Die Universiteit Stellenbosch (US) tel onder die wêreld se voorste universiteite op twee wêreldwye ranglyste wat in dieselfde maand vrygestel is.

Die US verskyn vir die derde keer die afgelope vier jaar onder die top 300 universiteite op die QS-wêreldranglys vir universiteite (QS WUR). Die jongste QS-wêreldranglys is Donderdag 18 Junie 2026 vrygestel.

Die US was vroeër vandeesmaand op die Centre for World University Rankings (CWUR) se ranglys ook onder die top 2,2% instellings wêreldwyd. 

Die US verskyn in die 296ste plek wêreldwyd op die 2027-weergawe van die QS WUR, wat verbeter op verlede jaar se 302ste plek. Die US beklee die derde plek in Suid-Afrika (en in Afrika) – dieselfde as verlede jaar – en is ook die voorste universiteit in aanhalings per fakulteit in Suid-Afrika en tweede in akademiese reputasie.

Die instelling het goed gevaar deur sy algehele telling te verbeter. Hierdie telling is die somtotaal van die tellings wat universiteite in elk van die nege aanwysers of kategorieë behaal wat gebruik word om universiteite te beoordeel. In vergeleke met verlede jaar, het Stellenbosch ook sy plek op die wêreldranglys in drie van die nege aanwysers verbeter: akademiese reputasie, aanhalings per fakulteit en internasionale navorsingsnetwerk. Dit het egter in die ander ses aanwysers gedaal. Dit kan toegeskryf word daaraan dat ander universiteite verder as die US op die aanwysers verbeter het, asook aan 'n toename in die aantal instellings wat vir die 2026-uitgawe geëvalueer is. Die US neem ook nie aktief aan hierdie ranglys deel nie.

In die jongste uitgawe van die QS WUR, wat as een van die drie top universiteitsranglysstelsels wêreldwyd beskou word, is 1 501 instellings oor 106 liggings – 8 808 instellings, insluitende 94 nuwe universiteite – geëvalueer.

Hierdie instellings is in die volgende nege aanwysers beoordeel: akademiese reputasie (wêreldwye akademici se persepsies van 'n instelling se akademiese uitnemendheid); werkgewersreputasie (die persepsie van werkgewers wêreldwyd van watter universiteite gegradueerdes lewer wat die gereedste is vir werk); fakulteit-studente-verhouding (die verhouding tussen die aantal akademiese personeel en die aantal studente); aanhalings per fakulteit (aantal akademiese aanhalings wat deur fakulteitslede geproduseer is); internasionale fakulteitsverhouding (die proporsie fakulteitslede wat internasionaal is); internasionale studenteverhouding (die proporsie internasionale studente); internasionale navorsingsnetwerk ('n instelling se sukses in die skep en instandhouding van navorsingsvennootskappe met instellings in ander plekke); indiensnemingsuitkomste; en volhoubaarheid (die maatskaplike en omgewingsimpak van universiteite).

"Hoewel die Universiteit nie aktief aan die QS-ranglys deelneem nie, is ons verheug om na die Top 300 op te skuif. Dit is 'n positiewe prestasie," sê prof Sibusiso Moyo, Viserektor: Navorsing, Innovasie en Internasionalisering. "Dit is bemoedigend om te sien dat ons volgehoue belegging in navorsing, nagraadse opleiding en internasionale samewerking steeds in die wêreldranglys weerspieël word. Wat egter van groter belang is, is dat die Universiteit sy sukses bo alles aan die verskil meet wat dit in die lewens van sy studente, sy gemeenskappe en die samelewing maak. Daardie doel word deur ons Visie 2040 en die nuwe Strategieplan 2026–2030 gelei wat uitnemendheid, insluiting, innovasie, vennootskap en maatskaplike impak voorop plaas in alles wat die Universiteit doen. Ons bly daartoe verbind om kennis in diens van die samelewing, betekenisvolle betrokkenheid en navorsing wat tot menswaardigheid bydra, maatskaplike geregtigheid en transformasie te bevorder.

"Die US wens ook die ander Suid-Afrikaanse en Afrika-universiteite geluk wat in die QS-ranglys erken word. Die uitkoms weerspieël die diepte van navorsing en vakkundigheid regoor ons hoëronderwyssektor. Die US bly daartoe verbind om saam met sy vennote te werk om die komplekse uitdagings wat die vasteland en die wêreld in die gesig staar, aan te spreek," voeg Moyo by. 

Aanduiders

Die US het reeds by vorige geleentheid gesê hy beskou ranglyste vir wat dit is: nuttige maar gedeeltelike aanduiders, nie maatstawwe van 'n universiteit se volle waarde nie. Ranglyste is goed om navorsingsuitsette, aanhalingsimpak, internasionale sigbaarheid, akademiese reputasie en sukses met navorsingsfinansiering vas te lê. Hulle is egter nie so goed om sosiale mobiliteit, gemeenskapsimpak, die sukses van studente uit benadeelde agtergronde, streek-ekonomiese ontwikkeling, uitbouing van die land, beleidsinvloed en kulturele bydrae te weerspieël nie. 'n Universiteit wat wêreldwyd in die 50ste plek verskyn, kan 'n beskeie bydrae tot plaaslike uitdagings lewer, terwyl een wat 500ste is, duisende lewens deur onderwysersopleiding, gesondheidsorg, landbou-innovasie of openbare diens kan verander.

Die US het die afgelope paar jaar konsekwent onder die beste tersiêre instellings op die QS WUR, die Times Higher Education (THE)-wêreldranglys, die CWUR, die Akademiese Ranglys van Wêrelduniversiteite, die THE-wêreldranglys volgens vak en die QS-wêreldranglys volgens vak verskyn.

• Besoek die QS-wêreldranglys se webwerf vir meer inligting.