Die Welgevallen-gemeenskapsielkundekliniek dra by tot die geestes-, sosiale en emosionele welstand van individue en gesinne in die breër Stellenbosch-gemeenskap. Ons skep ’n veilige en verwelkomende plek waar mense uit alle agtergronde hulself kan wees, ondersteuning kan ontvang en weer hul eie stem kan vind. Die kliniek is verbind tot sorg wat maklik toeganklik, bekostigbaar en betekenisvol is – met die oog op sterker individue en gesonder gemeenskappe.
As opleidingsfasiliteit vir meestersstudente in Kliniese Sielkunde aan die Universiteit Stellenbosch bied die kliniek waardevolle leergeleenthede buite die lesinglokaal. Studente werk onder toesig van ervare professionele persone, en gebruik beproefde, wetenskaplik gestaafde metodes om uitdagings soos angs, gesinskonflik en ander psigososiale kwessies aan te spreek. Ons werk nou saam met plaaslike organisasies en owerhede om sorg te bied wat werklik van praktiese waarde is vir die mense en gemeenskappe wat ons bedien – en dra so by tot die ontwikkeling van ’n toepaslike, medemenslike sielkundige praktyk in Suid-Afrika.
“As opleidingsfasiliteit vir sielkundestudente aan die Universiteit Stellenbosch bied die kliniek praktiese leergeleenthede onder leiding van ervare professionele persone.”
