Eenheid vir Gestremdhede
Ons Werk
Die Eenheid vir Gestremdhede is daartoe verbind om ’n kampus te skep waar studente met gestremdhede nie net maklik inskakel nie, maar werklik floreer – op hulle eie unieke manier. Ons skep doelbewus ’n ondersteunende en toeganklike omgewing wat studente bemagtig om hul volle potensiaal te bereik. Ons verseker dat alle studente gelyke toegang tot akademiese hulpbronne, gesondheidsorg, ondersteuning en finansiële hulp het.
Ons span help met spesiale eksamenreëlings, ondersteun dosente met die ontwikkeling van toeganklike studiemateriaal en bied praktiese hulpmiddels en tegnologie wat by elke student se unieke leerstyl pas. Deur saam met jou te werk, help ons jou om jou akademiese reis met selfvertroue en onafhanklikheid aan te pak.
Ons dienste
Akademiese ondersteuning
Ons help om spesiale reëlings vir assesserings te tref – soos ekstra tyd of ander bystand wat dit makliker maak vir studente om assesserings af te lê. Studente het ook toegang tot studiemateriaal in ’n geskikte formaat, sowel as hulpmiddels soos skermlesers, Braille-drukkers en digitale vergrootglase. Ons verwys jou graag na die regte persone wat jou met opdragte, akademiese ondersteuning of biblioteektoegang kan bystaan.
Opleiding en bewusmaking
Ons bied ook opleiding en werksessies aan vir studente én personeel, sodat die verbetering van toeganklikheid en die verwydering van struikelblokke ’n gedeelde verantwoordelikheid word. Dit sluit gebaretaalsessies, die geakkrediteerde Lei met Gestremdheid-program (wat fokus op universele toegang, ontwerp en redelike verblyfverwagtinge vanuit ’n gestremdheidsperspektief), asook die Siyakhula-opleidingsessies in wat deur die Universiteit se Afdeling Menslike Hulpbronne aangebied word. Vir laasgenoemde bied die Eenheid ’n sessie oor universele toegang en ontwerp en oor gestremdheidinsluiting op kampus aan.
Sport
Studente met gestremdhede het toegang tot ’n verskeidenheid sportsoorte aan die Universiteit en van Suid-Afrika se topatlete met gestremdhede het al hier by Maties kom oefen. Ons stel jou graag aan die regte mense bekend wat jou kan help om jou sportdoelwitte te bereik – of selfs ’n nuwe sportsoort aan te pak.