Studentehonger bly ’n dwingende werklikheid aan die Universiteit Stellenbosch (US) – en van 5 Maart tot 15 April sal die US-gemeenskap mobiliseer om daarop te reageer. Alumni, personeel, studente en vriende word uitgenooi om aan die jaarlikse #GivingMaties-veldtog, waartydens fondse 40 dae lank gewerf word om voedselonsekerheid onder studente te verlig, deel te neem.

“Honger maak dit moeilik vir studente om te konsentreer, gesond te bly en akademies suksesvol te wees. Niemand behoort te moet kies tussen eet en studeer nie,” sê veldtogambassadeur, Alwin Mabuza. “Om daardie rede sal #GivingMaties vanjaar fokus op #Move4Food, ’n inisiatief onder leiding van studente wat onmiddellike verligting voorsien.”

Die inisiatief is in 2018 van stapel gestuur en bied praktiese, direkte voedseltoelaes aan studente wat sukkel om gereeld maaltye te bekom weens finansiële uitdagings.

#Move4Food vorm een deel van die US se breër, gekoördineerde reaksie op studentehonger. In die afgelope jaar alleen het meer as 700 ondersteuningsintervensies plaasgevind in die vorm van finansiële bystand, winkelkoopbewyse, geborgde maaltye op kampus en voedselpakkies danksy donateursbydraes – alles om te verseker dat studente deur die akademiese jaar betroubare toegang tot kos het.

“Die Universiteit se benadering fokus op stabiliserende, praktiese steun, eerder as eenmalige krisishulp,” voeg Mabuza by.

“Toegang tot voedsel is ’n grondliggende voorwaarde vir akademiese sukses. As ons ernstig oor studentesukses is, moet ons ook ernstig wees oor die aanpak van honger. #GivingMaties bied aan ons gemeenskap ’n duidelike opsie vir reaksie. Wat hierdie veldtog veral kragtig maak, is dat dit aan die hele US-gemeenskap behoort – wanneer fakulteite, koshuise en alumni saamspan, lei selfs klein bydraes tot beduidende ondersteuning.”

#GivingMaties bring sportspanne, verenigings, personeelafdelings en alumni-takke regoor die Stellenbosch- en Tygerbergkampusse byeen. Deur aanlyn fondswerwing, vriendelike mededinging en medewerkende geleenthede, verander die ondersteuners gemeenskapsgees in praktiese studentesteun.

“Deur aan #GivingMaties deel te neem, kan jy help verseker dat studente kan fokus, floreer en slaag – en ’n sterker, sorgsame universiteitsgemeenskap ondersteun,” voeg Mabuza by.

Die veldtog eindig op 15 April met Skenkingsdag – ’n op-kampusgeleentheid, saam met virtuele geleenthede vir ondersteuners regoor die wêreld.

Hoe om betrokke te raak by #GivingMaties

Teken in by https://www.givengain.com/event/givingmaties2026 as ‘n veldtogkampioen, deel die veldtog en help ons om fondse in te samel.

Maak ‘n skenking – elke rand tel!

Woon ons #GivingMaties-vieringe by:

• 10 April 2026, tussen 11:00 en 14:00 – Pretaktiwiteite by Tygerbergkampus
• 14 April om 17:00  – Die Skenkingswoud – versierde bome langs Victoriastraat, lewende musiek, kos en drank
• 15 April om 12:00 –  Pokkel-naelloop: pret-uitdagins op die Rooiplein met fakulteite, studentegemeenskappe en verenigings
• 15 April om 17:00 – The Amazing Chase – kaskarwedrenne en spanuitdagings by US-sportgronde

Leer meer oor die veldtog by https://www.givengain.com/event/givingmaties2026