​Die Stellenbosse Instituut vir Gevorderde Navorsing (STIAS) is onlangs met akademiese trots gevul toe die Universiteit Stellenbosch (US) die jaarlikse Viering van Uitnemendheid in Onderrig-Leer-Assessering-geleentheid aangebied het. Dié feestelike geleentheid het opvoeders, institusionele leiers en akademici byeengebring om die toegewyde individue te vereer wat leer en onderrig aan die US en aanhou transformeer.

Prof Lis Lange, waarnemende Senior Direkteur: Leer- en Onderrigverryking, het die geleentheid geopen deur gaste te verwelkom en het die belangrikheid benadruk van vennootskappe tussen fakulteite en die afdeling wat sy lei. Sy het prof Deresh Ramjugernath, die hoofspreker en die US se Rektor en Visekanselier, aan die woord gestel, wat die noodsaaklike rol van leer, onderrig en assessering in die bereiking van die Universiteit se Visie 2040 beklemtoon het.

“Ons is op ʼn transformasiereis," het Ramjugernath gesê. “Ons kurrikulum, programme, metodologieë en pedagogieë moet relevant en in pas met die tye wees, maar wat veral belangrik is, is dat dit die soort gegradueerdes sal oplewer wat die wêreld vandag en in die toekoms nodig het."

Hy het die ontvangers geprys vir hulle kreatiwiteit, akademieskap en onwrikbare toewyding tot inklusiewe, transformerende onderwys. “Julle pogings gaan nie bloot oor die oordrag van kennis nie," het hy aan die gehoor gesê. “Dit gaan oor die vorming van mense se toekoms. Dit is wat julle as akademici in hierdie instelling doen. Julle vorm mense se toekoms deur vertroue te bou en te verseker dat ons studente akademies én persoonlik floreer," het Ramjugernath gesê.

Hy het ook die belangrikheid van die US se Onderriggenote en die genote van die nasionale Genootskapsprogram vir Onderrigbevordering op Universiteit (TAU) bevestig. “Hulle is vaandeldraers ... en herinner ons daaraan dat onderrig nie ʼn statiese vaardigheid is nie. Dit is ʼn immer ontwikkelende praktyk wat deur nuuskierigheid, kritiese vraagstelling en ʼn toewyding tot uitnemendheid voortgedryf word."

Ná sy toespraak het die viering van die ontvangers van gesogte onderrigtoekennings en -genootskappe begin. Hulle is deur dr Nicoline Herman, Direkteur van die Sentrum vir Onderrig en Leer, bekend gestel.

Die eerste groep wat gevier is, was die ontvangers van die Onderrig-Leer-Assessering-toekennings vir 2024: Dr Sophia Brink, Munira Hoosain, dr Ruenda Loots, dr Marietjie Lutz, dr Rhoda Meyer en prof Lungiswa Nkonki. Elkeen van hulle het met behulp van ʼn videomontage insig in hulle onderrigfilosofieë gebied – met die klem op reflektiewe praktyk, inklusiwiteit en innovasie.

Daarna is erkenning verleen aan twee akademici wat onlangs US-onderriggenootskappe voltooi het: profs Deborah Blaine en Taryn Bernard. Hierdie genootskappe ondersteun deurtastende navorsingsprojekte wat ʼn impak op onderrig, leer en assessering aan die Universiteit en nasionaal het. Die huidige bekleërs van die US-onderriggenootskappe is dr Marnel Mouton, prof Nicola Plastow, dr Mariëtte Volschenk, Sybil Smit, prof Debra Shephard en dr Rhoda Meyer.

Erkenning is voorts verleen aan die SU se TAU-genote, wat deel van die nasionale Universiteitskapasiteitsontwikkelingsprogram uitmaak. Die huidige genote, proff Elize Archer en Shantal Windvogel, is gehuldig en twee nuwe genote, proff Bronwyne Coetzee en Simone Titus-Dawson, is verwelkom.

In die nasionale kategorie is twee SU-akademici vir hulle impak vereer: prof Faadiel Essop, wat ʼn 2024- TAU-genoottoekenning vir sy werk in meertalige mediese onderwys en die uitdaging van wetenskaplike elitisme ontvang het; asook prof Nicola Plastow, wat ʼn eervolle vermelding by die 2024- Nasionale Universiteitsonderrigtoekennings (NUTA) ontvang het.

