Die Universiteit Stellenbosch (US) het met trots die name bevestig van die uitsonderlike individue wat eredoktorsgrade by komende gradeplegtighede sal ontvang.

Die ontvangers is die Nobelpryswenner en internasionaal-bekroonde skrywer prof Abdulrazak Gurnah; die rampbestuurkundige Colin Deiner; die entrepreneur Chris Otto; die baanbreker-sosiale wetenskaplike en epidemioloog dr Olive Shisana; en die innoveerder dr Tjaart Johannes van der Walt.

Die Universiteit ken jaarliks ​​eredoktorsgrade toe aan buitengewone individue wat hulself in hul onderskeie velde onderskei het en ‘n betekenisvolle bydrae tot die samelewing gelewer het.

Dié kandidate is deur ‘n intensiewe proses aangewys, met elke benoeming wat deur beide die Senaat en die Universiteitsraad bekragtig is. Die jongste groep eredoktorsgrade is op 29 September deur die US se Raad goedgekeur. 

Deiner en Otto, saam met prof Salim Abdool Karim (wie se eredoktorsgraad in die Wetenskap (DSc) (Geneeskunde en Gesondheidswetenskappe) oorstaan van 2024) sal hul grade in Desember ontvang, terwyl die ander eregrade aanstaande jaar by die US se Maart-gradeplegtigheidsweek toegeken sal word.

“Die Universiteit Stellenbosch is geëerd om hierdie uitsonderlike individue te erken wie se werk – wat strek van letterkunde, die regte en entrepreneurskap, ramprisiko en ingenieurs-innovasie tot openbare gesondheid – ‘n beduidende impak gemaak het. Hul prestasies hef gemeenskappe op, verryk kundigheid en help om ‘n veiliger en regverdiger wêreld te bou. Deur hulle te vereer, bevestig die Universiteit ons missie om kennis in diens van die samelewing te bevorder en ons ambisie om te lei vanuit Afrika, vir Afrika en die wêreld,” sê prof Deresh Ramjugernath, Rektor en Visekanselier van die Universiteit Stellenbosch.

Meer oor die ontvangers van eregrade:

Prof Abdulrazak Gurnah: 

Gurnah is ’n internasionaal-bekroonde skrywer en letterkundige wat in 2021 die Nobelprys vir Letterkunde ontvang het. Hy sal die graad Doktor in Letterkunde (DLitt), honoris causa, ontvang. Gurnah het ’n lang verhouding met die Universiteit Stellenbosch. Hy is ’n Stellenbosse Instituut vir Gevorderde Navorsing (STIAS)-genoot en was in 2018 in residensie by STIAS toe hy aan sy roman Afterlives gewerk het. Hy het onlangs gedien in die wetenskaplike komitee vir die Nobel in Afrika Simposium in Letterkunde, “Retrieving Pasts, Imagining Futures: Creative Forms in African Writing”, wat in November 2025 by STIAS gehou is.

Colin Deiner: 

Deiner, die Wes-Kaapse provinsiale regering se Hoofdirekteur: Rampbestuur en Brand- en Reddingsdienste, word internasionaal erken vir sy uitgebreide kundigheid in rampbestuur en -reaksie. Hy sal die graad Doktor in Ingenieurswese (DEng), honoris causa, ontvang. Deiner het Suid-Afrikaanse soek- en reddingspanne na rampgeteisterde gebiede oor die land heen en in die buiteland gelei. Hy het ook die droogterampveldtog (Dag Zero) in die Wes-Kaap en die nie-mediese komponent van die Covid-19 provinsiale reaksie gekoördineer.

Chris Otto

Otto, ’n alumnus van die US, sal die graad Doktor in die Regte (LLD), honoris causa ontvang. Hy was ‘n medestigter van die PSG Groep en Capitec Bank. Otto is ook die stigtersvoorsitter van die Stellenbosch Regsfakulteit Trust wat betrokke was by die vestiging van die Leerstoel in Sosiale Geregtigheid, die Gys Steyn-leerstoel in Finansiële Reguleringsreg, en die Leerstoel in Stedelike Reg en Volhoubaarheidsbestuur.

Dr Olive Shisana

Shisana, ’n baanbreker- Suid-Afrikaanse sosiale wetenskaplike en epidemioloog, sal die graad Doktor in die Natuurwetenskappe (DSc) (Geneeskunde en Gesondheidswetenskappe), honoris causa, ontvang. Sy het gedien as die Direkteur-Generaal in die Departement van Gesondheid, waar sy ’n sentrale rol gespeel het in die heropbou van openbare gesondheid ná apartheid. Shisana is die voorsitter van die raad van die Afrika-instituut vir Wiskundige Wetenskappe (AIMS) – waarvan die Universiteit ’n medestigter is. In haar ampstermyn het AIMS sy reikwydte uitgebrei en sy verbintenis tot vroue in STEM, innovasie en transdissiplinêre navorsing versterk.

Dr Tjaart Johannes van der Walt

Van der Walt sal die graad Doktor in Ingenieurswese (DIng), honoris causa, ontvang. Hy word beskou as ’n pionier van digitale bankwese op die Afrika-kontinent en ’n denkleier in die etiese toepassing van tegnologie tot maatskaplike voordeel. Van der Walt, ’n alumnus van die US, is ’n medestigter van TymeGroup en het gehelp om TymeBank, Suid-Afrika se eerste volledig digitale kleinhandelbank, te vestig. Hy was ook instrumenteel om die TymeCube-program te begin – ’n vennootskap tussen TymeGroup en die US wat mentorskaps- en navorsingsgeleenthede bied aan top- nagraadse studente in ingenieurswese en aktuariële wetenskap.

Prof Salim Safrudeen Abdool Karim 

Abdool Karim, ‘n gerekende epidimioloog, sal die graad, Doktor in die Wetenskappe (DSc) (Geneeskunde en Gesondheidswetenskappe), honoris causa, ontvang. Tydens die Covid-19-pandemie het hy ‘n leidende rol gespeel in die Covid-19-reaksie en wetenskaplike kundigheid verskaf oor genetiese mutasies in SARS-CoV-2 wat tot nuwe variante lei. Abdool Karim is tans die direkteur van die Sentrum vir die Vigs-navorsingsprogram in Suid-Afrika (CAPRISA) en CAPRISA-professor van globale gesondheid by Colombië-Universiteit, New York. Hy is ook die Viserektor: Navorsing by die Universiteit van KwaZulu-Natal.