Na byna twee dekades van toegewyde diens aan die Fakulteit Ekonomiese en Bestuurswetenskappe by die Universiteit Stellenbosch, breek ʼn welverdiende nuwe hoofstuk nou vir Goosain Solomon aan. Sedert hy in 2006 by die Departement Ondernemingsbestuur aangesluit het, was Goosain ’n toegewyde dosent en mentor wat hom toegespits het op entrepreneurskap en kleinsakegroei en ontwikkeling – velde wat sy akademiese pad en persoonlike roeping wesenlik beïnvloed het.

Hy het onlangs sy doktorale studies voltooi, met sy PhD wat handel oor die besigheidsinkubasieproses in Suid-Afrika. Dit het sy rol as kundige met ʼn grondige begrip van die land se entrepreneuriese ekostelsel en die versterking daarvan, help vestig. Sy navorsingsbelangstellings sluit kleinsake-ontwikkeling en -groei, entrepreneurskap, innovasie, besigheidsinkubasie en leierskap in – onderwerpe wat hy nie net in die klaskamer nie, maar ook in gemeenskappe en kleinsakeomgewings landwyd bevorder het.

Image by: Goosain Solomon

Mnr Goosain Solomon met (v.l.n.r.) sy oudste dogter, Yumna Solomon; sy vrou, Noorjhan Sasman en sy jongste dogter, Faika Solomon.

Van ingenieurswese tot entrepreneurskap

Goosain se loopbaan het ver van ʼn lesingsaal begin. Met ’n agtergrond in meganiese ingenieurswese het hy tot 1986 as aanlegbestuurder by ’n siviele ingenieursfirma, Clifford Harris, gewerk voordat hy by die destydse Athlone Tegniese Kollege (nou Kollege van Kaapstad) begin doseer het.

Dit was egter sy skuif in 1996 – toe hy ingenieursopleiding vir studies in bestuurswese aan die Universiteit van Wes-Kaapland (UWK) verruil het – wat die rigting sou bepaal wat sy loopbaan sou inslaan. By UWK het hy nie net ’n lewendige akademiese belangstelling ontwikkel nie, maar ook ʼn vaste oortuiging dat kleinsakeondernemings noodsaaklik is vir Suid-Afrika se ekonomiese toekoms.

Sy passie het daartoe gelei dat hy as dosent en bestuurder van die Eenheid vir Entrepreneurskapsontwikkeling (EDU) – ʼn afdeling verantwoordelik vir opleiding, navorsing en ontwikkelingsprojekte met plaaslike, streeks-, nasionale en internasionale impak – by UWK aangesluit het.

“Volgens die Kleinsake-ontwikkelingsagentskap dra mikro-, klein en mediumgrootte ondernemings (MKMO’s) in Suid-Afrika 34% tot die BBP en 60% tot indiensneming by,” verduidelik Goosain. “As ons ernstig daaroor is om ’n meer inklusiewe en veerkragtige ekonomie te bou, is dit noodsaaklik om MKMO’s met die regte vermoëns en ondersteuning te bemagtig; dis nie opsioneel nie. Besigheidsinkubasie is ’n belangrike meganisme om kleinsakeondernemings in Suid-Afrika én wêreldwyd te ontwikkel en te bevorder.”

’n Dosent wat potensiaal ontsluit

Van al die posisies wat hy beklee het, lê onderrig hom die naaste aan die hart. Goosain beskryf die mees bevredigende deel van sy akademiese loopbaan as “om studente se potensiaal na die beste van my vermoë te ontsluit.” Hy het dieselfde met sy kinders gedoen..

Hy floreer wanneer studente krities dink en gesprekke op hoë vlak voer en voeg by: “Ek geniet dit om studente se sosiale konstruk van die werklikheid uit te daag. Dit raak werklik opwindend wanneer hulle op ’n gevorderde vlak deelneem.”

Sy invloed strek veel verder as die lesinglokaal. Sy boodskap aan jonger kollegas is eenvoudig: 
“Dink diep en hard oor wat jy doen. Moenie vir die vinnige oplossing gaan nie; lewer eerder werk van uitnemende gehalte. Moenie jou vermoëns onderskat nie – waag dit!”

Vooruitsigte ná aftrede

Vir Goosain is aftrede nie ’n einde nie, maar ’n voortsetting. Hy wil graag by die kleinsakesektor betrokke bly en sy kundigheid te deel, moontlik as ’n konsultant. Sy eerste stap, erken hy glimlaggend, sal wees om “stelsels in plek te kry en myself in die mark beskikbaar te maak.”

Sy gesin is sy anker. Hy en sy geliefde vrou van 42 jaar, Noorjhan Sasman, het drie volwasse kinders en sewe kleinkinders. “My gelukkige plek is waar my gesin is,” erken hy. Hulle ondersteuning het hom deur die vele eise van sy PhD gedra, en hulle sal hom met trots toejuig wanneer hy sy graad op 10 Desember 2025 ontvang. Ook sy seun uit die Verenigde Koninkryk sal hierdie geleentheid vir niks misloop nie.

In sy vrye tyd ry Goosain fiets en moedig hy ander aan om dit as deel van ’n gesonde leefstyl te probeer. Voor sy PhD-studies het hy ook graag gaan visvang – ’n stokperdjie waarvoor hy dalk weer tyd sal hê.

’n Welverdiende tot siens

Terwyl Goosain sy hoofstuk by die Universiteit Stellenbosch afsluit, laat hy ’n blywende nalatenskap agter: ’n geloof in die krag van kleinsakeondernemings, ’n verbintenis tot uitnemendheid en geslagte studente wie se uitkyk – en lewens – hy deur sy leiding help vorm het.

Die Fakulteit bedank hom vir sy jare lange diens, toewyding en passie en wens hom alle sukses toe met die opwindende pad wat voorlê.