Sewentig jaar gelede het die Universiteit Stellenbosch 'n visie verwesenlik om 'n plek te skep waar die bevordering van menslike gesondheid die grondslag lê waarop onderrig en leer in diens van die samelewing gebou is.

In die jare sedertdien het die Fakulteit Geneeskunde en Gesondheidswetenskappe (FGGW), gesetel op die universiteit se Tygerberg-kampus, gegroei en ontwikkel om gesondheidsorgleiers te inspireer, beide in Suid-Afrika, op die Afrika-kontinent en wêreldwyd.

Vandag vier ons daardie 70 jaar met 'n jaarlange viering van wat voorheen gegaan het en wat nog gaan kom.

Die FGGW-dekaan, Professor Elmi Muller, het die volgende te sê oor hierdie mylpaal: “Oor sewe dekades het ons gegroei tot 'n nasionaal en internasionaal gerespekteerde instelling - wat generasies van gesondheidswerkers oplei, navorsing lewer wat reageer op Suid-Afrika se dringendste gesondheidsuitdagings, en deernisvolle sorg lewer aan die gemeenskappe wat ons bedien. Van ons vroegste pioniers tot vandag se innoveerders, is ons impak nog altyd gedryf deur 'n gedeelde toewyding aan menslikheid, integriteit en diens.”

Deur die loop van die jaar sal studente, alumni en besoekers feestelike versierings regoor die kampus sien, wat die studente en alumni vier wat ons nalatenskap tot lewe gebring het. 'n Aantal geleenthede sal ook gedurende die jaar plaasvind om hierdie mylpaal saam met die Tygerberg-gemeenskap en belanghebbendes te vier.

“Hierdie mylpaal behoort aan elke lid van die Tygerbergkampusgemeenskap. Ons studente, wie se nuuskierigheid en veerkragtigheid ons missie vorentoe dra, en ons personeel, wie se toewyding en kundigheid die Fakulteit se blywende krag gebou het. Saam met ons vennote en alumni het ons ons invloed wêreldwyd uitgebrei,” sluit Muller af.

Vandag het die FGGW 'n tasbare impak op gesondheidsorg op alle vlakke van die samelewing: van baanbrekersnavorsing tot die vorming van gesondheidsbeleid, riglyne en praktyk, tot sorg op grondvlak wat reg in gemeenskappe gelewer word. Ons sien saam uit na die impak wat die Fakulteit oor die volgende 70 jaar sal hê.