Sowat vyf duisend nuwe studente word elke jaar by die Universiteit Stellenbosch verwelkom. Die verwelkoming, ʼn jaarlikse tradisie, skop af in verwelkomingsweek en stel studente bloot aan ʼn goed gebalanseerde studentelewe. ʼn Sosiale Impak-oggend is deel van die verwelkomingsprogram. Vanjaar neem studenteverenigings en klusters saam met koshuise en PSO's deel aan die aktiwiteite.

Die program begin op 26 Januarie 2017 van 09:00 tot 12:00, waartydens sommige koshuise buite die kampus verskeie inisiatiewe in plaaslike gemeenskappe sal ondersteun. As deel van hierdie inisiatiewe sal ʼn koshuis soos Huis ten Bosch na die Legacy-gemeenskapsprojek in Kayamandi gaan om geboue te verf saam met lede van die gemeenskap. Party koshuise besoek hul onderskeie vennote in die gemeenskap om aan aktiwiteite deel te neem, terwyl ander koshuise op kampus bly en deelneem aan inisiatiewe soos die maak van toebroodjies, insameling van skryfbehoeftes, optel van rommel en die verf van blikkies.

Hoewel die akademiese program by Tygerberg-kampus reeds aan die gang is, neem dié studente ook deel aan inisiatiewe op en buite die kampus. Aangesien Tygerberg die mediese kampus is, fokus die Osler Privaat Studente Organisasie (PSO) daarop om die omgewing in Tygerberg-hospitaal te verbeter deur potplante te versier en dankiekaartjies te maak. Die Hippokrates-koshuis gaan met ʼn kuns-en-kultuursessie by die Primêre Skool Northway erkenning gee aan hoe belangrik onderwys is.

ʼn Ekstra geleentheid word op kampus beplan vir studente wat nog nie by enige inisiatiewe betrokke is nie. Die UNASA-studenteorganisasie reël in samewerking met Matie Gemeenskapsdiens (MGD) en KANSA ʼn Shavathon om almal te verwelkom. Dit vind plaas voor Simonsbergkoshuis en duur die hele oggend. Daar is ook pryse op die spel vir koshuise met die beste deelname.

Die doel van die Sosiale Impak-oggend is om nuwe studente bekend te stel aan inisiatiewe vir gemeenskapsontwikkeling en om voort te bou op die kultuur van gemeenskapsinteraksie wat by die Universiteit Stellenbosch bestaan. Sosiale Impak skep hoop en studente word aangemoedig om deur middel van hul koshuise, PSO's, studenteverenigings en fakulteitskomitees betrokke te raak by Sosiale Impak-inisiatiewe sodat hulle ʼn omvattende leerervaring kan geniet. Hopelik sal Sosiale Impak se aktiwiteite dié oggend baie Maties inspireer om betrokke te raak en ʼn verskil te maak.

Vir meer inligting, kontak gerus vir Michelle Pietersen by Matie Gemeenskapsdiens: tel. 021 808 3638 / e-pos [email protected]

Programbesonderhede (soos ten tye van publikasie)