Jou veiligheid

Die US kan weens veiligheidsredes nie inligting oor alle veiligheidsmaatreëls verskaf nie. Meer as 60 interne veiligheidsbeamptes patrolleer egter saam met meer as 200 gespesialiseerde sekerheidskontrakpersoneel die Universiteitskampusse.

Saamstapdiens

Die US bevorder aktief die Universiteit se saamstapdiens wat elke aand vanaf 18:00 beskikbaar is. Studente kan versoek om in die aand deur ’n veiligheidsbeampte vergesel te word wanneer hulle tussen geboue of oor parkeerterreine op kampus stap. Hierdie gratis diens is regdeur die jaar op kampus beskikbaar. Studente kan die saamstapdiens versoek deur ’n WhatsApp-boodskap na 082 808 2333 te stuur.

'n Bykomende "saamstap-sneldiens" is ook gedurende assesseringstye daagliks vanaf 19:00 op die uur beskikbaar. Studente kan by die veiligheidskiosk buite die Jan Mouton-gebou bymekaarkom, vanwaar 'n veiligheidsbeampte groepe na verskeie bestemmings op kampus sal vergesel. (Hierdie diens vervang nie die normale saamstapdiens nie.)

Terwyl die Universiteit voortdurend bewustheid skep en veiligheidskwessies op kampus in samewerking met ander veiligheidsagentskappe op die dorp aanspreek, beskou dit studente, personeel en die publiek as vennote in hierdie proses en doen ons 'n beroep op hulle om waaksaam te bly en waaksame en aktiewe vennote in kampusveiligheid te wees. Dit sluit in om verantwoordelikheid vir hulle persoonlike veiligheid op kampus en in die dorp te neem – veral in die aand.

Die Universiteit is deur middel van Kampussekuriteit 'n lid van die Stellenbosse Sekuriteitsnetwerk waar die verskillende veiligheidsvennote veiligheidsinligting deel. Kampussekuriteit mag egter slegs die kampus patrolleer. Ingevolge die regulasies van die reguleringsowerheid vir die private veiligheidsbedryf (PSIRA) is Kampussekuriteit tot veiligheidsbedrywighede binne die kampusgebied van die Universiteit beperk

Gereelde aksies en inisiatiewe wat deur die Universiteit onderneem word, sluit die volgende in: 

Misdaadvoorkoming en bewusmaking gedurende Verwelkomingsweek: Kampussekuriteit bied inligtingsessies vir studenteleiers en groepe nuwelinge aan om inligting oor selfverdedigingsopleiding te verskaf en om persoonlike veiligheidsapplikasies soos Buzzer en pepersproei te bevorder.Sien ons nuuste video hier
 

Benutting van sosiale media vir kampusveiligheidsbewustheid: Kampussekuriteit gebruik sosiale media om bewustheid te skep en waaksaamheid onder die kampusgemeenskap te bevorder. Platforms wat gebruik word om beste praktyke en misdaadvoorkomingswenke te kommunikeer, sluit die Universiteit se Facebook-bladsy, Instagram en TikTok in (sien voorbeelde van plasings en video's hieronder). TikTok stel Kampussekuriteit in staat om 'n wye gehoor te bereik, aangesien dit baie gewild is onder jong volwassenes. Die kort video's wat op hierdie platform geplaas is, is al byna 1 000 keer gekyk. Kyk die video hier.

Die Universiteit besef dat veiligheid 'n gedeelde verantwoordelikheid is, en werk daarom nou saam met sleutelbelanghebbers op die dorp deur onder meer gereelde besprekings by veiligheidsforums en die Burgemeester-/Rektorforum om 'n omvattende benadering tot veiligheid te verseker. Die US sal nie ophou om aktief met die res van die rolspelers op die dorp saam te werk en die nodige hulpbronne toe te wys om die veiligheid van sy studente te verseker nie. Die US waardeer ook die feit dat die SAPD en sy veiligheidsvennote onvermoeid werk om hierdie sake te ondersoek.

Die Universiteit se Eenheid vir Gelykwaardigheid implementeer die US se beleide oor onbillike diskriminasie en teistering en bied verskeie dienste en ondersteuning aan studente en personeel. Klik hier om meer te lees

Studente het ook toegang tot die SU INSPIRE-fasiliteit (volg ook heirdie skakel) binne die Stellenbosch GBG-sentrum in Idasvallei, Stellenbosch.

•    Stuur 'n SOS-noodboodskap aan Kampussekuriteit
•    Meld veiligheidskwessies op kampus aan
•    Ontvang intydse kampusveiligheidswaarskuwings 
•    Stuur stemnotas en foto's 
 

Volg die gids hieronder om aan te sluit en geverifieer te word. 

