Die Universiteit Stellenbosch se Departement Wingerd- en Wynkunde het 'n opleidingswerkswinkel aangebied vir personeel van 12 universiteite in wynproduserende lande in Europa en Suid-Amerika, asook Suid-Afrika. Hulle is almal deel van die internasionale VitaGlobalprojek, wat universiteite uit verskillende geografiese streke bymekaar bring wat elkeen programme in wingerdbou, wynkunde of voedselwetenskap aanbied.

Die inisiatief sluit nie net akademici in nie, maar ook die personeel vanuit die instellings se internasionale kantore. Die akademici in die konsortium skryf en implementeer nuwe modules met 'n baie breër internasionale inslag. Op hul beurt is die personeel van die verskillende internasionale kantore besig om alliansies te smee en strategieë te deel oor hoe om onderrig toenemend te internasionaliseer.

VitaGlobal word gedeeltelik ondersteun deur die Erasmus + -program van die Europese Unie, en is in 2019 van stapel gestuur.

Volgens Elizabeth Colucci, projekbestuurder van VitaGlobal by OBREAL (Global Observatory - Knowledge, Innovation and Development), fokus die projek op voedselwetenskap en wingerdbou omdat beide uiters belangrike ontwikkelingsgebiede is sodat plaaslike agri-ekonomieë versterk kan word.

Netwerkgeleenthede is reeds in Argentinië, Portugal en Chili gehou. Die Universiteit van Rovira I Virgili in Spanje staan aan die spits van die inisiatief.

Die ander instellings betrokke is die Universiteit Stellenbosch, die Kaapse Skiereiland Universiteit vir Tegnologie (KSUT), die Universiteit van Chili (Chili), die Universiteit van die Republiek van Uruguay, Asociación de Universidades Grupo Montevideo (Uruguay), die Nasionale Universiteit van Jujuy (Argentinië), die Nasionale Universiteit van Cuyo (Argentinië), die Universiteit van Chilecito (Argentinië), Bologna Universiteit (Italië), Bordeaux Universiteit (Frankryk), Porto Universiteit (Portugal), Iakob Gogebashvili Telavi State Universiteit (Georgië) en die Georgiaanse Universiteit vir Tegnologie (Georgië).

Die projek bied aan personeellede die geleentheid om saam modules in wingerd- en wynkunde te skryf en aan te bied, om van mekaar te leer en waar moontlik doseringslading te deel. Dit word versterk deur 'n kombinasie van gemengde leermetodes, sowel as inligting- en rekenaartegnologie te gebruik.

Die modules wat geskryf word fokus op wyntoerisme, volhoubare wingerdbou, ekonomiese volhoubaarheid en wynbemarking, nuwe neigings in mikrobiologie, vonkelwynproduksie en sensoriese analise. Elkeen van hierdie modules word gekoördineer deur een van die Europese vennote, wat ook sal help met die implementering van die modules. Die temas van die modules is gekies na afloop van vorige vergaderings waarin prioriteite uitgestippel is.

Die eerste voltooide module sal aan die Universiteit van Chili geloods word, waarna die ander vennote in die netwerk ook sal poog om minstens een module binne 'n bestaande program te implementeer. Opleiding en ondersteuning word wedersyds verskaf, en die koördineerder van elke module sal moontlikhede van samewerkende onderrig ondersoek.

Die meeste universiteite in die VitaGlobal-netwerk het in die verlede weinig tot geen betekenisvolle samewerking met mekaar gehad nie. Sedert die totstandkoming daarvan het die projek reeds gelei tot groter samewerkings tussen instellings uit verskillende streke, en selfs binne lande.

“Dit is meer as net 'n inisiatief waarin akademici uit verskillende lande en streke van die wêreld saam studiemateriaal skryf. Dit gee ons ook kans om mekaar se voorbeelde in ons eie onderrig te gebruik, te netwerk en om saam te werk aan ander projekte, soos gesamentlike navorsingsinisiatiewe, "sê dr Erna Blancquaert van die US Departement Wingerd- en Wynkunde. Sy tree as die Universiteit Stellenbosch se koördineerder van die VitaGlobal-projek op.

Sy sê die driedaagse werkswinkel wat op Stellenbosch aangebied is, was die eerste opleidingsinisiatief in sy soort wat deur VitaGlobal aangebied is. Die tema was “internasionalisering van die kurrikulums". Aspekte soos gemengde leer, spesifieke strategieë om te oorweeg met toekomsgerigte onderrig, en uitgebreide internasionalisering is bespreek. Maniere om rekenaar- en inligtingstegnologie soos aanlynkommunikasie en die gebruik van e-assesserings te benut is ook deeglik ondersoek. Ondersteuningsdienste en opleiding wat beskikbaar is vir dosente en ondersteuningspersoneel het onder die loep gekom, asook aspekte wat nog ontwikkel moet word.

• Besoek https://www.vitaglobalproject… meer inligting.

Foto: Verteenwoordigers van 12 VitaGlobal universiteite het die werkswinkel op Stellenbosch bygewoon. Fotograaf: Refiloe Nkhasi​