Die Fakulteit Geneeskunde en Gesondheidswetenskappe (FGGW) aan die Universiteit Stellenbosch gaan dwarsdeur 2026 ʼn merkwaardige mylpaal vier: 70 jaar van die bevordering van gesondheid, die transformasie van lewens en die vorming van die toekoms van gesondheidsorg in Suid-Afrika en verder.

Die tema van die FGGW se 70ste verjaarsdagveldtog, “Nalatenskap as Impak”, word vergestalt deur ʼn reeks uitstallings, stories en geleenthede wat die Fakulteit se geskiedenis vereer terwyl toekomstige moontlikhede tegelyk bekyk word.

Die FGGW het sedert sy totstandkoming ontwikkel tot een van Afrika se toonaangewende sentrums vir geneeskunde- en gesondheidswetenskappe-onderrig, navorsing en gesondheidsorginnovasie. Duisende professionele gesondheidsorgwerkers is opgelei, baanbrekersnavorsing is nagejaag en gesondheidstelsels is deur betekenisvolle vennootskappe en gemeenskapsbetrokkenheid versterk. Hierdie herdenkingsjaar bied ʼn geleentheid om oor dié prestasies na te dink en die mense, idees en samewerking te vier wat steeds die Fakulteit se impak definieer.

Die jaar het begin met ʼn fokus op transformasie, deur te ondersoek hoe die FGGW moontlikhede opnuut gedefinieer het deur inklusiewe leierskap, billike toegang tot onderwys en toewyding tot die bou van ʼn diverse en verteenwoordigende gesondheidsorgwerksmag.

ʼn Fokus op internasionalisering benadruk sterk globale verbintenisse, van samewerkende navorsingsinisiatiewe tot uitruilprogramme wat leer verryk en studente en personeellede se perspektiewe verbreed.

In April het die kollig op leer en onderrig geval en word die innovasie en uitnemendheid ten grondslag van ons opvoedkundige benadering gevier: van die nuutste leertegnologieë tot progressiewe onderrigmetodologieë wat ontwerp is om aan die komplekse eise van moderne geneeskunde te voldoen.

Mei, die amptelike verjaardagmaand van die Fakulteit, is ʼn geleentheid om 70 jaar van vooruitgang en vennootskappe te vier. Kollegas, vennote en ondersteuners wat gehelp het om die FGGW-reis te vorm sal op ʼn galadinee byeenbring word.

In Junie vier die Fakulteit Jeugmaand, deur erkenning te gee aan die jongmense wat die toekoms van gesondheidsorg vorm en deur ʼn herbevestiging van die FGGW se verbintenis tot die koestering van die volgende generasie gesondheidsleiers en die bemagtiging van studente om verandering binne hul gemeenskappe te bevorder.

In Julie verskuif die fokus na sosiale impak en ons blywende toewyding tot gemeenskapsbetrokkenheid en -diens deur middel van uitreikprogramme, vennootskappe en pasiëntgesentreerde inisiatiewe.

Navorsing is die hooffokus in Augustus, met die viering van baanbreker-studies en -innovasies wat uit die Fakulteit gespruit het. Dit sluit alles in van biomediese ontdekkings tot openbare gesondheidsinnovasies om van die dringendste gesondheidsuitdagings van ons tyd aan te pak.

Die FGGW bring ook hulde aan sy alumni en verleen erkenning aan gegradueerdes wat waardevolle bydraes tot die plaaslike en internasionale gesondheidsorgsektor gelewer het. Hul prestasies dien as ʼn bewys van die blywende invloed van die FGGW se onderrig en opleiding.

In Oktober verskuif die aandag na deurbraakprestasies deur die tentoonstelling van beduidende vooruitgang en ontdekkings deur die Fakulteit se innovasie-inisiatief. Tydens die NextGen Maties Opedag sal voornemende studente ook verwelkom word om geleenthede by die FGGW te verken, terwyl ʼn spesiale afskeidsviering gehou sal word om aftredende personeellede te vier wat gehelp het om die Fakulteit se nalatenskap te vorm.

Met inagneming van alles wat bereik en geleer is, kyk die FGGW ook vorentoe en besin oor sy toekomsvisie: Die bevordering van gesondheid en geneeskunde in Suid-Afrika, die najaag van innovasie en die versterking van gesondheidsorgstelsels bly die kern van sy verbintenis tot uitnemendheid.

Etlike spesiale geleenthede dwarsdeur die jaar sal hierdie temas vergestalt, van ons “Birthday4Bursaries”-inisiatief vroeër in die jaar tot lewendige koffie-makieties, ʼn toewydingsplegtigheid wat gedeelde waardes en globale verbintenisse vier, en vele meer.

Tesame sal hierdie oomblikke van nadenke, viering en betrokkenheid nie net die kollig laat val op hoe ver die Fakulteit Geneeskunde en Gesondheidswetenskappe oor die afgelope 70 jaar gevorder het nie, maar ook op die opwindende reis wat voorlê. Terwyl ons besin oor ons “Nalatenskap as Impak”, nooi ons die FGGW se gemeenskap van studente, personeel, alumni en vennote uit om deel te neem aan ʼn jaar wat die verlede eerbiedig terwyl dit die toekoms inspireer.