US gestremdheidsnavorsing uitgelig in The Lancet
Kenners van die Universiteit Stellenbosch (US) se Afdeling Fisioterapie het onlangs twee artikels in die gerekende mediese joernaal, The Lancet, gepubliseer.
Medeprofessor Tracey Smythe, wat die hoofouteur vir beide artikels is, het die publikasies verwelkom en gesê dit is 'n geleentheid om die US se bydraes op die gebied van gestremdheidsnavorsing te deel.
“Dit is wonderlik dat The Lancet ons werk en die implikasies wat ons navorsing oor gestremdheid kan hê ten toon stel," sê Smythe, 'n Zimbabwiese fisioterapeut wat gesekondeer is om by die US te werk van die London School of Hygiene and Tropical Medicine (LSHTM) in die Verenigde Koninkryk.
Gestremdheid-inklusiewe gesondheidsorg
Met verwysing na die artikel getiteld 'Health-worker education for disability in health', het Smythe gesê: “Wêreld Persone met Gestremdhede Dag is waargeneem op 3 Desember. In die lig daarvan het ons uitdagings en oplossings geïdentifiseer om gestremdheid-inklusiewe gesondheid te bevorder. Daar is meer as 1,3 miljard individue met gestremdhede wêreldwyd en hulle sal 10 tot 20 jaar vroeër as die algemene bevolking sterf. Alhoewel daar baie inisiatiewe was om mense met gestremdhede te ondersteun, het gesondheidsorgwerkers dikwels nie die vaardighede om voldoende sorg aan mense met gestremdhede te verskaf nie."
Smythe het gesê die navorsing beklemtoon die sistematiese hindernisse en die afwesigheid van protokol vir gesondheidsorgwerkers om oor mense met gestremdhede te leer. “In die artikel maak ons voorspraak vir beleide wat gestremdheidsbevoegdhede sal integreer. Nieteenstaande verskeie bevoegdhede in die onderrig van gesondheidswerkers geïntegreer is, word gestremdheidverwante vaardighede dikwels in gesondheidsopvoeding oorsien."
Die artikel lig ook suksesvolle inisiatiewe uit – insluitend lesse uit Indië en Uganda – wat gevalle van die bevordering van gestremdheid-inklusiewe gesondheid ten toon stel.
Smythe hou vol dat gestremdheid nie voldoende geprioritiseer word in die globale gesondheidsagenda nie. “Ten spyte van die stigting van 'n Groep vir Gestremdheid, Billikheid en Geregtigheid vir die eerste keer in die Groep van Twintig (G20) in Indië in 2023, het wêreldleiers nie daarin geslaag om gestremdheid uitdruklik in die aanbevelings van die G20-verklaring aan te spreek nie. Nieteenstaande bestaande bewyse dat finansiële belegging in 'n gestremdheid-inklusiewe gesondheidsektor 'n belegging met dividende is," lui die artikel.
Die navorsing hou vol dat verbeterings in toeganklikheid en gefokusde opleiding van gesondheidswerkers nodig is vir inklusiewe gesondheidsorg. Die houdings van personeel in gesondheidsfasiliteite benodig ook 'n positiewe transformasie. Terwyl sekere vordering gemaak is – met mediese onderwys in sommige lande wat nou gestremdheid, menseregte en redelike aanpassings insluit – is sommige van hierdie inisiatiewe deur die gestremdheidsgemeenskap gekritiseer omdat dit verouderd is.
Die artikel wys daarop dat ministeries van gesondheid en professionele gesondheidsrade "robuuste beleide" moet vestig wat gestremdheidsbevoegdhede in verpligte kurrikulums, akkreditasie en professionele lisensiëring insluit. Dit voer ook aan dat meer mense met gestremdhede betrokke moet wees by die onderrig van mediese personeel, sowel as by die opleiding van toekomstige gesondheidsorgwerkers.
