Die Stellenbosch Universiteitskoor het weer 'n prys ingepalm – dié keer het die koor die WoordTROfees-prys ontvang vir sy optrede tydens die US Woordfees in Maart. Dié prys is aan die koor toegeken in die kategorie vir vokale klassieke musiek.

In Februarie het die US Koor ook 'n Fiësta-toekenning ontvang vir sy optrede op 2015 se US Woordfees.

Die sewende jaarlikse WoordTROfees, waarmee die US Woordfees sy beste produksies en kunstenaars bekroon, is Maandagaand (18 April) tydens 'n geleentheid by die Stellenbosse Stadsaal gehou. Die akteurs Marlo Minnaar en Esther von Waltsleben het as seremoniemeesters opgetree en vermaak is deur Yvonne Chaka Chaka en die Young Caballeros-koor van Kaapstad verskaf.

Die volledige lys wenners is as volg:

Toneel, Beste Speler: Andrew Buckland – Tobacco and the Harmful Effects Thereof

Toneel, Beste Byspeler: Rob van Vuuren – A Doll's House

Toneel, Beste Regisseur: Christiaan Olwagen – A Doll's House

Toneel, Beste Produksie: A Doll's House

Woordkuns: Praat van die Duiwel – Johann Nel en Juanita Swanepoel

Kontemporêre Musiek, Solo: Yvonne Chaka Chaka – The Princess of Africa

Kontemporêre Musiek, Groep: Kô, lat ons sing!

Klassieke Musiek, Vokaal: Stellenbosch Universiteitskoor onder leiding van André van der Merwe

Klassieke Musiek, Instrumentaal: Ben Schoeman – Schoeman in Konsert

Visuele Kuns: Lien Botha – Wonderboom

Opkomende Kunstenaar: Francois Knoetze

Deurbraak: The Banquet: The Room of Dreams – Ju-Ju Domingo en Lucas Heinen

Gewildste Boek, Prosa: Bly – US Woordfees 2016

Gewildste Boek, Leefstyl: Kook saam Kaaps – Koelsoem Kamalie en Flori Schrikker

Gewildste Boek, Poësie: Hammie – Ronelda S. Kamfer

Woordfees Helde: Dawid en Henk Fourie

WOW Opvoeder van die Jaar: Antonia du Toit

WOW Skool van die Jaar: Strand Sekondêre Skool

'n Paneel van kundige beoordelaars het vir die benoemdes en wenners in elke kategorie gestem. Die boekpryse word bepaal deur die beste boekverkope tydens die Woordfees by die ATKV-boekwinkel op die terrein.

Die US Woordfees 2017  word van 3 tot 12 Maart 2017 op Stellenbosch aangebied.