Drie vooraanstaande akademici aan die Universiteit Stellenbosch (US) is as Hoogs Aangehaalde Navorsers aangewys, volgens die Highly Cited Researchers™ 2021-lys van die Web of Science Group, wat Dinsdag (16 November) vrygestel is.

Professors Oonsie Biggs (kruisvelde) Umezuruike Linus Opara (Landbouwetenskappe) en Dave Richardson (Omgewing en Ekologie) is van die wêreld se mees aangehaalde navorsers.

Biggs is die bekleër van die DSI/NRF Navorsingsleerstoel in Sosiaal-Ekologiese Stelsels en Veerkragtigheid in die Sentrum vir Komplekse Stelsels in Oorgang. Opara, 'n vooraanstaande professor, beklee die DSI-NRF Suid-Afrikaanse Navorsingsleerstoel in Na-oes Tegnologie, terwyl Richardson (ook 'n vooraanstaande professor) die Direkteur van die DSI-NRF Sentrum van Uitnemendheid vir Indringerbiologie en Professor in die Departement Plantkunde en Dierkunde is.

“Hierdie onderskeiding van drie van ons topnavorsers erken die gehalte en impak van hul navorsing. Die US is baie trots op hierdie prestasie,” het prof. Eugene Cloete, Adjunk-Visekanselier: Navorsing, Innovasie en Nagraadse Studies aan die US, gesê.

Die hoogs verwagte lys identifiseer wetenskaplikes en sosiale wetenskaplikes wat verskeie artikels gelewer het wat in die top 1% volgens aanhalings vir hul veld en publikasiejaar tel, wat beduidende navorsingsinvloed onder hul eweknieë toon. Vanjaar se lys bevat 6 602 Hoogs Aangehaalde Navorsers uit meer as 70 lande en streke in 21 velde van die wetenskappe en sosiale wetenskappe.

Biggs, Opara en Richardson bevind hulself in vooraanstaande geselskap langs 24 Nobelpryswenners, insluitend vyf wat vanjaar aangekondig is, en 77 Aanhalingspryswenners. Laasgenoemde groep is individue wat deur Clarivate, deur middel van aanhalingsanalise, as 'van Nobel-klas' en potensiële Nobelprysontvangers erken word.

Die metodologie wat die wie's wie van invloedryke navorsers bepaal, put uit die data en analise wat deur bibliometriese kundiges van die Instituut vir Wetenskaplike Inligting by die Web of Science Group uitgevoer is. Dit gebruik InCites Benchmarking & Analytics, Essential Science Indicators en 'n unieke samestelling van wetenskaplike prestasiemetrieke en tendensdata gebaseer op publikasietellings van akademiese artikels en aanhalingsdata van die Web of Science, die wêreld se grootste uitgewer-neutrale aanhalingsindeks en navorsingsintelligensieplatform.

David Pendlebury, hoof van navorsingsanalise by die Instituut vir Wetenskaplike Inligting, het kommentaar gelewer oor die 2021-lys en gesê: "Dit word toenemend belangrik vir nasies en instellings om die uitsonderlike navorsers te erken en te ondersteun wat die uitbreiding van die wêreld se kennis dryf. Hierdie lys identifiseer en vier uitsonderlike individuele navorsers wat 'n beduidende impak op die navorsingsgemeenskap het, soos blyk uit die tempo waarteen hul werk deur hul eweknieë aangehaal word.

"Die navorsing wat hulle bygedra het, dryf die innovasie, volhoubaarheid, gesondheid en sekuriteit aan wat die sleutel is vir ons samelewing se toekoms," het hy bygevoeg.

Die volledige lys van hoogs aangehaalde navorsers vir 2021 en uitvoerende opsomming kan hier gevind word, en die metodologie kan hier gevind word.