Kerry Porrill en dr Nandipa Mponda van die Universiteit Stellenbosch verruil die Eikestad volgende jaar vir Oxford om by ʼn groep van meer as 100 Rhodes-beurshouers van reg oor die wêreld by een van die wêreld se oudste universiteite aan te sluit. 

Die Rhodes-studiebeurs se visie is om ʼn “globaal inklusiewe en bedagsame gemeenskap van leiers” te skep en is die wêreld se prestigerykste en oudste nagraadse genootskap. Dit is sedert 1903 aan die Universiteit van Oxford gesetel en beurse is al aan bykans 1 000 uitmuntende gegradueerdes van universiteite in Suider-Afrika toegeken om hulle studie aan die wêreld se voorste universiteit voort te sit.

Porrill, ʼn oudleerling van die Hoërskool Cannons Creek in Kaapstad, is tans ʼn Honneurs BSc-student. Sy het onlangs die Rektorstoekenning vir Akademiese Uitnemendheid ontvang nadat sy in 2024 een van die BSc-studente met die hoogste gemiddelde persentasie was. Sy is passievol oor wiskunde en het aan talle kompetisies deelgeneem, insluitend die Internasionale Wiskunde-olimpiade terwyl sy nog op hoërskool was.

Porrill was ná haar matrikulasie by die opleiding en leiding van nasionale wiskundespanne betrokke. Sy het al etlike opleidingskampe vir meisies aangebied wat in wiskunde-olimpiades belang stel en was vanjaar die leier van die eerste Suid-Afrikaanse span wat aan die Europese Wiskunde-olimpiade vir Meisies deelgeneem het.

Sy is ook die medeskrywer van ʼn artikel wat op ʼn internskap aan die einde van haar tweede jaar gegrond is en wat onlangs in die Journal of Algebra and its Application verskyn het.

Porrill, wat ʼn DPhil in wiskunde aan Oxford wil behaal, beskou die Rhodes-beurs as ʼn eer. “Dis ʼn wonderlike geleentheid om aan so ʼn bekende universiteit te studeer. Ek wil die akademie betree, so ek sien regtig uit na die geleentheid om by Oxford se wiskundiges te leer en met hulle te skakel. Ek is baie dankbaar vir al die ondersteuning wat ek langs die pad van vriende, familie en dosente ontvang het.”

Dr Mponda, wat in Kaapstad grootgeword en in 2017 as hoofmeisie van die Herschel Girls’ School gematrikuleer het, voltooi tans haar internskap as junior dokter in Gqeberha in die Oos-Kaap. Sy het in 2023 ʼn MBChB aan die US behaal en het leierskapsposisies beklee in studente-organisasies wat fokus op gesondheidsvoorspraak, globale gesondheid en mediese opvoeding, insluitend as Professionele Uitruildirekteur van die International Federation of Medical Students’ Association en as Sekretaris van die Global Health Students Network.

Sy is die medeskrywer van ʼn artikel wat in die Suid-Afrikaanse Mediese Joernaal verskyn wat oor die bruikbaarheid van elektroniese gesondheidsrekords in ʼn openbare gesondheidsorgfasiliteit handel waarin sy digitale innovasies ter versterking van gesondheidsorgdienslewering verken. 

Mponda het talle akademiese toekennings gedurende haar studiejare ontvang, insluitende die Excel-toekenning, die Senior Merietetoekenning en die Openbare Gesondheidsverbeteringsfonds-beurs.

Sy beoog om ʼn MSc in internasionale gesondheid en tropiese geneeskunde aan Oxford te behaal, gevolg deur ʼn MBA, wat haar toewyding aan die bevordering van billike en finansieel volhoubare gesondheidsorghervorming in Suid-Afrika verder sal versterk.

Die Rhodes-trust beskryf die keuringsproses vir studiebeurse as “veeleisend en streng”. Aansoekers dien ʼn lang aanlyn aansoek in, ondergaan ʼn deeglike beoordeling deur komitees reg oor Suider-Afrika en indien hulle die kortlys haal, word hulle na ʼn onderhoud met streek-keuringskomitees bestaande uit bekende kundiges en leiers in uiteenlopende vakrigtings genooi.

Daar was vanjaar 57 kandidate op die kortlys vir streeksonderhoude wat in Oktober gevoer is. Beverley Johnson, Streeksbestuurder: Rhodes-studiebeurse vir Suider-Afrika, sê die keuring word nooit makliker nie. “Ons ontvang elke jaar so baie aansoeke van talentvolle, uitnemende individue met baie potensiaal vanuit al die streke en vakrigtings. Die kortlysproses is intens en onderhoude is uitdagend. Die nasionale keuringskomitee kan net tien beurse per jaar toeken en moet moeilike keuses maak.”

In sy kommentaar oor vanjaar se toekennings het Ndumiso Luthuli, Nasionale Sekretaris van die Rhodes-trust vir Suider-Afrika, gesê: “Die Rhodes-keuringsproses het ten doel om jongmense met bewese akademiese uitnemendheid te identifiseer wat ook uitsonderlike karakter en deursettingsvermoë toon, die moed het om te lei en ʼn verskil in die breër gemeenskap te maak, die energie het om hulle talente ten volle te benut en toegewyd is om die mensdom se uitdagings op te los. Ons glo Nandi en Kerry verpersoonlik hierdie kern-keuringskriteria.”