Gestremdheid en speelgeleenthede
Die tweede artikel, 'Do children with disabilities have the same opportunities to play as children without disabilities? Evidence from the multiple indicator cluster surveys in 38 low and middle-income countries', gepubliseer in The Lancet eClinicalMedicine, identifiseer die deurslaggewende gaping in speelgeleenthede tussen kinders met gestremdhede en kinders daarsonder.
Smythe het die belangrikheid van spel tydens vroeë kinderontwikkeling beklemtoon "omdat kinders deur speel ontwikkel."
Sy het gesê die studie, 'n samewerking tussen die US, LSHTM, die Clinton Health Access Initiative, en kundiges van die Wêreldgesondheidsorganisasie, het data van 212 194 kinders ondersoek wat die verskille in speelgeleenthede vir kinders met gestremdhede in 38 lande uitlig.
“Ons het gevind dat kinders met gestremdhede minder geleenthede het om te speel, oor veelvuldige mates van spel en in verskeie omgewings, en dat dit verskil volgens gestremdheid, en die ergste was vir kinders met leer- en kommunikasiegestremdhede.
“Ons het ook gewys daar is 'n verskil tussen meisies en seuns met gestremdhede. Ons bevindinge onderstreep die behoefte aan inklusiewe vroeë kinderontwikkeling en speelprogramme, met klem op veranderinge vir inklusiwiteit, monitering van deelname en geteikende intervensies vir kinders met leer- of kommunikasiegestremdhede."
“Speel is noodsaaklik vir die sosiale, emosionele en kognitiewe ontwikkeling van alle kinders. Wat ons in hierdie analise gevind het, is dat kinders met leergestremdhede geneig was om baie minder geleenthede te kry om te speel. Hulle is deurgaans minder geleenthede gebied, en ongelykhede was meer beklemtoon in sommige lande weens kontekstuele faktore, oortuigings en beskikbaarheid van hulpbronne. Ons bevindinge het die behoefte aan inklusiewe vroeë kinderontwikkeling en speelprogramme uitgelig. ʼn Wêreldwye poging is nodig om data te genereer en te gebruik wat die gestremdheidsreaksie van nasionale kinderontwikkelingsbeleide naspoor, wat groter aanspreeklikheid bevorder."
Oorbrug gapings in gestremdheidsnavorsing
Wat die agtergrond van die werk aanbetref, het Smythe gesê dat, in ooreenstemming met hul verbintenis om gapings in gestremdheidsnavorsing te oorbrug, die Stellenbosch Gestremdheidsnavorsingsnaaf (Disability Research Hub) verlede jaar gestig is.
"Hierdie samewerkende netwerk, gelei deur Xanthe Hunt en Lieketseng Ned, is daarop gemik om interdissiplinêre samewerking te bevorder, hoë-gehalte data-insameling van gestremdhede te ondersteun en bewyse te verskaf vir die integrasie van gestremdheid-inklusiewe praktyke binne gesondheidsorgstelsels."
Sy het gesê dat sy deur haar werk kennis genereer om "die gaping tussen akademie en gesondheidsdienslewering te oorbrug, met 'n fokus op implementeringswetenskap en deelnemende navorsing om die gesondheid van mense met gestremdhede te verbeter." Sy het beklemtoon dat werk aan die artikels 'n spanpoging was.
Smythe het gesê sy glo die twee artikels het globale gesondheidsimplikasies, veral op die gebied van gestremdheidsnavorsing.
“Om saam met kollegas by die US te werk het my 'n dieper begrip van ons werk se konteks in Suid-Afrika gebied en 'n geleentheid gegee om kritieke leemtes in die veld aan te spreek.
"Fisioterapie, op die gebied van globale gesondheid, dien as 'n sleutelspeler in die verbetering van fisiese welstand en die verbreding van toegang tot rehabilitasiedienste. Deur op funksionering te fokus, dra fisioterapie by tot die skep van 'n meer inklusiewe en billike gesondheidsorgomgewing vir diverse bevolkings wêreldwyd."
Banierfoto: Freepik
Foto-insetsel: Prof Tracey Smythe