

Botaniese kuns by die SUBG is in 2023 geïnisieer deur die Spesialis Botaniese Kunskurator Karen Stewart, en wyle dr. Donovan Kirkwood, voormalige Kurator van SUBG. Die twee het die waarde van botaniese kuns erken om die dikwels vlietende skoonheid van plante oor te dra, om mense te inspireer om met die natuur te skakel, en sodoende bewustheid te verhoog van die bewaringsbehoeftes van baie plante. Sedert 2023 bied SUBG 'n jaarlikse Botaniese Kuns- en Fotografie-uitstalling aan, wat die grondslag lê vir die vestiging van hierdie permanente botaniese kunsversameling. Die James & Shirley Sherwood Botaniese Kunsversameling sal skilderye insluit deur van Suid-Afrika se top- en vroeë-loopbaan botaniese kunstenaars, elke werk gekoppel aan die tuin se bewaringsversamelings.

SUBG is die tuiste van meer as 200 versamelings van plantspesies wat met uitsterwing bedreig word. Baie van hierdie plante is ontoeganklik in hul natuurlike habitat en kan slegs gesien word wanneer die tuin besoek word. 'n Aantal plante in hierdie spesiale versamelings is egter dormant in die somer, en lyk verwaarloos of verdwyn heeltemal vir etlike maande. Die kunswerke in die James & Shirley Sherwood Botaniese Kunsversameling sal 'n kragtige herinnering skep aan die seisoenale skoonheid van hierdie plante en besoekers inspireer om die natuur deur alle seisoene te waardeer. Baie plantspesies in die SUBG-versamelings is nog nooit tevore geïllustreer nie en baie word uiters bedreig of word nou eers formeel deur die wetenskap beskryf.

'n Unieke geleentheid vir botaniese kunstenaars

Die ondersteuning en bevordering van botaniese kunstenaars is sentraal tot hierdie projek. As sodanig sal deelnemende kunstenaars spesiale toegang kry tot seldsame lewende plantversamelings, hulle sal ook ondersteuning ontvang van SUBG-kundiges en akademiese vennote om hul wetenskaplike begrip te versterk en die belangrikheid van akkuraatheid in botaniese illustrasies te beklemtoon. Botaniese kunstenaars in hul vroeë loopbaan sal spesiale ondersteuning ontvang deur 'n mentorskapprogram gelei deur ervare Suid-Afrikaanse botaniese kunstenaars.

Deur hierdie inisiatief hoop die SUBG om die James & Shirley Sherwood Botaniese Kunsversameling formeel te vestig as die enigste formele wetenskaplike institusionele tuiste vir botaniese kuns in Suid-Afrika.

Skenkingsgeleentheid

Kunstebeskermhere en korporatiewe vennote word genooi om deel te wees van 'n gesogte, hoëprofielprojek wat die kosbare flora van die Kaap en Suid-Afrika sal dokumenteer. Die kunswerke sal permanent gehuisves, saamgestel en versorg word deur 'n spesialisspan by SUBG.

Oor die span

Hierdie samewerkingsprojek is die inisiatief van Karen Stewart M.Phil (spesialiserend in Botaniese Illustrasie) en voorsitter van die Botaniese Kunstenaarsvereniging van Suider-Afrika se Kaapse tak; dr. Donovan Kirkwood (PhD Plantkunde-ekologie), voormalige kurator van die SUBG; Annerie Senekal (waarnemende kurator van SUBG); Martine Robinson B (Arch), 'n gerespekteerde Suid-Afrikaanse botaniese kunstenaar wat fokus op seldsame en bedreigde geofiete, en akademiese vennoot prof. Léanne Dreyer, kenner van die mega-diverse Kaapse Oxalis . Vicki Thomas en Chris Lochner dien op die projek se keuringspaneel.

Kontak

Befondsers kan 'n gedetailleerde voorstel en begrotingsprojeksie-inligting van Annerie Senekal hier aanvra . 

Kunstenaars wat wil aansoek doen om by die projek betrokke te raak, kan die kunskurator: Karen Stewart, e-pos . 

Vir projekbesonderhede en opdaterings, klik asseblief hier en volg ons op Instagram: @subotgarden