Watter dienste van die Biblioteek gebruik u gereeld?

Ek werk nou saam met ons Fakulteitsbibliotekaris, in vennootskap om saam ’n kursus vir ons tweedejaarstudente oor biblioteektegnieke en die vind van inligting aan te bied. Dit sluit ook ’n taak in waar KI-hulpbronne met ‘tradisionele’ biblioteeksoekmetodes vergelyk word. Dit strek oor vier weke van praktiese sessies. Ek het ook saam met Elizabeth Moll-Willard ’n nagraadse sessie met Ingenieurswese-studente oor die gebruik van KI in navorsing aangebied.

Ek is betrokke by gesprekke met die Fakulteit Ingenieurswese oor die gebruik van die Innovasieruimte vir nagraadse projekte, sowel as in my entrepreneurskapskursusse, waar ons beplan om die 3D-druk- en ontwerpgeriewe vir prototipewerk te gebruik.

Verder is ek ook in gesprek met Navorsingsdatadienste oor die verkryging van klimaatdata, wat moontlik wyer in landbou-navorsing en -onderrig gebruik kan word.

Wat is die belangrikste manier waarop die biblioteek u navorsing ondersteun, en wat sou die impak wees indien daardie diens nie meer beskikbaar is nie?

Die bogenoemde aspekte sou baie moeilik wees om uit te voer sonder die hulp van biblioteekpersoneel en die gebruik van gedeelde fasiliteite. Met betrekking tot die fasiliteit (rekenaargebruikersarea) wat ons vir die biblioteek-/praktiese KI-sessie gebruik – ons fakulteit het nie ’n lokaal wat tot 50 studente kan akkommodeer nie, so dit sou onmoontlik wees om dit sonder die biblioteekfasiliteite aan te bied.

Hoe help die biblioteek se kundigheid en ondersteuningsdienste u om in u daaglikse navorsing tyd te bespaar?

Ons deel die praktiese sessies met ons fakulteitsbibliotekaris, wat ook die druk van ons onderrig- en tutoriaalwerk in daardie deel van die tweedejaarkursus verlig. Die biblioteekhulpmiddels en -hulpbronne – veral die gidse oor navorsingsliteratuuroorsigte, insluitend sistematiese oorsigte, maar ook die KI-gidse – is uiters nuttige bronne wat baie tyd bespaar wanneer ’n mens self hulpbronne moet soek.

Hoe het die biblioteek se konsultasiedienste u gehelp met die bestuur van navorsingsdata, die opstel van databestuursplanne (DMPs), of om die nakoming van data-vereistes te verseker?

Ek het nie uitgebreide ervaring hiermee nie, maar studente vir wie ek as studieleier optree gebruik die DMP-gidse wanneer hulle aansoeke om etiese klaring indien. Ek gebruik ook hierdie hulpbronne wanneer ek befondsingsaansoeke skryf.

Watter rol speel die biblioteek om u te help om ooptoegangspublikasie-opsies/-befondsing te navigeer?

Die biblioteekwebtuistes het uitstekende hulpbronne, wat ek en my nagraadse studente al dikwels gebruik het om hierdie publikasie-opsies te navigeer.

Voel u dat die biblioteekpersoneel proaktief is in die aanbied van nuwe dienste wat by u huidige navorsingsbehoeftes aansluit? Gee asseblief voorbeelde.

Ja, en ek wil spesifiek Elizabeth Moll-Willard en Norman Hebler hier noem – hulle doen moeite om ’n voorloperdiens aan ons te bied en om aan die voorpunt van innovasie in ons navorsings- en onderrigtegniek te wees, wat ek moet loof.

As u een biblioteekdiens kon verander om u navorsing beter te ondersteun, wat sou dit wees?

Ons benodig ’n meer geïntegreerde oplossing vir datakurering en -berging as SunScholardata. Ek weet dit berus nie (net) by die biblioteek nie, maar ek navigeer tans IT, die biblioteek, inligtingsbestuur en DRD om maniere te vind om navorsingsdatabestuur te verbeter vanuit ’n tegniese/bergings-/diensperspektief. Soos ek genoem het – dit is nie ’n kernbiblioteekfunksie-probleem nie – maar ek dink die biblioteek, as ’n kernkomponent van RDM, kan ’n sterk rol speel om dit vir navorsers te verbeter.

Onderhoud via e-poskorrespondensie met Prof. Strever