​Die Thuthuka-beursfonds (Thuthuka) van die Suid-Afrikaanse Instituut vir Geoktrooieerde Rekenmeesters (SAICA) verskaf jaarliks omvattende beurse vir swart en bruin akademies en finansieel verdienstelike studente wat aan een van die goedgekeurde en geakkrediteerde universiteite in die land studeer om as geoktrooieerde rekenmeesters te kwalifiseer.

As die kurator van die geoktooieerde rekenmeestersberoep het SAICA onderneem om te verseker dat Thuthuka-studente nie net finansiële steun aangebied word nie, maar dat hulle holisties ondersteun word ten einde sukses te behaal. Dis reeds bewys dat die omvattende steun van die Thuthuka-beursfonds die opskopkoers aan universiteite verlaag en studente se indiensnemingspotensiaal 'n yslike hupstoot gee. Die Thuthuka-program het reeds vir meer as 1 500 ten volle gekwalifiseerde geoktrooieerde rekenmeesters in Suid-Afrika gesorg.

Voornemende BRek-studente kan nou vir Thuthuka-beurse in 2023 aansoek doen.

Voornemende studente moet eers aansoek doen om toelating tot die Universiteit Stellenbosch (aansoeke het reeds geopen), sowel as vir plek in 'n koshuis  voordat hulle vir 'n Thuthuka-beurs aansoek doen.

Die beurse is slegs beskikbaar aan BRek-studente met 'n matriekgemiddelde van 70% (Lewensoriëntering uitgesluit), 'n wiskundepunt van minstens 70% (maar verkieslik 80%), en 'n rekeningkundepunt van minstens 70%.

Die skakel vir elektroniese aansoeke is www.thuthukabursaryfund.co.za. Aansoeke sluit op 31 Augustus 2022. (Onthou asb. om Google Chrome te gebruik om dié webblad te besoek.)

Vir navrae, kontak asb. die Thuthuka-beursfonds by [email protected].

• Vir inligting oor die aansoekprosedure by die Universiteit Stellenbosch, kliek hier.

• Vir ander inligting, insluitend koshuise, kliek hier.