Van ’n eerstegenerasie student wat met ’n werwingsbeurs aan die Universiteit Stellenbosch (US) kom studeer het, tot ’n doktorale kandidaat aan die gesogte Yale Regskool in die Verenigde State – Reshard Kolabhai se akademiese en persoonlike reis is beide merkwaardig en inspirerend.

Dié Johannesburgse boorling se tyd aan die US het begin met ’n jaar se studie vir ’n musiekgraad, voordat hy besef het dat hy musiek die meeste geniet wanneer dit nie ’n beroepsverpligting is nie. Hy het sy roeping gevind toe hy na die regte oorgeskakel het en in 2016 sy LLB-graad, gevolg deur ’n LLM-tesis in 2020, voltooi het. Hierdie ervaring het by hom ’n waardering vir die sosiale aard van die reg gekweek, wat hy beskryf as “iets wat ons saam met en vir mekaar doen, en wat ons kan help om ’n meer regverdige samelewing in sowel die openbare as die private sfeer te bevorder”.

Reshard het sy eerste LLM-graad voltooi net toe die COVID-19-pandemie uitgebreek het. Hy het eers sosiale bewegings ondersteun wat op die krisis gereageer het, voordat hy as dosent by die Potchefstroomkampus van die Noordwes-Universiteit aangesluit het. Daar het hy vir bykans drie jaar Grondwetlike Reg en Menseregte-reg doseer. Met verloop van tyd het hy egter besef dat verdere groei in die akademie sou vereis dat hy na voltydse studie terugkeer.

“Ek het dit nog altyd geniet om aan nuwe omgewings, nuwe mense en nuwe idees blootgestel te word, daarom het ek ’n kans gewaag en oorsee aansoek gedoen,” verduidelik hy. “Ek was bevoorreg om toelatingsaanbiedinge van verskeie vooraanstaande regskole in die VSA te ontvang, en ek het Yale gekies vanweë sy klein omvang en sterk akademiese fokus. Daar het ek eers ’n tweede vereiste LLM-graad deur middel van kursuswerk voltooi, waarna ek aansoek gedoen het vir en toegelaat is tot die JSD-program (Doctor of Juridical Science). Ek is nou ongeveer halfpad daarmee.

“Die JSD-program word afgesluit met óf ’n monografie (’n boeklengte akademiese studie) óf drie Amerikaanse-styl regstydskrifartikels. Ek neig tans na laasgenoemde opsie, wat beteken dat die grootste deel van my dae in beslag geneem word deur lees en skryf, noue samewerking met professore, personeel en medestudente, asook die aanbieding van my werk by konferensies, werkswinkels en soortgelyke forums.”

Hy sê wat hy die meeste van Yale geniet, is die intellektuele kultuur. 

“Yale is buitengewoon dinamies en ondersteunend. Dit skep ruimte vir ambisieuse, streng akademiese idees binne ’n warm, hegte gemeenskap. Benewens my proefskrifwerk het ek interdissiplinêre kursusse buite die Regskool geneem, vir ’n semester ’n amptelike leesgroep aangebied en leierskaprolle in verskeie studente-organisasies vervul, insluitend die stigting van die Yale African Law Students Association.

“Meer onlangs is ek as ’n regsenator in Yale se kampuswye Nagraadse en Professionele Studente-Senaat verkies. Ek het ook in die Yale Camerata-koor gesing, pyporrel-lesse geneem en is verkies tot die Yale University Guild of Carillonneurs, wat daagliks op die karillon [’n stel klokke wat vanaf ’n groot klawerbord bespeel word] optree.”

Onder sy trotsste prestasies tel die ontvangs van die US Rektorstoekenning vir die beste LLM-tesis, wat onder toesig van professore Sandy Liebenberg en Richard Stevens voltooi is, asook dat hy die eerste LLM-student uit Afrika in meer as ’n dekade geword het wat tot Yale toegelaat is.

Tog het sy tyd by die US ’n blywende indruk gelaat.

“My jare by Stellenbosch het by my ’n verbintenis tot streng akademiese standaarde ingeprent, en koshuis- en kampuslewe het my ’n diep waardering gegee vir die waarde daarvan om saam met mense uit verskillende agtergronde en met uiteenlopende sienings te woon en te leer. Dit het ook my oortuiging versterk dat ons die samelewing kan, en behoort te, verbeter vir ons almal. Ons self is die leiers waarop ons gewag het en wat Suid-Afrika en die wêreld tans so dringend nodig het.”

Vir huidige studente wat moontlik te vasgevang is in die eise van universiteitslewe om te besin oor waar hulle in die groter prentjie inpas, bied hy die volgende raad:

“Sien jouself as iemand wat in ’n voortdurende proses van wording is, nie as ’n statiese wese nie. Doen elke dag iets nuuts. Dwing jouself buite jou gemaksone. Kyk verby die maklike antwoorde, en fokus op die moeilike vrae. Omhels verskillende maniere van dink, wees en doen, want dit bou alles mettertyd op. Bo alles, wees vriendelik. In ’n tyd waar soveel dinge ons van mekaar vervreem, streef daarna om iemand te wees wat mense saambring.”