Die Maties Opedag is die ideale geleentheid vir Graad 11 en 12-leerders om waardevolle inligting te bekom oor studie by hoëronderwysinstellings.

Die Universiteit Stellenbosch (US) Opedag – by die Stellenbosch- en Tygerberg-kampusse – word op Saterdag 25 Februarie gehou. Die Opedag begin om 08:30 en duur tot 16:00.

Besoekers kan hulself toerus met inligting oor universiteitstudies oor die algemeen, beroepskeuses, beurse en lenings, klasgelde, koshuisplasings, sportgeleenthede, akkommodasie, studente verenigings en studente lewe.

"Wat die Opedag so spesiaal maak is dat voornemende studente en hul ouers direk met fakulteitspersoneel en verteenwoordigers van steundienste kan gesels om presies op hoogte te kom van wat die onderskeie studierigtings behels en die ondersteuning wat die Universiteit aan sy studente bied," sê me Magdel Pretorius, projekbestuurder by die US se Sentrum vir Studentewerwing en Loopbaanadvies (SSW).

Beroepsvoorligting

Die Universiteit bied ook toegang tot ʼn gratis loopbaanvoorligting vraelys, beskikbaar by www.gostudy.net/maties. Die vraelys identifiseer beroeps- en belangstellingsvelde en koppel dit dan aan onderskeie beroepe en studiegeleenthede.

"Nog ʼn baie innoverende program is die Course Chooser, ook beskikbaar by www.gostudy.net/maties, wat jou kan help om programme te vind waarvoor jy kwalifiseer gebaseer op jou Graad 11 of 12 vakke en punte. Dan het jy ʼn baie goeie idee met wie jy moet kom gesels by die Opedag," sê Pretorius.

"Die US bied ook loopbaanvoorligting aan graad 11- en 12-leerders. Hierdie diens behels ʼn psigometriese assessering van persoonlikheid, aanleg en belangstellings, individuele gespreksessie, asook ʼn geskrewe verslag van die resultate en aanbevelings."

Vir besprekings, kontak [email protected] / 0218084709.

Inligtingsessies

ʼn Goeie beginpunt vir die Opedag is die verwelkomingstent op die Rooiplein. Hier kan leerders en hul ouers volledige inligting oor die program en inligtingsessies kry. Kyk ook uit vir verskeie inligtingsbeamptes wat by verskillende punte op kampus diens sal doen om inligting en rigtingaanwysings te verskaf.

Leerders en hul ouers kan tydens die Opedag verskeie inligtingsessies bywoon vir onder meer hoe om aansoek te doen vir toelating en beurse vir 2018. Hulle kan ook die verskillende fakulteite besoek vir meer inligting oor spesifieke kursusse. Verskeie ander opvoedkundige instansies stal ook by die Maties Opedag uit. Dit sluit in Isa Carstens Academy; Stellenbosch Hair Academy; Stellenbosch Academy for Design and Photography; Stellenbosch Rugby Academy; Boland College; The Private Hotel School; Institute for Culinary Arts; CTU Stellenbosch; Tshwane Computer Solutions; Young Minds Entrepreneurship Programme, IMM Graduate School.

Tygerberg-kampus

Pendelbussies ry van die Stellenbosch-kampus na die Tygerbergkampus en terug vir leerders en hul ouers wat albei kampusse wil besoek – vooraf besprekings hiervoor is egter noodsaaklik.

Aanlynbesprekings: https://goo.gl/forms/vECJhB6SXFVSlI543 Sandra Josias, e: [email protected], t: 021 938 9789

Besoek www.maties.com vir die volledige Opedag-program met tye en plekke. Besoek ons op Facebook by MatiesFanPage, of skakel 021 808 9111, e-pos [email protected] .