Faadiel, wat nie self by die geleentheid kon wees nie, het in 'n video-boodskap gesê dat dit 'n “groot eer en voorreg" is om met die TAU Fellows-toekenning erken te word. Hy het besin oor sy reis van mediese navorser tot onderrig-kenner. As pedagoog beklemtoon hy kritiese bewussyn, menslike potensiaal en kurrikulêre transformasie. Hy is 'n voorstander van interdissiplinêre leer, storievertelling in die klaskamer en 'n meer kontekstueel gegronde benadering tot mediese onderwys. “Waar daar 'n wil is, is daar 'n weg," het hy gesê terwyl hy 'n beroep gedoen het tot dieper besinning, kreatiwiteit en 'n mens-georiënteerde pedagogie gewortel in geregtigheid, nuuskierigheid en deernis.

Plastow, medeprofessor in arbeidsterapie en ʼn vorige ontvanger van ʼn Onderriggenootskap én ʼn Uitnemende Onderrigtoekenning van die US, het ʼn diep persoonlike en belangwekkende toespraak gelewer. Langs haar was ʼn lappieskombers wat sy vir haar dogter gemaak het en sy het die kuns van kwiltwerk met die akademiese reis vergelyk.

“Wanneer ons die stukke van akademikus-wees doelbewus aanmekaarwerk, word ʼn produk gelewer wat meer is as die som van sy dele," het sy verduidelik. Plastow het oor onderrig, navorsing, gemeenskapswerk en ouerskap gepraat en veral besin oor haar passie vir maatskaplike deelname en beroepsgeregtigheid. Een van haar mees aangrypende voorbeelde het toesig oor ʼn PhD-student van Gasa behels.

“Die akademiese lewe is ʼn projek van nalatenskap; dit duur voort ná ons tyd hier," het Plastow opgemerk. “Dit is regtig belangrik dat ons erken dat die werk wat ons doen ʼn onuitwisbare merk gaan laat op die studente met wie ons werk," het sy afgesluit.

Akademiese personeellede wat verskillende kortkursusse voltooi het, is ook by die geleentheid vereer, asook die ontvangers vroeër vanjaar van die ROCTAS-toekennings (wat erkenning aan dosente se bydrae tot studentesukses verleen).

Die aand is afgesluit met ʼn diepsinnige toespraak deur prof Richard Stevens, waarnemende Viserektor: Leer en Onderrig. Hy het die kompleksiteit van hedendaagse studente en die morele en pedagogiese imperatief om hulle as individue te erken in oënskou geneem.

Deur aan poësie en letterkunde te ontleen, het Stevens die US aangespoor om verder as rigiede akademiese strukture te beweeg. “Ons moet akademiese vernuwing definieer en dit betekenisvol in gebruik neem – deur te kyk hoe ons programme veranderende kennisbasisse, globale tendense en die behoeftes van die samelewing weerspieël," het hy gesê. Hy het benadruk dat kurrikulumvernuwing meer as die voldoening aan administratiewe vereistes moet behels; dit moet holisties en gekoördineerd wees en op studentesukses fokus. “Ons uitdaging is om bemagtigende omgewings binne fakulteite te bied sodat akademiese vernuwing ʼn sukses en ʼn voortgesette proses is," het Stevens gesê.

• Profiele van sommige van die akademici wat by die geleentheid erken is, sal as deel van die US se Vrouemaand-dekking op die US-webwerf verskyn. Hou die webwerf dop vir hulle stories.

Volledige lys van toekennings by die viering van uitnemendheid in Onderrig-Leer-Assessering-geleentheid:

US-ontvangers van 2024- TLA-toekennings

US-onderriggenote

TAU-genote by US

TAU-genootskaptoekennings

NUTA-toekennings (eervolle vermelding)

ROCTAS-wenners

Volledige inligting oor die name van wenners wat by die funksie in Mei gevier is, is hier beskikbaar: http://www.sun.ac.za/english/learning-teaching/ctl/t-l-awards-and-grants/roctas

Konferensie oor die Akademieskap van Onderrig en Leer: 2024-pryswenners

Akademieskap van Opvoedkundige Leierskap kortkursus: 2024-deelnemers

Akademieskap van Onderrig en Leer-kortkursus: 2024-deelnemers

Assesseringskortkursus: 2024-deelnemers

Kortkursus vir die professionele ontwikkeling van akademici in hulle onderrig (Prontak): 2024-deelnemers

KI-kortkursus: 2024-deelnemers

KI- en Sosiaal-verantwoordelike Pedagogieë-kortkursus: 2024-deelnemers