Interne Geneeskunde
Die Afdeling Interne Geneeskunde is die grootste afdeling binne die Departement Geneeskunde aan die Fakulteit Geneeskunde en Gesondheidswetenskappe en by Tygerberg-hospitaal.
Ons kliniese dienslewering sluit noodopnames, binnepasiëntesorg (insluitend hoësorg) en buitepasiëntesorg in. Die afdeling beskik oor 164 binnepasiëntbeddens en is opgedeel in vyf kliniese eenhede, ’n span vir noodopnames, en ’n Hoësorgeenheid vir volwasse mediese pasiënte. Ons bestuur ook ’n Mediese Buitepasiëntkliniek vier keer per week.
Tygerberg-hospitaal bied streeks- en tersiêre sorg aan vir die helfte van die groter Kaapse Metropool en tersiêre sorg aan omliggende plattelandse distrikte soos die Weskus, Kaapse Wynlande en die Boland/Overberg.
Ons het ’n aktiewe kliniese uitreikprogram na hospitale soos Khayelitsha, Helderberg en Karl Bremer. Hierdie uitreik sluit konsultasies, opleiding van studente en mediese beamptes, en strategiese ondersteuning in.
Die meeste van die voorgraadse kliniese praktiese opleiding vir Interne Geneeskunde vind plaas in die Afdeling Interne Geneeskunde. Studente in jaar 4, 5 en 6 sluit aan by kliniese spanne vir rotasies in akute medisyne en buitpasiëntesorg.
Ons huisves ook die grootste aantal nagraadse studente vir die MMed-graad in Interne Geneeskunde en die FCP-opleidingsprogram van die Kolleges vir Geneeskunde van Suid-Afrika.
Subafdelings binne Interne Geneeskunde
Pulmonologie
Die Afdeling Pulmonologie aan Tygerberg-hospitaal fokus op omvattende opleiding, navorsing en kliniese sorg rakende respiratoriese gesondheid en kritieke sorg. Kliniese fokusareas sluit die bestuur van asemhalingsiektes op primêre sowel as subspesialisvlak in, gevorderde diagnostiese en terapeutiese intervensies, en die sorg van pasiënte in ’n komplekse kritieke toestand, in samewerking met intensiewesorgspanne.
Reumatologie
Reumatologie is ’n subspesialiteit van Interne Geneeskunde wat fokus op immuunverwante ontstekingsiektes wat verskeie liggaamsisteme beïnvloed. Ons bied voorgraadse en nagraadse opleiding van hoë gehalte, bevorder navorsing, en lewer omvattende sorg vir reumatiese en muskuloskeletale toestande. Vir optimale sorg van pasiënte met multisisteem-siektes werk ons nou saam met vakgebiede soos dermatologie, pulmonologie, nefrologie, kardiologie, ortopedie en ondersteunende gesondheidsberoepe soos arbeidsterapie en fisioterapie — wat ’n interdissiplinêre en holistiese benadering verseker.
Nefrologie
Die Afdeling Nefrologie bestuur ’n satelliet-haemodialiseenheid by Worcester-hospitaal, en ons pasiënte ontvang ook dialise by verskeie privaat eenhede deur openbare-privaat vennootskappe. Ons bied ’n volledige reeks dienste aan, insluitend haemodialise, peritoneale dialise en nieroorplantings. Ons is aktief betrokke by nagraadse opleiding in interne geneeskunde en nefrologie, en lei ook spesialisstudente van ander Afrika-lande op.
Hematologie
Ons werk nou saam met die Departement Hematopatologie en skakel gereeld oor kliniese sorg, opleiding en navorsing. Hierdie samewerking versterk ons vermoë om geïntegreerde sorg aan pasiënte met bloedverwante siektes te bied.
Kontak ons
+27 21 938 9111
[email protected]
Straatadres
Kliniese Gebou
Tygerberg-kampus
Francie van Zijl-rylaan