Die kurator van die Suid-Afrikaanse Lugmag (SALM) Museum, Ysterplaat, Lt. Kol. James du Toit, het onlangs die Departement Meganiese en Megatroniese Ingenieurswese aan die Universiteit Stellenbosch besoek. Die doel van die besoek was om moontlike geleenthede vir tegniese samewerking tussen die departement en die museum te identifiseer. Onderwerpe in lugvaartingenieurswese lê na aan die hart van enige ingenieur en die kans om in die tegniese inhoud van uitstallings by die museum te belê, kon nie misgeloop word nie.

Die SALM Museum by Ysterplaat is een van die verborge juwele van Kaapstad. Behalwe dat dit 'n prominente toeriste-aantreklikheid is, speel dit ook 'n belangrike rol in die kweek en bevordering van belangstelling in ingenieurswese onder die stad se jeug. In die volgende paar jaar sal die departement betrokkenheid by die museum bevorder, hetsy deur direkte navorsing, of deur vrywilligersgeleenthede, onder sy senior studente. Dit is slegs een van die vele maniere waarop ons, as 'n departement, die samelewing waarvan ons deel is, kan help.