Opvoedingsbeleidstudie

Studente aan die Departement Opvoedingsbeleidstudie kry die geleentheid om verskeie dissiplines te verken – van opvoedingsfilosofie, sosiologie en geskiedenis van opvoeding tot onderwysleierskap en -bestuur, en opvoedingsbeleid. Hierdie fokusareas word benader binne ’n postkoloniale, demokratiese kultuur van analitiese denke en oop gesprek, met die doel om sinvol op die komplekse realiteite en uiteenlopende perspektiewe van ’n diverse samelewing te reageer.

As 'n navorsingsg​erigte departement, word ons werksaamhede deur die volgende strategiese oriëntasies gerig:

• 'n Noue verband tussen die departement se navorsingsagenda en onderrig- en diensprioriteite en die Universiteit se visie en strategiese doelwitte;
• 'n Klem op die integrasie van navorsing, onderrig en diensbaarheid;
• Epistemologie en kenniskonstruksie as kernfunksies;
• 'n Sterk kultuur van debatvoering en kritiese beraadslaging;
• Aktiewe bevordering van diversiteit onder personeellede en studente;
• Sterk nasionale en internasionale netwerke;
• Intellektueel belangrike navorsingsfokusgebiede op die terreine van onderwys, ontwikkeling, demokrasie en leierskap.