Stap 1: Laai af en teken in 

•    Laai die Buzzer-app af vanaf Apple App Store of Google Play Store. 
•    Skep jou rekening en stel jou basiese profiel op. 

arrow_downward

Stap 2: Sluit aan by die US-gemeenskap 

Sodra jou rekening opgestel is, moet jy dit aan die Universiteit koppel:

•    Maak die app-kieslys oop en klik op ‘My Communities’.
•    Kies die opsie om by 'n nuwe gemeenskap aan te sluit. 
•    Tik die aansluitingskode <Maties> in of skandeer eenvoudig die Universiteit se QR-kode. 

arrow_downward

Stap 3: Beveilig jou profiel

Om by die beskermde gemeenskap aanvaar te word, moet US Kampussekuriteit jou identiteit verifieer (verifikasie kan tot 48 uur neem). Jou versoek sal "hangende" bly totdat jy hierdie stappe voltooi het: 

•    Gaan na ‘My Profile’ en 'View Profile.'
•    Kies Sekuriteitsverskaffer (‘Security Provider’) en dan US Kampussekuriteit (‘SU Campus Security’)
•    Tik jou studente- of personeelnommer in

Maak asseblief seker jou student- of personeelnommer is korrek ingetik om enige vertragings in jou goedkeuringsproses te voorkom. 

Die app sluit 'n SOS-paniekknoppie in, wat direk aan Kampussekuriteit op die Stellenbosch-kampus gekoppel is. Wanneer dit geaktiveer word, word Kampussekuriteit se beheerkamer in kennis gestel sodat hulp gestuur kan word. 

Gebruikers (personeel of studente) kan ook deur middel van die aanmeldingsknoppie meer spesifieke soorte voorvalle aanmeld. 

Let asseblief op: Die app het 'n geo-grens, wat beteken die SOS-funksie werk net terwyl jy op die Stellenbosch-kampus is. Die US-spesifieke platform van die app is slegs vir US-studente en personeel toeganklik. 

 

Wanneer jy die SOS-knoppie aktiveer, word Kampussekuriteit op die Stellenbosch-kampus onmiddellik in kennis gestel. 

Ander Buzzer-gebruikers (studente en personeel) op die Stellenbosch-kampus wat ingestem het om noodboodskappe te ontvang, word ook in kennis gestel.

Gebruikers in die nabye omgewing kan help waar moontlik. 

Privaatheidskennisgewing:
Slegs Kampussekuriteit kan jou naam en telefoonnommer sien sodat hulle jou in 'n noodgeval kan kontak. Ander gebruikers kan net jou ligging – en nie jou identiteit of kontakbesonderhede nie – op die kaart sien. 

 

Toegang tot gebruikers se ligging is noodsaaklik vir die toepassing om behoorlik te funksioneer, aangesien dit Kampussekuriteit toelaat om op die korrekte ligging te reageer en te verseker dat jy toepaslike waarskuwings ontvang. 

Buzzer is met privaatheid in gedagte ontwerp: Liggingdata word gekodeer en veilig oorgedra en Kampussekuriteit kan slegs persoonlike besonderhede sien wanneer hulle 'n noodboodskap ontvang.

Buzzer voldoen ook ten volle aan die Wet op die Beskerming van Persoonlike Inligting (POPI).

 

Die app herken jou ligging outomaties deur jou toestel se GPS of netwerkgebaseerde liggingdienste (“location”) te gebruik. Maak seker liggingdienste is op jou toestel geaktiveer. 

Klik hier om na 'n video van die app se opstelling en sleutelkenmerke te kyk. 

Om 'n noodboodskap te skep: Tik op die "Report"-knoppie, kies die tipe noodboodskap, en voeg 'n beskrywing, foto of stemnota by indien nodig.

Hoe om waarskuwings te sien: Tik op die "Alerts"- of "Broadcasts"-oortjie om onlangse waarskuwings oor voorvalle op kampus te sien.
 

Deur met die Stellenbosch Universiteit-gemeenskap te skakel, is jy aan ander US-studente en personeel op Buzzer gekoppel en sal jy waarskuwings en verslae regoor die Stellenbosch-kampus sien. 

Noodboodskappe kan nie verwyder word nadat dit gestuur is nie. Indien 'n boodskap per ongeluk gestuur word, moet jy die app se kletsfunksie gebruik om te bevestig dat dit 'n toets of 'n fout was en Kampussekuriteit sal die dan die noodboodskap sluit.

Die datagebruik vir die app is minimaal. 

In hierdie stadium is die geo-grens vir die inwerkingstelling tot die hoofkampus beperk, gegrond op die huidige implementeringsparameters.