Kunsmatige intelligensie (KI) is besig om ingrypende verandering ingrypende verandering aan die aard van navorsing mee te bring. Grenstegnologie het 'n alledaagse deel van die navorsingsomgewing geword en ontwikkel steeds teen 'n merkwaardige pas. Personeel aan die US word aangemoedig om digitale hulpmiddels te benut, KI-geletterdheid te ontwikkel, en die waarde van KI vir onderrig en leer, kliniese praktyk, bedryfsprosesse, en navorsing te verken. Alle personeel en studente word hartlik uitgenooi om deel te neem aan gesprekke oor KI op kampus.

Die Fakulteit Geneeskunde en Gesondheidswetenskappe (FGGW) huisves navorsers wat verder kyk as die voor die hand liggende toepassings van Groot Taalmodelle (GTM's) vir lees- en skryfondersteuning. Hulle benut KI-hulpmiddels wat menslike vermoëns in data-ontleding, eksperimentering, en kliniese sorg aanvul en oortref. KI bring ingrypende veranderinge mee in die omvang van gesondheidsnavorsing en die pas van ontdekking.

KI verskaf ook aansporing vir samewerking tussen klinici, biomediese wetenskaplikes, datawetenskaplikes, ingenieurs, etici, sosiale wetenskaplikes, regsgeleerdes en navorsers in gesondheidstelsels. Dit skep nuwe geleenthede vir interdissiplinêre en transdissiplinêre benaderings tot die mees dringende uitdagings waarmee die samelewing te kampe het. Namate KI al hoe meer deel van navorsingsekosisteme word, is samewerking oor fakulteits- en sektorsilo's heen net so belangrik soos vakkundigheid self.

Om op hierdie pad aan ons navorsingsgemeenskap erkenning en steun te gee, stel die FGGW se afdeling vir Navorsings- en Internasionaliseringsontwikkeling en -Steun (NIOS)  hierdie versameling voorbeelde van die aanwending van KI beskikbaar. Maak kennis met navorsers wat KI-tegnologieë gebruik of bestudeer, ontdek vertrekpunte vir jou eie KI-geletterdheid en verkenning, en kry op een plek toegang tot institusionele riglyne vir die gebruik van KI.