Lee Baatjes, die nuut-verkose voorsitter van die 2016/17 Tygerberg-studenteraad (TSR), beskou sy leierskaprol om as voorspraakmaker op te tree vir TygerMatie-studente om hulle te bemagtig om hul menings te lug.

Volgens Baatjes is die TSR ʼn kernstruktuur wat met alle studente moet skakel om ʼn positiewe impak op die Tygerberg-kampus te bewerkstellig. "Ek wil gedurende my termyn kommunikasiekanale daarstel om die geïntegreerde verhoudings tussen die verteenwoordigende liggame en die studente te verbeter."

Baatjes, ʼn vierdejaar- MB,ChB-student en inwoner van Hippokrates, het genoem dat hy deur sy betrokkenheid by leierskapstrukture geleenthede gehad het om met verskeie bestuurslede van die Fakulteit Geneeskunde en Gesondheidswetenskappe (FGGW) in aanraking te kom. Hy beoog om dié ondervinding en 'sagte vaardighede' (soft skills) wat hy tydens hierdie geleenthede opgedoen het te gebruik om die studente se mandaat verder te neem.

Bogenoemde is tydens die onlangse #FeesMustFall-veldtog deeglik getoets toe Baatjes en sy nuutverkose span ʼn fasiliterende rol tussen die studente en bestuur moes speel om oplossings te vind tot voordeel van alle partye.

Baatjes is nie bang om netelige kwessies kaalvuis aan te pak nie. Hy het gesê hy wil gedurende sy ampstermyn kwessies aanspreek wat mense op enige manier uitsluit, soos diskriminering teenoor mense met gestremdhede en die marginalisering van studente op enige manier, byvoorbeeld deur taalgebruik, seksuele oriëntering, geloof en sekere studentetradisies. Hy sal ook graag ʼn verbetering in gesondheidsorgfasiliteite op die Tygerberg-kampus wil sien.

Tydens sy ampstermyn as ʼn huiskomiteelid vir Hippokrates, was hy aan die voorpunt om ʼn oop en inklusiewe koshuiskultuur te bevorder. "Met die veldtog het ons dit reggekry om die volgende af te skaf: die Hippo-huislied, die oumanne-klub en die 'Tour de Francie', wat na my mening tot ʼn verkragtingskultuur kan bydra," het hy gesê.

Hy was ook die eerste om ʼn begroting tydens ʼn oop huisvergadering voor te lê en het ʼn nuwe vergadering ingestel, die Huisforum, wat as ʼn platform dien waar inwoners vrae aan die leiers van die koshuis kan rig.

As trotse TygerMatie, het Baatjes reeds in verskeie kampusaktiwiteite uitgeblink en Hippokrates-erekleure vir leierskap, sport en kultuur ontvang. Hy skryf sy suksesse toe aan sy vermoë om sy tyd doeltreffend te bestuur.

Hy het in Uitenhage in die Oos-Kaap grootgeword waar hy aan Muir College Boys High skoolgegaan het.

Die 2016/17 TSR

Die nuwe TSR-lede beklee sedert 1 September hulle posisies. Die span en hulle portefeuljes is:

Lee Baatjes - Voorsitter / Voorsitter van Uitvoerende Komitee (UK) / Universiteit Stellenbosch Studenteraad

Shaahid Kajee - Ondervoorsitter / Portefeuljebestuurder / UK

Lungelo Mlambo - Tesourier / Beleidseenheid / UK

Akua Gyan - Sekretaris / Studente-ontwikkeling / UK

Bohlale Selahle - Studentewelwees / UK

Lisa Africa - Media en Bemarking / Kultuur

Yonela Kentane - Sport / Kritiese Betrokkenheid

Nhlakanipho Mahagane - Studentedienste

Tracy Ward - Kampusinteraksie

Mamosala Lelope - Bestuurder: Sosiale Impak

Ex-officio lede:

Ilana van Niekerk - Voorsitter: Tygerberg Akademiese Belangeraad / Prestige

Tevarus Naicker - Voorsitter: Primkomitee

Kirsten Marais - Voorsitter: Verenigingsraad

Ascentia Seboko - Voorsitter: Tygerberg Nagraadse Studenteraad