Ilhaam Groenewald, hoofdirekteur van Maties Sport, is gister met die Universiteit Stellenbosch se Kanselierstoekenning vir Uitnemendheid bekroon.

Groenewald, wat die afgelope 30 jaar intensief gewerk en haar lewe aan sport toegewy het, was baie verheug oor die erkenning wat sy ontvang het en het gesê: “Dit is inderdaad 'n eer om hierdie gesogte toekenning te ontvang en ek bedank my Maties Sport-span, die universiteit en Suid-Afrikaanse sportkollegas vir hul ondersteuning, leiding en uitdagings wanneer nodig. Hierdie toekenning dien as 'n herinnering aan my verantwoordelikhede as 'n werknemer en 'n leier in sport.”

Maties Sport was bevoorreg om 'n leier te hê wat gefokus is op 'n holistiese benadering vir haar student-atlete en personeel, met transformasie as van die uiterste belang. Verder het sy met haar leiding gehelp om 'n omgewing te skep wat aantreklik en winsgewend vir die buitewêreld is, wat die Universiteit Stellenbosch een van die voorste bestemmings van keuse vir baie sportspanne maak.

Sy het talle leiersrolle in Suid-Afrika beklee, waaronder die ere-visepresident van University Sports South Africa (USSA), waar sy as president en in ander uitvoerende hoedanighede gedien het. Sy was Chef de Mission/Hoof van die Afvaardiging vir Team South Africa World Student Games en die voorsitter van die plaaslike organiseringskomitee vir groot geleenthede (plaaslik en internasionaal). Haar leierseienskappe is verder gedemonstreer toe sy verlede jaar verkies is om op die raad van die Suid-Afrikaanse Sportkonfederasie en Olimpiese Komitee (SASCOC) te dien en tans voorsitter is van die SASCOC-subkomitees vir Onderwys en Kultuur, Afrigting en 'n lid van die Vergoedingskomitee.

Groenewald is deur ander liggame erken vir haar werk in sport, sommige van haar noemenswaardige toekennings sluit in die Universiteit van die Wes-Kaap Dekaan se Merietetoekenning; die Universiteit van die Wes-Kaap Kanselier se Uitstaande Alumni-toekenning; verskeie administrasie- en leierskapserkennings en die Sport & Recreation South Africa Ministeriële Toekenning in 2019.

Baie geluk aan ons Hoofdirekteur Ilhaam Groenewald, hierdie toekenning is uiters welverdiend en almal by Maties Sport is trots om deur so 'n goed afgeronde leier in sport gelei te word!