Die befaamde Suid-Afrikaanse entrepreneur en kampvegter vir sosiale geregtigheid, Chris Otto, is deur die Universiteit Stellenbosch (US) met ʼn eredoktorsgraad by sy Desember-gradeplegtigheid vereer. Otto, ʼn US-alumnus, het Dinsdag (9 Desember 2025) die graad Doktor in die Regte (LLD), honoris causa, tydens ʼn gradeplegtigheidseremonie vir die Fakulteite Regsgeleerdheid en AgriWetenskappe ontvang.

Die eregraad is aan hom toegeken vir sy visionêre leierskap, entrepreneursgees, toewyding aan waardeskepping en sy verbintenis tot projekte wat maatskaplike geregtigheid en positiewe verandering in Suid-Afrika bevorder.

Otto het die US in sy aanvaardingstoespraak bedank vir die eredoktorsgraad. Hy het die universiteit geloof vir sy progressiewe transformasie.

“Ek is baie trots om geassosieer te word met die universiteit wat progressief getransformeer het tot waar ons vandag is.”

Otto het ook die US se nalatenskap om top regsgeleerdes op te lewer wat bekend is vir hul kritiese en onafhanklike denke beklemtoon.

Hy het die nuwe regsgraduandi toegespreek en gesê: “Ons het nog altyd topstudente, topgraduandi opgelewer. Stellenbosse regsgeleerdes het ook altyd die leiding geneem.” Otto het hulle aangemoedig om onafhanklike en kritiese denkers in hul loopbane te wees.

“Dit is ook belangrik dat julle ons Grondwet verdedig. Ons maak staat op julle vir ons toekoms, vir die toekoms van Suid-Afrika.”

Meer oor Chris Otto

Chris Otto was medestigter van die PSG Groep in 1995, deel van die span wat Capitec Bank in 2001 begin het en het Zeder Investments in 2006 gestig.

Die PSG Groep is vandag ’n belangrike Suid-Afrikaanse beleggingshouermaatskappy met belange in finansiële dienste, onderwys, landbou en ander sleutelsektore. Capitec Bank het gegroei tot een van Suid-Afrika se suksesvolste kleinhandelbanke, wat tot die ekonomie bydra deur werksgeleenthede te skep, die spaar van geld te bevorder en klein sakeondernemings deur middel van toeganklike krediet te bemagtig. Zeder Investments speel ook ’n sleutelrol in die ontwikkeling van die landboubedryf. 

Otto is ook by verskeie gemeenskapsontwikkelingsinisiatiewe betrokke. Otto en sy dogter, Zephne Ladbrook, het in 2016 die Otto-stigting begin. Hy dra deur die Stigting by tot maatskaplike geregtigheid en positiewe verandering in Suid-Afrika deur biblioteke en leesprogramme te skep om vroeë geletterdheid te verbeter.

Hy het ook ’n enorme impak by die US gemaak. Otto is die stigtersvoorsitter van die Stellenbosch Regsfakulteittrust. Die Trust ondersteun verskeie projekte, soos beurse vir nagraadse studente, finansiering om navorsings- en opleidingsinisiatiewe vir personeel te ondersteun en finansiering vir akademiese materiaal. Die Trust het met die vestiging van die Leerstoel in Sosiale Geregtigheid, die Gys Steyn-leerstoel in Finansiële Reguleringsreg en die Leerstoel in Stedelike Reg en Volhoubaarheidsbestuur gehelp.