Die Fakulteit Ingenieurswese aan die Universiteit Stellenbosch (US) het ʼn merkwaardige prestasie behaal by die heel eerste IPMA Suid-Afrika Projekbestuurskampioenskap, waar US-spanne die eerste én tweede plek in die nasionale eindronde in November ingepalm het. Die kompetisie, wat vir die eerste keer in Suid-Afrika aangebied is, het top voorgraadse spanne van die US en die Universiteit van Kaapstad (UK) byeengebring om onder uiterse tydsdruk aan ʼn realistiese gevallestudie te werk. Ses spanne het ingeskryf – drie van SU en drie van UCT. Vyf spanne het uiteindelik op die dag meegeding.

Die wenspan, Risky Business, bestaande uit Thomas Kirby, Johann Wahl, Tariq de Klerk en Mia Ham, is almal BIng finalejaar studente van die Departement Meganiese en Mechatroniese Ingenieurswese. Hulle het die beoordelaars met hul strategiese benadering, spanwerk en professionele aanbieding oortuig. 

In die tweede plek was die US-span Solid Ground Projectors, bestaande uit finalejaar BIng Siviele Ingenieurwese studente Louis Nel, Logan Strydom, Isabella van Niekerk en Shane Teek, wat die Universiteit net so sterk verteenwoordig het.

Die spanne het ʼn komplekse gevallestudie van die Stad Kaapstad ontvang en slegs drie uur gehad om die situasie te ontleed, ʼn volledige projekplan te ontwikkel en dit voor ʼn paneel deskundiges aan te bied. Die kompetisie het hoë vlakke van kritiese denke, tegniese vaardigheid en samewerking vereis – alles kenmerke van suksesvolle projekbestuurders.

Een van die beoordelaars was prof Taryn Bond-Barnard, medeprofessor in die Departement Bedryfsingenieurswese en akademiese programkoördineerder vir die gestruktureerde meestersgraad in Ingenieursbestuur (Masters in Engineering Management (MEM)) aan die US. Sy het saam met twee senior projekbestuurders van die Stad Kaapstad, mnr Adrian Dobbin en mnr Ryan Issacs, die beoordeling behartig. Haar betrokkenheid beklemtoon die sterk koppeling tussen die fakulteit se opleiding en die praktiese verwagtinge van die bedryf.

Die kampioenskap het in parallel saam met die IPMA-SA HOPE-beraad plaasgevind, wat studente die geleentheid gegee het om met kundiges te skakel, mentorskap te ontvang en waardevolle netwerke te bou – ʼn betekenisvolle brug tussen teorie en praktyk.

Met die sukses van hierdie eerste nasionale rondte word daar in 2026 selfs groter deelname verwag, met meer universiteite wat waarskynlik sal aansluit. Volgende jaar sal die beraad ook sy eerste akademiese navorsingstema insluit, onder leiding van prof Bond-Barnard, om sterker samewerking tussen akademia, die bedryf en opkomende projekleiers te bevorder.

Die prestasie weerspieël die gehalte van die Fakulteit se PM412-projekbestuursmodule, wat daarop gemik is om studente toe te rus met tegniese vaardigheid, spanwerkvermoë en die kapasiteit om onder druk te presteer. Dit is ook ʼn erkenning aan die akademiese personeel en ondersteuningspanne wat die studente voorberei het.

Volgens prof Bond-Barnard het die kompetisie duidelik gewys dat die US oor uitsonderlike voorgraadse projekbestuurtalent beskik, en dat die studente se werk die gehalte van die program sterk bevestig.

Die wenners is tydens die nasionale IPMA-toekenningsgeleentheid erken, wat die dag afgesluit en die waarde van samewerking en strategiese probleemoplossing uitgelig het.

Vir verdere inligting, besoek gerus: 

• https://www.ipma-sa.org/pm-competition
• https://www.hopesummit.co.za/