Alice Elizabeth White is een van twee studente van Fakulteit Opvoedkunde wat 'n toekenning vir Uitnemende Prestasie ontvang het by die jaarlikse Rektorstoekennings vir Uitnemende Prestasie wat onlangs plaasgevind het.

“Om hierdie toekenning te ontvang het as 'n groot skok gekom. Ek is nie op skool as akademies sterk beskou nie en daardie stigma het vasgesteek by my toe ek universiteit toe gekom het. Die ontvangs van hierdie toekenning bewys vir my dat ek enigiets kan doen waarop ek my ingestel het en dat ek die mag het om die wêreld op my eie manier te verander," het White gesê.

Sy het bygevoeg dat dit ekstra spesiaal is vir haar dat die toekenning van die Fakulteit Opvoedkunde gekom het. Volgens White word die onderwysprofessie nie genoeg waardeer in vergelyking met ander beroepe en fakulteite nie. “Hierdie toekenning wys vir my dat ek nie net in my fakulteit gesien en gehoor word nie, maar ook op groter skaal. Met die ontvangs van die toekenning het prof Madiba, die dekaan van Fakulteit Opvoedkunde dit perfek gestel - hy het gesê dat sonder ons (Fakulteit Opvoedkunde) daar geen ander fakulteite of beroepe sou wees nie, aangesien dit onderwysers is wat kinders lei en opvoed om die politici, dokters, regsgeleerdes en wetenskaplikes te word."

White is tans 'n onderwyseres en hierdie toekenning het haar ook in staat gestel om vir haar klas te wys dat hulle nooit moet toelaat dat "etikette" hulle definieer nie en dat hulle enigiets kan bereik. Sy het BEd Intermediêre Fase studeer en doen tans haar Honneurs in Kurrikulum Ondersoek: Wetenskaponderwys. Haar navorsingsprojek handel oor die oorgang van wetenskaponderwysers se pedagogiese benaderings na die een-en-twintigste eeu.

White het nie geweet wat om te studeer nie, maar sy het net geweet sy wil Stellenbosch toe kom. “Ek het na die psigometriese toetse afdeling by die US gegaan, waar hulle vir my gesê het ek moet óf in gesondheidswetenskappe, maatskaplike werk óf onderwys gaan. Dit was vir my 50/50 of ek 'n vroedvrou of 'n onderwyser wou word!" Nadat sy vir haar BEd-graad aanvaar is, het sy meer opgewonde begin raak oor die idee om 'n onderwyser te wees. Haar eerste jaar was uitdagend aangesien sy nog nie 'n klaskamer betree het nie, maar nadat sy haar eerste prakties by 'n plaaslike skool in haar tweede jaar voltooi het, het sy passievol geraak oor onderrig.

Tydens hoërskool het van haar onderwysers 'n groot rol gespeel in haar identiteit om 'n onderwyser te word. Sy het dit eers besef toe sy self 'n onderwyser geword het. “Ek dink onderrig pas natuurlik by my aangesien jy tot agt uur per dag deur kinders omring word. Aangesien hulle soms meer tyd saam met jou by die skool spandeer as by die huis, begin hulle soos jou kinders voel!"

'n Hoogtepunt tydens haar voorgraadse studies was praktiese onderrig. “Prakties is soos 'n mediese student wat hul eerste operasie moet uitvoer. Jy het die hele vorige aand voorberei, geoefen en paniekerig geraak. Jy gaan die vertoning van 'n leeftyd aanbied en wil glimlagte op die kinders se gesigte sit. Die herinneringe wat jy saam met hierdie kinders maak, sal 'n leeftyd hou."

White hou tans skool en sien daarna uit om voltyds in die klaskamer te wees. Sy wil ook haar meesters- en PhD in Opvoedkunde doen.

Sy dink Suid-Afrika het onderwysers nodig wat passievol is oor onderwys. “Ongelukkig verlaat te veel mense wat ek ken Suid-Afrika om oorsee onderrig te gee, aangesien die betaling beter is en die onderrigomstandighede ook. As ons passievolle onderwysers het wat ondersteun word en voldoende hulpbronne kry, sal ons reeds 'n groot verandering sien in die rigting van ons doelwit om onderwys binne Suid-Afrika te verbeter."

Haar ma en ouma inspireer en motiveer haar. “Hulle is albei sterk, onafhanklike, deernisvolle en uiters talentvolle vroue. Hulle het my grootgemaak om op my eie voete te staan, hard te werk en te doen wat ek in die lewe wil doen – nie wat iemand anders wil hê ek moet doen nie," het White gesê.

Foto: Prof Koopman, Alice Elizabeth White en Prof Madiba (Dekaan Fakulteit Opvoedkunde).

Foto deur: Wil Punt (Peartree Photography)