Universiteit Stellenbosch (US) het onlangs die jaarlikse Rektorstoekennings vir Uitnemende Prestasie aangebied. Die formele galadinee het die uitstaande prestasies van studente in akademici en ko-kurrikulêre velde gevier.

Lynn Grant was een van twee studente van die Fakulteit Opvoedkunde wat 'n toekenning vir akademiese uitnemendheid ontvang het. “Die Rektorstoekenning is 'n spesiale erkenning vir die harde werk en opofferings wat ek in my studies ingesit het. Dit laat my voel dat ek raakgesien word en dat dit wat ek doen die moeite werd is," het Grant gesê.

Sy doen tans haar BEd Honneurs in Kurrikulum Studies. Vanaf 2019 – 2021 het sy haar BSc-graad in Menslike Lewenswetenskap voltooi en in 2022 het sy haar Nagraadse Onderwyssertifikaat (NGOS) voltooi.

"Ek het besluit om onderwys te doen omdat ek nog altyd 'n passie gehad het vir beide biologie en om mense te help om dinge te verstaan. My wonderlike onderwysers, insluitend me Jagesar, me Gevers en me Moolman, het my beroepskeuse beïnvloed" het Grant gesê.

Onderrig is iets wat sy altyd interessant gevind het omdat haar pa ook 'n onderwyser is. Sy het dit geniet dat hy haar kon help met haar skoolwerk en haar ouers is haar grootste motiveerders. Dit was meestal haar passievolle hoërskool lewenswetenskaponderwyser wat haar laat besef het dat onderrig iets is wat sy wou doen.

“'n Hoogtepunt tydens my NGOS-jaar was om deur professor Nuraan Davids en dr Marie-Louise Botha onderrig te word. Hulle is albei kundiges in hul velde en dit was so 'n hoogtepunt om deur hulle onderrig te word," het Grant gesê.

Haar plan is om ten minste 5 – 10 jaar in Suid-Afrika klas te gee en dan verder te studeer in wetenskap en moontlik eendag 'n dosent te word. Sy dink Suid-Afrika het meer passievolle onderwysers nodig wat nie net inhoudskennis het nie, maar ook mensevaardighede.

Foto: Prof Koopman, Lynn Grant, Prof Madiba (Dekaan: Fakulteit Opvoedkunde).

Foto deur: Wil Punt (Peartree Photography)