Wanneer jy aan IT dink, dink jy dalk aan bedieners, kode of kuberveiligheid. Maar agter elke stelsel is daar ’n person wat help om komplekse besigheidsbehoeftes te vertaal na werklike digitale oplossings. As ’n IT-besigheidsverhoudingsbestuurder dien Teboho Mphuthi as die skakel tussen Finansies en die IT-afdeling – iemand wat luister, interpreteer en die beste oplossings vind om idees vorentoe te neem.

“My rol gaan eintlik daaroor om wedersydse begrip te bou,” verduidelik Teboho. “Soms lyk iets soos ’n tegnologie-probleem, maar is dit eintlik ’n proses-kwessie, en ek help spanne om dit raak te sien en uit te pluis. Dit is nie altyd ’n tegniese oplossing wat nodig is nie.”

“Ek geniet die gesprekke wat ons laat dink oor hoe ons dinge beter kan doen – vinniger, slimmer en met minder rompslomp."

Teboho vergader gereeld met verteenwoordigers van fakulteite en ondersteuningsdienste om uitdagings te ontleed en te bepaal waar IT kan help – en waar verandering dalk eerder oor mense, stelsels of werkprosesse gaan. “Ek geniet die gesprekke wat ons laat dink oor hoe ons dinge beter kan doen – vinniger, slimmer en met minder rompslomp,” sê hy. “En sodra ons die behoefte verstaan, help ek om die regte IT-hulpbronne te koördineer om die werk gedoen te kry.”

Voordat hy by die Universiteit aangesluit het, het Teboho sy loopbaan in onderhoud en ingenieurswese begin, waar hy stelsels verfyn het om betroubaarheid en prestasie te verbeter. Daardie vroeë werk, wat daarop gefokus was om probleme te voorkom voordat dit ontstaan, het later sy benadering tot IT beïnvloed: deeglik, metodies en sterk mensgerig.

“Ek het in aanlegonderhoud begin werk, waar ek betroubaarheidsgebaseerde instandhouding en dinge soos vibrasiemonitering gedoen het. Ek was gefassineer deur hoe ons data kon gebruik om beter besluite te neem en onderbrekings te voorkom,” onthou Teboho.

Sy skuif na IT het gekom deur ERP-implementerings (Enterprise Resource Planning), waar hy ’n passie ontwikkel het vir die oplossing van besigheidsuitdagings deur stelseldenke. “Ek het Besigheidsinligtingstelsels studeer en betrokke geraak by HR ERP-implementerings. Dit was die begin van my besef van hoe IT die manier waarop organisasies werk, kan verander.”

Maar vir Teboho is dit nie bloot werk nie – dit is ’n roeping wat gewortel is in doelgerigtheid. Daardie tema loop soos ’n goue draad deur sy lewe. Buite die kantoor is hy ’n ultramarathon-atleet wat die Comrades Marathon reeds vier keer voltooi het.

"Langafstandhardloop leer jou geduld, dissipline en hoe om uitdagings in kleiner dele op te breek.”

“Langafstandhardloop leer jou geduld, dissipline en hoe om uitdagings in kleiner dele op te breek,” sê Teboho. “Jy hardloop nie 90 km op een slag nie – jy fokus op die volgende waterpunt, die volgende heuwel. Dit is presies dieselfde met IT-projekte.”

Een van die grootste invloede op Teboho se lewens- en leierskapsbeskouing is die boek Man's Search for Meaning deur Viktor Frankl. “Dit is een van daardie boeke wat werklik my perspektief verander het. Frankl skryf oor hoe ’n mens selfs in swaarkry betekenis kan vind, en dat betekenis iets is wat jy deur jou optrede skep,” vertel Teboho. “Of dit nou die Comrades is of ’n moeilike implementering by die werk, dit herinner my waarom ek aanhou opdaag.”

Daardie sterk ooreenstemming tussen persoonlike waardes en professionele doelgerigtheid is deel van wat Teboho na die Universiteit Stellenbosch gelok het. “My verhuising na die Wes-Kaap was ’n gesinsbesluit, maar om by die Universiteit aan te sluit, het eenvoudig reg gevoel,” deel hy. “Dit is ’n instelling wat navorsing, innovasie en impak waardeer – en ek kry die geleentheid om deel daarvan te wees.”

Buite werk (en hardloop) geniet Teboho ook fietsry en om motorsport saam met sy kinders te kyk. “Ek hou van die strategieë in motorsport – wanneer om bande te vervang, hoe brandstofstrategie die uitslag beïnvloed. My kinders en ek leef ons behoorlik daarin uit.”

Op Sondag, 14 Junie 2026, pak Teboho sy vyfde Comrades-marathon aan. Terwyl hy voorberei vir nog 90 kilometer op die pad, dink hy na oor die ooreenkomste tussen hardloop en sy werk in IT.

"Of dit nou ’n marathon of ’n groot IT-projek is, daar is altyd ’n span agter jou, en daardie ondersteuning maak al die verskil.”

“Die Comrades leer jou dat elke groot doel een tree op ’n slag bereik word,” sê hy. “Maar dit herinner jou ook daaraan dat sukses nooit ’n solo-poging is nie. Of dit nou ’n marathon of ’n groot IT-projek is, daar is altyd ’n span agter jou, en daardie ondersteuning maak al die verskil.”