Stellenbosch University

Opvoedkundige Sielkunde

Die Departement Opvoedkundige Sielkunde staan aan die spits van leer en psigososiale ontwikkeling in skole en gemeenskappe. Deur innoverende navorsing en praktiese toepassing ontwerp ons programme wat mense help om hul volle potensiaal te bereik.

Ons dra by tot groter gelykheid en insluiting deur ondersteuning te bied wat aangepas is by die uiteenlopende behoeftes van leerders en opvoeders — sodat niemand agtergelaat word nie.
 

Ons bied ’n volledige akademiese leerpad vanaf honneursvlak tot doktorale studie. Hierdie programme rus jou toe met gevorderde vaardighede en grondige kennis om onderwyspraktyke ingrypend te verbeter en nuwe rigtings in die sielkundewetenskap te verken.

Deur akademiese verdieping te kombineer met betekenisvolle internskapervarings, help ons jou om met selfvertroue jou loopbaan in opvoedkundige sielkunde te begin — en om blywende waarde toe te voeg tot onderwys én geestesgesondheid.
 

Kontak ons
+27 21 808 2306
[email protected]

Praktykeenheid
+27 21 808 2229
[email protected]

Straatadres
Kamer 2022, 2de Vloer
GG Cillié-gebou
Ryneveldstraat
Stellenbosch
 

“Ons volg gevestigde professionele riglyne en kombineer akademiese opleiding met praktiese internskappe sodat jy goed toegerus is vir ’n veranderende beroepsveld.”

Ons Programme

BEdHons in Opvoedkundige Ondersteuning

’n Eenjaarprogram wat teorie en praktyk integreer om jou voor te berei op inklusiewe leeromgewings. Jy ondersoek leerhindernisse, ondersteuningsbenaderings en interpretatiewe navorsingsmetodes.

MEd in Opvoedkundige Ondersteuning

Hierdie program rus jou toe om leerders met verskillende leerbehoeftes raak te sien en te ondersteun. Jy verken temas soos inklusiewe onderwys, ondersteuning in skole en gemeenskappe en kwalitatiewe navorsing.

MEd in Opvoedkundige Sielkunde

’n Tweejaarprogram wat navorsingsvaardighede ontwikkel en jou prakties voorberei om te kan werk as ’n opvoedkundige sielkundige. Die program sluit ’n 12-maande internskap en die aflegging van die HPCSA-raadseksamen in.

PhD in Opvoedkundige Ondersteuning en Sielkunde

’n Gevorderde navorsingsgerigte graad wat jou in staat stel om met oorspronklike werk ’n bydrae te lewer tot opvoedkundige sielkunde, met spesiale fokus op inklusiewe onderwys en leerondersteuning.