Prof. Marena Manley, van die Departement Voedselwetenskap, het onlangs ’n Eretoekenning van Graan SA ontvang tydens hul jaarlikse Kongres wat van 11–12 Maart 2026 by NAMPO Park gehou is. Prof. Manley is vereer vir haar uitstaande bydraes as ’n toonaangewende navorser. Sy is ’n gevierde navorser, mentor en akademiese leier in die veld van Voedselwetenskap, met ’n loopbaan wat oor meer as 29 jaar van baanbrekersbydraes aan die Universiteit Stellenbosch (US) en internasionaal strek.

Nadat sy haar BSc in Voedselwetenskap aan die US voltooi het, het Prof. Manley waardevolle navorsingservaring opgedoen by die Kleingraansentrum in Bethlehem en later by die Koringraad in Pretoria. Terwyl sy voltyds gewerk het, het sy haar MSc Agric (Voedselwetenskap) aan die Universiteit van Pretoria voltooi, waar sy die voorspelling van broodbakkwaliteit van Suid-Afrikaanse koringkultivars met behulp van SDS-PAGE-analise van HMW-glutenien-subeenhede ondersoek het. Sy is daarna met ’n beurs bekroon om ’n PhD aan die Universiteit van Plymouth in die Verenigde Koninkryk te voltooi, waar sy haar baanbrekerswerk in naby-infrarooi (NIR) spektroskopie, gekombineer met die voorspelling van koringhardheid, begin het—’n navorsingsveld wat ’n bepalende rol in haar latere werk sou speel.

Na bedryfservaring in die VK as ’n chemometriese ontwikkelingsingenieur, het Prof. Manley in 1997 by die US aangesluit, vinnig deur die akademiese geledere gevorder en in 2010 tot volle professor bevorder.

Prof Manley se bydraes strek verder as die akademie tot die industrie en beleid. Haar werk oor koringgraderingsstandaarde het direk bygedra tot regulatoriese veranderinge in Suid-Afrika, wat billiker vergoeding vir boere verseker het. Sy het beduidende vooruitgang gemaak in naby-infrarooi (NIR) spektroskopie en hiperspektrale beeldvorming (HSI), veral binne graan-navorsing. Haar werk het die begrip en praktiese toepassing van hierdie tegnologieë in die voedsel- en landbouwetenskappe wesenlik bevorder.

’n Beduidende deel van haar navorsing het gefokus op die ondersteuning van Suid-Afrika se graanbedryf, deur te verseker dat produsente en verwerkers toegang het tot betroubare instrumente vir gehaltebepaling. Sy het hierdie kundigheid ook uitgebrei na ’n breër reeks graangebaseerde toepassings. Prof. Manley word wyd erken vir haar bydraes tot graangehalte-evaluering, en het reeds meer as 90 nagraadse studente begelei en wyd gepubliseer in die velde van graanspektroskopie en chemometrie.

In 2025 het sy die eerste Suid-Afrikaner geword wat die gesogte Tomas Hirschfeld-toekenning van die Internasional Raad vir Naby-infrarooi spektroskopie (ICNIRS) ontvang het, as erkenning vir haar baanbrekersbydraes tot NIR-navorsing, veral in graanwetenskap. Daarbenewens het sy verskeie nasionale toekennings ontvang, insluitend die Kanselierstoekenning van die Universiteit Stellenbosch (2022) vir uitnemendheid in beide onderrig en navorsing, asook ‘n Toekenning vir Uitnemende Navorsing en Innovasie in die kategorie Gevestigde Navorser (2025).

 Prof Marena Manley 

 Prof. Marena Manley ontvang die Eretoekenning van mnr. Richard Krige (Voorsitter, Graan SA).