Voorgraadse Program
4-jaar BSc (Bewaringsekologie)
Die eerste jaar is 'n generiese eerstejaar BSc wat in die Fakulteit Natuurwetenskappe aangebied word. Gedurende hierdie jaar vorm ons studente deel van 'n groot poel eerstejaarstudente wat geregistreer is in verskeie programme soos Dierkunde, Voedselwetenskap en ander programme wat in die Fakulteit Natuurwetenskappe aangebied word. Vanaf die tweede jaar word die kurrikulum progressief meer gefokus om meer Bewaringsekologie-verwante modules in te sluit.
Die finale jaar is gewoonlik die interessantste en prettigste. Studente begin spesialiseer deur modules te kies wat meer by hul belangstellings pas. Dit is ook 'n akademies uitdagende jaar en studente moet hard werk om die modules te slaag en 'n mini-navorsingsprojek te voltooi. Die vierde jaar is 'n professionele jaar wat dieselfde kredietvlak het as 'n BSc Honneursgraad, wat in die Fakulteit Natuurwetenskappe aangebied word. Dit beteken dat ons studente na graduering met 'n BSc in Bewaringsekologie direk vir 'n MSc-graad kan registreer. Daar is dus geen nodigheid om eers aansoek te doen en te kwalifiseer vir 'n aparte BSc Honneursgraad nie.
Sommige van ons gegradueerdes betree die werkplek kort na voltooiing van hul voorgraadse graad, maar ander verkies om verder te spesialiseer en vir 'n MSc-graad in die Departement Bewaringsekologie of by ander verwante departemente aan die Universiteit Stellenbosch of elders te registreer. Ons gegradueerdes word geredelik aanvaar vir MSc-graadprogramme by ander tersiêre instellings soos die Universiteit van Kaapstad en die Universiteit van Pretoria.
'n Kleiner dosent-tot-student-verhouding bevorder 'n beter leerervaring in die lesinglokaal en tydens die talle velduitstappies.
Minimum toelatingsvereistes (raadpleeg asseblief ook die Fakulteitsjaarboek):
- Nasionale Senior Sertifikaat of die IEB se skoolverlatingsertifikaat of ander skoolkwalifikasie - Met 'n gemiddeld van minstens 60% (uitgesluit Lewensoriëntering)
- Engels of Afrikaans 4 (50%) - Huistaal of Eerste Addisionele Taal
- Wiskunde 5 (60%) - Suiwer/Kernwiskunde
- Fisiese Wetenskappe 4 (50%) - Fisika en Chemie
Loopbaangeleenthede (sommige in kombinasie met addisionele studies in relevante velde):
- Konsultasie: Omgewingsimpakstudie, monitering en herstel van getransformeerde habitatte
- Toerisme: Ekotoerisme
- Bewaring: Privaat, Provinsiale en Nasionale natuurreservate
- Sosiaal: Gemeenskapsgebaseerde natuurlike hulpbronbestuur
- Produksie: Organiese plantproduksie, wynplase, bosbou, ens.
- Akademie: Onderrig en navorsing
- Regerings- of Nie-regeringsorganisasies
- Bestuur: Wildplase, Landbouplase, bosbou, ens.
- Media: Omgewingsjoernalistiek
- Regte: Omgewingsreg
Departementele toekennings
1. Wenners van die Bewaringsekologie- en Entomologie-toekennings:
Ter erkenning van hul uitstaande akademiese prestasies ken die departement elke jaar twee merietesertifikate toe: een vir die beste student op die gebied van Bewaringsekologie en 'n ander vir die beste Entomologie-student. Sedert 2013 is 25 toekennings gemaak.
2. Daniel Booysen (1988 – 2010) Gedenktoekenning
In 2010 het die Bewaringsekologie-program, en inderdaad die wêreld, tragies 'n baie belowende jong natuurbewaarder verloor. Daniel Booysen, in sy 4de jaar van sy Bewaringsekologie BSc, het groot belofte vir 'n blink toekoms ingehou – hy was akademies begaafd, passievol en toegewy aan Afrika-bewaring. Om sy nagedagtenis te vereer en bewaring in Afrika te bevorder, het die Booysen-familie ruimhartig befondsing toegewy aan die "Daniel Booysen Gedenktoekenning" vir die beste Bewaringsekologie 478-navorsingsprojek. Elke jaar word die top drie projekte gekies, en sedert die ontstaan van die toekenning in 2011 is 46 toekennings gemaak.
