​Die tweede jaar van die COVID-19-pandemie was nog meer uitdagend as die eerste een, maar die personeel en studente van die Universiteit Stellenbosch (US) het hulself uitstekend van hul taak gekwyt.

Dít was Prof Wim de Villiers, die US se Rektor en Visekanselier, se hoofboodskap tydens die jaar se derde en finale personeelbyeenkoms op 8 Desember 2021. Dit het aanlyn plaasgevind.

Prof De Villiers het gesê die US moes in 2021 by nuwe omstandighede aanpas. “'n Beduidende verandering van verlede jaar is dat ons studente na die kampus kon terugbring, en dat ons meestal 'n hibriede metode van leer en onderrig gevolg het," het hy gesê. “Die US is 'n residensiële universiteit met topfasiliteite en infrastruktuur wat ontwerp is om studente op kampus te hê om aan hulle 'n verrykende ervaring binne en buite die klaskamer te bied."

Die Rektor het ook die Institusionele Komitee vir Bedryfsvoortsetting (IKBV) se besluit wat onderrig, leer en assessering in persoon aanbeveel, uitgelig. Dit sal vereis dat alle studente en personeel terugkeer kampus toe, in​​dien COVID-19 dit toelaat.

Hy het ook gesê die IKBV sal die situasie en die huidige vierde golf van infeksies deurgaans monitor, en enige besluite aan personeel deurgee.

Prof De Villiers het ook op sommige van die hoofaktiwiteite by die US die afgelope paar maande gefokus. Dit het ingesluit die proses rondom 'n COVID-19-inentingsreël, die hersiene Taalbeleid, die nuwe handelsmerk, begrotingsaankondigings vir 2022 en planne vir die Desember-gradeplegtigheid. Baie van sy gesprekspunte is ook in die mees onlangse kommunikasie uit die raad saamgevat, insluitende die feit dat daar vanaf 2022 'n algemene styging van 4,5% in personeelvergoeding sal wees.

Verder het hy gepraat oor die US se prestasie op die 2022 Times Higher Education World University Rankings, waar die instelling tans tweede in Afrika geplaas is, 24ste op die Opkomende Ekonomie-ranglys, en in die top 500 asook beste in Afrika vir Rekenaarwetenskapstudies; hy het die indrukwekkende eerstejaaraansoekstatistieke vir 2022 genoem, 'n getal wat 55 000 oorskry; en personeelprestasies soos die voormalige Stellenbosch Instituut vir Gevorderde Studie (STIAS)-genoot Abdulrazak Gurnah se Nobelprys vir Letterkunde en US-kanselier Regter Edwin Cameron se Nasionale Orde-toekenning beklemtoon.

Prof De Villiers het ook inisiatiewe soos die Ikusasa Student Financial Aid Program en Dell Young Leaders Programme uitgelig vir hul omvattende ondersteuning van US-studente.

Tydens die tweede deel van die vergadering het prof De Villiers namens Prof Deresh Ramjugernath, Viserektor: Leer en Onderrig, 'n aanbieding gelewer. Prof Ramjugernath kon nie die vergadering bywoon nie. Hy het onder meer die Verantwoordelikheidsentrum se vordering met hibridiese leer beklemtoon, asook die sukses met die hersiene Taalbeleid.

Prof Ramjugernath is aan die begin van die jaar in hierdie pos aangestel.

Prof Nico Koopman, Viserektor: Sosiale Impak, Transformasie en Personeel, het personeel herinner aan die Werknemerondersteuningsprogram wat personeelwelstand bevorder. Hy het personeel daaraan herinner dat hulle ongebruikte verlof vanaf 2021 gedurende Januarie 2022 kan neem, en hulle aangemoedig om dit te doen.​​