Of dit nou in sy studies, sy loopbaan of die lewe self is, Nyasha "Nash" Jokomo was nog nooit iemand om die konvensionele roete te volg nie. Dit is eerder deur onverwagte draaie en onbekende paaie te verken dat die 29-jarige alumnus van die Universiteit Stellenbosch (US) sy rigting gevind het.

Nash, wat in Harare, Zimbabwe gebore en grootgeword het en in 2016 na Stellenbosch verhuis het om sy studies te begin, erken dat sy akademiese pad allesbehalwe eenvoudig was.

“Toe ek by Stellenbosch aansoek gedoen het, het ek my net redelik wyd gegooi,” vertel hy. “Ek het aansoek gedoen vir 'n BAcc (Geoktrooieerde Rekenmeester), 'n BCom in Finansiële Bestuur en Entrepreneurskap en selfs 'n BSc in Geologie, omdat Aardrykskunde een van my gunstelingvakke op skool was.”

Hy het egter vinnig besef dat geoktrooieerde rekeningkunde en geologie nie die pad vir hom is nie. In plaas daarvan het hy die BCom-roete gekies wat hom presies gegee wat hy nodig gehad het: ruimte om te verken.

“Dit het my aan soveel verskillende dissiplines blootgestel – van Ekonomie en Statistiek tot Bemarking, Rekeningkunde en Korporatiewe Maatskaplike Verantwoordelikheid. Dit het my ruimte gegee om uit te vind wat my regtig interesseer.”

Nash het sy BCom in Finansiële Bestuur en Entrepreneurskap in 2018 voltooi, gevolg deur 'n BCom Honneurs in Besigheidsbestuur (Strategie en Innovasie) in 2019 – 'n program wat hy steeds as een van die hoogtepunte van sy akademiese reis beskryf.

“Dié program was ongelooflik prakties en boeiend. Die kleiner klasse het beteken dat mens met dosente en klasmaats kon kommunikeer in plaas daarvan om net anoniem in 'n lesingsaal te sit. Baie van die gevallestudies en opdragte waaraan ons gewerk het, is steeds relevant in my loopbaan vandag.”

Hy sê dat die US hom bowenal aangemoedig het om nuuskierig en aanpasbaar te wees – eienskappe wat steeds sy manier van werk en leef vorm.

Nash het sy loopbaan begin by 'n boetiekkonsultasiefirma wat spesialiseer in gedrags-ekonomie. Daar het hy saam met banke en gesondheidsorgorganisasies gewerk om kliëntegedrag en besluitneming beter te verstaan.

“Dit het my ’n waardering gegee vir hoe sielkunde en besigheid op maniere oorvleuel wat mense dikwels onderskat,” sê hy.

Hy het later na strategie en beleggingsadvies oorgeskuif, waar hy blootstelling gekry het aan nywerhede wat wissel van mynbou en private aandelekapitaal tot finansiële dienste en finansiële tegnologie.

Vandag werk Nash by die Standard Bank Groep as Hoofstrategie-ontleder: Vennootskappe en Strategiese Beleggings en Alliansies, binne die bank se Moonshots-span.

“My rol behels die identifisering en vorming van strategiese vennootskappe en beleggingsgeleenthede wat langtermynwaarde vir die bank en sy kliënte kan skep,” verduidelik hy. “’n Groot deel van wat ons doen, is om te bepaal wat besighede buite tradisionele bankdienste nodig het om te groei en sukses te behaal.”

Die rol pas perfek by sy nuuskierige ingesteldheid.

“Wat ek die meeste geniet, is dat my dae nooit dieselfde is nie. Een dag evalueer jy dalk ’n fintech-vennootskap, en die volgende dag help jy om ’n strategiese groeiprojek vir ’n heeltemal ander deel van die besigheid te vorm. Dit is ’n ruimte waar innovasie en praktiese toepassing saam moet bestaan, en dit is wat dit so opwindend maak.”

Benewens sy loopbaanprestasies streef Nash ook daarna om onkonvensionele uitdagings en ervarings aan te gryp. As ’n passievolle sokkerondersteuner het hy homself die doel gestel om van die wêreld se grootste toernooie by te woon. Tot dusver het hy reeds die 2024 UEFA Europese Kampioenskap in Duitsland en die 2025 Afrika-beker vir Nasies in Marokko bygewoon. Die FIFA Wêreldbeker is volgende op sy lys. Op slegs 24 het hy ook sy eerste eiendom aangekoop en hy berei tans voor om sy eerste marathon te hardloop.

Sy raad aan studente en gegradueerdes is eenvoudig: hou jou opsies oop.

“Loopbane is selde lineêr,” sê hy. “Dikwels is die geleenthede wat jou die meeste vorm dié wat jy nooit beplan het nie. Gooi jou net wyd, bly nuuskierig en stel jouself bloot aan verskillende ervarings. Daardie aanpasbaarheid word uiteindelik een van jou grootste sterkpunte.”