Die Suid-Afrikaanse Mediese Navorsingsraad (SAMNR) het ʼn nuwe Buitemuurse Navorsingseenheid (BNE) met ʼn fokus op preëklampsie by die Universiteit Stellenbosch (US) se Fakulteit Geneeskunde en Gesondheidswetenskappe gevestig, wat pogings bevorder om een van die hoofoorsake van moeder- en neonatale sterftes wêreldwyd aan te pak.

Die SAMNR/SUN-Preëklampsienavorsingseenheid, onder leiding van prof Catherine Cluver, is een van sewe nuwe BNE’s wat deur die SAMNR bekend gestel is as deel van ʼn nasionale poging om Suid-Afrika se gesondheidsnavorsingskapasiteit te versterk en innovasie te versnel.

Preëklampsie is ʼn belangrike bydraer tot morbiditeit en mortaliteit onder moeders en pasgeborenes wêreldwyd, met ʼn geraamde 46 000 tot 70 000 moederlike sterftes en sowat 500 000 fetale en neo-natale sterftes elke jaar. Die las is veral groot in lae- en middelinkomstelande en verlossing is steeds die enigste bewese behandeling.

“Dis ʼn geweldige eer om as ʼn Buitemuurse Navorsingseenheid van die Suid-Afrikaanse Mediese Navorsingsraad gekies te word,” sê Cluver. “Hierdie toekenning sal ons voortgesette pogings ondersteun om nuwe behandelings en diagnostiek vir preëklampsie te ontdek, bewysgebaseerde geneeskunde te bevorder en die volgende generasie navorsers te ontwikkel.”

Die Eenheid bou voort op meer as ʼn dekade se navorsing aan die US, waar die Preëklampsienavorsingseenheid internasionale erkenning vir sy werk geniet. Die aktiwiteite sluit in die toonaangewende PROVE-biobank, baanbrekende kliniese proewe om nuwe behandelings te toets om preëklampsie te voorkom en te bestuur, asook bydraes tot globale bewyse deur samewerking met organisasies soos die Wêreldgesondheidsorganisasie en die Cochrane-biblioteek.

Die navorsingsprogram bring omvangryke kundigheid byeen, insluitend klinici, wetenskaplikes, beeldingspesialiste en openbaregesondheidskundiges, wat ʼn sterk verbintenis tot interdissiplinêre samewerking en innovasie weerspieël.

Volgens prof Ntobeko Ntusi, President en Uitvoerende Hoof van die SAMNR, is die vestiging van buitemuurse eenhede sentraal tot die bevordering van die organisasie se missie.

“Om te verseker dat die SAMNR ʼn betekenisvolle impak op die verbetering van lewens het, moet ons samehorigheid in die Suid-Afrikaanse gesondheidsnavorsingekosisteem bevorder. Buitemuurse eenhede maak geïntegreerde, interdissiplinêre navorsing moontlik wat wetenskaplike uitnemendheid, nuwe ontdekkings en die ontwikkeling van die volgende generasie hoogs geskoolde navorsers bevorder,” sê Ntusi.

Die SAMNR/SUN-Preëklampsienavorsingseenheid sal fokus op die ontwikkeling van strategieë om preëklampsie te voorkom en behandel, begrip van die toestand te verbeter en uiteindelik die wêreldwye las daarvan te verminder.

 “Ons hoop ons navorsing sal bydra tot die verkleining van die verwoestende impak van [reëklampsie, veral in lae- en middelinkomste-omgewings,” sê Cluver.