Weggesteek onder die grond van Suid-Afrika se graanlande, het wetenskaplikes van die Landbounavorsingsraad ’n merkwaardige insek-parasitiese rondewurm (-nematode) ontdek wat later Steinernema innovationi genoem is. Die ontdekking het egter nie daar gestop nie. Daar is bevind dat hierdie mikroskopiese insek-parasitiese rondewurm verbind word met ’n voorheen onbekende bakteriese vennoot, wat onlangs eers in medewerking met die Universiteit Stellenbosch se Departement Bewaringsekologie en Entomologie en die Departement Mikrobiologie met behulp van molekulêre volgende-generasie volgordebepaling as Xenorhabdus innovationi geïdentifiseer is. 

Saam verteenwoordig hierdie buitengewone simbiotiese vennootskap ’n opwindende deurbraak in die soeke na volhoubare landbou-oplossings. Waar dit uit die ryk grond van Bethlehem in die Vrystaat geïsoleer is, het hierdie klein maar kragtige duo reeds sy vermoë gedemonstreer om die vernietigende larwes van die vals appelmot (vals kodlingmot), ’n groot pes wat die sitrus- en wingerdbedryf wêreldwyd bedreig, binne een tot twee dae dood te maak. 

Dit is meer as net ’n wetenskaplike ontdekking. Die alliansie tussen S. innovationi en X. innovationi stel die enorme onontginde potensiaal van Afrika se biodiversiteit ten toon. Op ’n tydstip waar die landbou dringend omgewingsvriendelike alternatiewe vir chemiese pesdoders nodig het, bied hierdie biologiese vennootskap, wat natuurlik voorkom, nuwe hoop vir veiliger en innoverende gewasbeskermingstrategieë vir die toekoms.

Fig. Vrybewegende rondewurms in die grond is die aktiewe bestanddeel van hierdie rondewurmgebaseerde biologiese beheermiddel-duo. Die bakterie word in die voorste deel van die ingewande gehuisves en word vrygestel sodra die rondewurm in die pesinsek indring, waar dit help om die insek binne een tot twee dae dood te maak.

Raadpleeg die volgende wetenskaplike artikel vir meer inligting: Ritter, C.L., Wessels, H.L., Ramakuwela, T., Hatting, J., Malan, A.P. & Dicks, L.M.T. Xenorhabdus innovationi sp. nov., associated with the entomopathogenic nematode Steinernema innovationi from South Africa. Nematology 28(2), 193-208. Brill Academic Publishers http://hdl.handle.net/2263/108839