​Ter erkenning van sy beduidende bydraes tot die Universiteit Stellenbosch (US) het Hein Swanepoel, Senior Direkteur van SUNCOM, die gesogte Kanseliersprys ontvang. Onder sy leiding floreer die universiteit se kommersiële kantoor en is dit ’n sleutelbydraer tot die instelling se vyfde inkomstestroom.

As deel van sy lofbetuiging het prof. Stan du Plessis, Hoofbedryfsbeampte vir Bedrywighede en Finansies, geskryf: “Adv. Hein Swanepoel het die Universiteit Stellenbosch se benydenswaardige Afdeling vir Kommersiële Dienste (SUNCOM) opgebou deur meer as dertig jaar van uitmuntende leierskap, entrepreneurskap en kommersiële vernuf. Hy het ’n deurslaggewende rol gespeel in die ontwikkeling en implementering van die Universiteit se Tera Term-finansiële stelsel en het die kommersiële model vir ons geliefde Studentesentrum, die Neelsie, geskep.”Benewens ander verantwoordelikhede hou Hein toesig oor die universiteit se kommersiële entiteite, insluitend Koshuisdienste, Vervoerdienste, die US Botaniese Tuin, Voedseldienste en Nakoming, die Kopieer- en Drukafdeling en die Verhuringskantoor. Onder sy leiding is Factory209 (Edms.) Bpk. gestig, saam met ander suksesvolle sakenewe soos CECO, Maties Shop, Gradlinc en Neelsie 3@1, asook die binnekort bekendgestelde Eenheid vir Konsultasiedienste.Gradlinc, ’n platform wat Hein voorgestel het om potensiële werkgewers, gegradueerdes en universiteite met mekaar te verbind, is ’n treffende voorbeeld van hoe kommersialisering die bedryf positief kan beïnvloed, met verskeie ander instellings wat reeds geregistreer het om die platform te gebruik.Hein se toewyding, entrepreneurskap en sy passie vir mense het ’n blywende impak op die US-personeel, studente en eksterne belanghebbendes gemaak. Die Kanseliersprys is welverdiende erkenning en ’n bewys van die invloed van sy bydraes tot die universiteit se groei, innovasie en uitnemendheid.