​As deel van ons 60ste vieringe, stel die Fakulteit Geneeskunde en Gesondheidswetenskappe 60 toekomstige gesondheidsorgwerkers bekend wat tans eerstejaars is. Ontmoet Thiven Padayachy.

As hy R5 miljoen gehad het, sou Thiven Padayachy dit gebruik om in ’n Kentucky Fried Chicken-kettingwinkel te belê. Dit mag dalk klink soos ’n besigheidsbesluit, maar dit sal ook Padayachy se self-erkende slegste gewoonte voed: sy liefde vir kitskos.Maar buiten die feit dat Padayachy, ’n eerstejaar MB,Chb-student aan die Unversiteit Stellenbosch, KFC se bros hoendervlerkies dalk té gereeld geniet, het hy heelwat goeie gewoontes wat baat. "Moenie uitstel wat jy nou kan doen nie," is sy raad aan studente wat sukkel met tydsbestuur. Hy voeg self daad by woord en spandeer daagliks sowat ses ure aan sy studies. Met dié hoeveelheid toewyding is dit geen wonder dat Padayachy verlede jaar as die top-matrikulant in die Noord-Kaap aangewys is nie. Hy het sewe onderskeidings behaal.Hoewel Padayachy soms ook droom van ’n beroep as ’n ruimtevaarder, is hy opgewonde oor sy gekose studierigting. "Ek stel baie belang in gesondheid. Ek het al te veel gesien hoe mediese probleme nabye familielede se lewens beïnvloed het en juis daarom op dié rigting besluit.”Het jy geweet…

• Hy kan baie goed domspeel as dit hom pas.
• Sy gunsteling fliekkarakter is Harry Potter. "Hy kan towerkuns verrig en moes baie uitdagings in sy lewe oorkom."
• Padayachy is ’n middelkind.
• Hy luister graag na Bollywood-musiek.