Twee nagraadse studente van die Departement Elektriese en Elektroniese Ingenieurswese aan die Universiteit Stellenbosch het internasionale erkenning verwerf by een van die wêreld se mees toonaangewende kompetisies vir oudio-masjienleer.

Christiaan Geldenhuys (PhD-kandidaat) en Günther Tonitz (Meestersstudent) het algeheel tweede plek behaal by BioDCASE 2025, die gespesialiseerde bioakoestiek-afdeling van die IEEE Detection and Classification of Acoustic Scenes and Events (DCASE)-uitdaging.

DCASE, georganiseer deur die IEEE Audio and Acoustic Signal Processing (AASP)-gemeenskap, word wêreldwyd erken as ʼn gesaghebbende kompetisie in masjienleer vir oudio-analise. BioDCASE 2025 het spanne uitgedaag om gevorderde algoritmes te ontwikkel wat in staat is om die roepseine van Antarktika se blouwalvis en vinwalvis in komplekse onderwateropnames op te spoor.

Die datastel het uit sewe roepklasse bestaan; evaluering is egter op ’n gekonsolideerde vlak gedoen, wat vereis het dat modelle tussen drie groepe klasse onderskei word. Die taak was besonder veeleisend weens lae sein-tot-geraas-verhoudings oor meerjarige Antarktiese datastelle, met walvisroepseine wat slegs ongeveer 5% van die tyd voorkom (5,1%-gebeurtenisverhouding).

Hierdie navorsing ondersteun langtermyn akoestiese monitering van walvispopulasies wat besig is om te herstel van byna-uitwissing as gevolg van industriële walvisjag, en demonstreer die kragtige rol van ingenieurswese en masjienleer in mariene bewaring.

Die Stellenbosch-span het teen ses internasionale navorsingspanne meegeding en die tweede beste tegniese prestasie behaal. By die BioDCASE-werkswinkel in Barcelona, Spanje, het hul eweknie-geëvalueerde artikel die Jury Award vir die beste artikel ontvang – ’n toekenning wat onafhanklik van die algehele kompetisie-uitslae toegeken word.

Onder toesig van prof Thomas Niesler het die span hul werk verder uitgebrei en later nog ʼn Beste Artikel-toekenning ontvang by die Southern Africa Telecommunication Networks and Applications Conference (SATNAC) 2025.

Hierdie prestasies beklemtoon die gehalte van gevorderde seinverwerking- en masjienleer-navorsing binne die Fakulteit Ingenieurswese, en getuig van die Universiteit Stellenbosch se groeiende internasionale impak in oudio-masjienleer en omgewingsmonitering.

Geluk aan Christiaan, Günther en prof Niesler met hierdie uitsonderlike prestasie.